World Cup 2023 Live Streaming | वर्ल्ड कपमधील सर्व सामने फुकटात पाहता येणार, जाणून घ्या

यंदाचा वर्ल्ड कप भारतात होणार असल्यामुळे भारतीय संघाला विजेतेपडदाचं प्रबळ दावेदार मानलं जात आहे. भारतीय संघाचा आताचा फॉर्म पाहता कोणत्याही संघाला भारताला पराभूत करणं जडच असणार आहे.

मुंबई | आयसीसी वनडे वर्ल्ड कपला गुरुवार 5 ऑक्टोबर 2023 पासून सुरुवात होत आहे. स्पर्धेतील पहिला सामना हा गतविजेता विरुद्ध उपविजेता यांच्यात होणार आहे. या पहिल्या सामन्यात इंग्लंड विरुद्ध न्यूझीलंड हे संघ आमनेसामने असणार आहेत. या स्पर्धेत 2 सेमी फायनल, 1 फायनल आणि 45 साखळी असे एकूण 48 सामने 45 दिवसात पार पडणार आहेत. सलामी आणि अंतिम सामना हा गुजरातमधील नरेंद्र मोदी स्टेडियममध्ये होणार आहे. वर्ल्ड कपमधील एकूण 48 सामने हे मुंबई , पुण्यासह एकूण 10 शहरांमध्ये सामने खेळवण्यात येणार आहेत. हे सर्व सामने क्रिकेट चाहत्यांना फुकटात पाहायला मिळणार आहेत. हे सामने फुकटात कसे पाहता येतील, हे आपण जाणून घेऊयात.

भारतात होणाऱ्या सर्व सामने टीव्हीवर दाखवण्याचे अधिकार हे अनिल अंबानी यांच्या वायकॉम 18 ग्रुपकडे आहेत. त्यानुसार टीव्ही आणि डिजीटल राईट्स हे वायकॉम ग्रुपकडे आहेत. त्यामुळे भारतात होणाऱ्या सर्व सामने हे आता स्पोर्ट्स 18 या चॅनेलवर आणि जिओ सिनेमा या एपवर पाहायला मिळतील. मात्र आयसीसी आणि भारताबाहेर होणाऱ्या सर्व सामन्यांचे टीव्ही राईट्स अजून स्टार स्पोर्ट्स नेटवर्ककडे आहेत.

त्यामुळे वर्ल्ड कपमधील सर्व सामने हे टीव्हीवर स्टार स्पोर्ट्स नेटवर्कच्या विविध भाषांमधील चॅनेलवर सशुल्क पाहता येतील. मात्र हे सामने मोबाईलवर फुकटात पाहायला मिळणार आहेत. त्यासाठी फक्त मोबाईलवर डिज्नी प्लस हॉटस्टार एप डाऊनलोड करावा लागणार आहे. आधी डिज्नी प्लस हॉटस्टारवर सामने पाहण्यासाठी पैसे मोजावे लागत होते. मात्र जिओ सिनेमानंतर डिज्नी प्लस हॉटस्टारने सामने फुकटात दाखवण्याचा निर्णय घेत प्रेक्षकांना आपल्याकडे ओढण्याचा प्रयत्न केला.

दरम्यान टीम इंडिया या वर्ल्ड कपमध्ये मुंबईतील वानखेडे, पुण्यातील एमसीएच्या गहुंजेसह एकूण 9 स्टेडियमध्ये सामने खेळणार आहे. मात्र क्रिकेट चाहत्यांचं सर्वात जास्त लक्ष हे अहमदाबादमधील नरेंद्र मोदी स्टेडियममध्ये 14 ऑक्टोबरला होणाऱ्या टीम इंडिया विरुद्ध पाकिस्तान सामन्याकडे असणार आहे.

आयसीसी वनडे वर्ल्ड कपसाठी टीम इंडिया | रोहित शर्मा (कॅप्टन), हार्दिक पांड्या (उपकर्णधार ), शुभमन गिल, विराट कोहली, श्रेयस अय्यर, केएल राहुल, रवींद्र जडेजा, शार्दुल ठाकूर, जसप्रीत बुमराह, मोहम्मद सिराज, कुलदीप यादव, मोहम्मद शमी, रविचंद्रन अश्विन, इशान किशन आणि सूर्यकुमार यादव.