मला हार्ट अटॅक आला असता..! निवृत्तीनंतर कॉल हिस्ट्री शेअर करत आर अश्विन म्हणाला…

आर अश्विन क्रिकेटविश्वातील मोठं नाव.. कसोटी क्रिकेटमध्ये त्याच्या नावाचा बोलबाला होता. त्याच्या आकडेवारीवरून ही बाब स्पष्ट होते. पण आता आर अश्विनने आंतरराष्ट्रीय क्रिकेटला रामराम ठोकला आहे. त्याने अचानक घेतलेल्या निवृत्तीची बातमी ऐकून अनेकांना आश्चर्याचा धक्का बसला. उर्वरित दोन सामन्यांसाठी ऑस्ट्रेलियात थांबला देखील नाही. निवृत्तीनंतर ऑस्ट्रेलियातून भारतात परतला असून आपला इतर गोष्टींमध्ये सक्रिय झाला आहे. असं असताना आर अश्विनने सोशल मीडियावर मोबाईलमधील कॉल हिस्ट्री शेअर केली आहे. ही कॉल हिस्ट्री शेअर करताना त्याला हार्ट अटॅक आला असता असं निवृत्तीनंतर सांगितलं आहे. त्यामुळे आर अश्विनच्या कॉल हिस्ट्रीबाबत क्रीडाप्रेमींमध्ये उत्सुकता ताणली गेली. निवृत्तीनंतर दिग्गज खेळाडूंनी त्याला फोन केल्याचं कॉल हिस्ट्रीमध्ये दिसत आहे. अश्विनने निवृत्ती घेतल्यानंतर पहिला कॉल त्याचा वडिलांचा आला होता. या व्यतिरिक्त सचिन तेंडुलकर आणि कपिल देव सारख्या दिग्गज क्रिकेटपटूंनी फोन केला होता. अश्विनला कपिलने व्हॉट्सअॅप कॉल केला होता.

निवृत्तीनंतर आता आर अश्विन आयपीएल खेळताना दिसणार आहे. तसेच दीर्घकाळ आयपीएल खेळण्याची इच्छा व्यक्त केली आहे. पण आंतरराष्ट्रीय पातळीवर सचिन आणि कपिल देव सारख्या दिग्गज खेळाडूंच्या पंगतीत बसला आहे. अश्विनने कॉल हिस्ट्री आपल्या एक्स हँडलवर शेअर करताना लिहिलं की, ‘जर कोणी 25 वर्षापूर्वी मला सांगितलं असतं की माझ्याकडे स्मार्टफोन आहे आणि त्याचा कॉल लॉग शेवटच्या दिवशी असा दिसणार आहे, तर हे ऐकून मला हार्ट अटॅक आला असता. मी यासाठी सचिन आणि कपिल पाजी याचे आभार मानतो.’

आर अश्विनने आंतरराष्ट्रीय क्रिकेट कारकि‍र्दीत 765 विकेट घेतल्या आहेत. ऑस्ट्रेलिया दौऱ्यात तीन कसोटी सामने झाल्यानंतर त्याने निवृत्ती घोषित केली. तीन पैकी एका कसोटी सामन्यात त्याला खेळण्याची संधी मिळाली. खेळलेल्या शेवटच्या कसोटीत एक विकेट घेण्यात यश आलं. त्यानंतर गाब्बा कसोटीत आर अश्विनला संघात स्थान मिळालं नाही आणि सामना संपल्यानंतर त्याने निवृत्तीची घोषणा केली.