IND vs AUS, 2nd ODI | ऑस्ट्रेलियाचा टीम इंडियावर 10 विकेट्सने धमाकेदार विजय
ऑस्ट्रेलियाने दुसऱ्या एकदिवसीय सामन्यात टीम इंडियावर 10 विकेट्सने विजय मिळवला आहे. या विजयासह ऑस्ट्रेलियाने 3 सामन्यांच्या मालिकेत 1-1 ने बरोबरी साधली आहे.
विशाखापट्टणम | ऑस्ट्रेलियाने टीम इंडियावर दुसऱ्या एकदिवसीय सामन्यात 10 विकेट्सने शानदार विजय मिळवत जोरदार कमॅबक केलं आहे. टीम इंडियाने ऑस्ट्रेलियाला विजयासाठी 118 धावांचं आव्हान दिलं होतं. ऑस्ट्रेलियाने हे आव्हान अवघ्या 11 ओव्हरमध्ये पूर्ण केलं. ऑस्ट्रेलियाच्या ट्रेव्हिस हेड आणि मिचेल मार्श या सलामी जोडीनेच विजय मिळवून दिला. या दोघांनी 121 धावांची नाबाद भागीदारी केली. मिचेल मार्श याने नाबाद 66 आणि ट्रेव्हिस हेड याने नाबाद 51 धावांची खेळी केली. ऑस्ट्रेलियाने या विजयासह पहिल्या सामन्यातील पराभवाचा वचपा घेतला. तसेच 3 सामन्यांच्या मालिकेत 1-1 बरोबरी साधली.
टीम इंडियाची बॅटिंग
दरम्यान त्याआधी ऑस्ट्रेलियाने टॉस जिंकून टीम इंडियाला बॅटिंगसाठी भाग पाडलं. टीम इंडिया अवघ्या 26 ओव्हरमध्ये 117 धावांवर ऑलआऊट झाली. टीम इंडियाकडून विराट कोहली याने सर्वाधिक 31 धावांची खेळी केली. सूर्यकुमार यादव, शुबमन गिल, मोहम्मद सिराज आणि मोहम्मद शमी या चोघांना भोपळाही फोडता आला नाही.
अक्षर पटेल याने शेवटपर्यंत नाबाद राहत 29 धावा जोडल्या. ज्यामुळे टीम इंडियाला 100 धावांचा टप्पा पूर्ण करता आला. रविंद्र जडेजा 16 धावा करुन बाद झाला. तर कॅप्टन रोहित शर्मा याने 13 धावा केल्या. या व्यतिरक्त केएल राहुल याने 9, हार्दिक पंड्या 1 आणि कुलदीप यादव याने 4 धावा केल्या. ऑस्ट्रेलियाकडून तर ऑस्ट्रेलियाकडून मिचेल स्टार्क याने सर्वाधिक 5 विकेट्स घेतल्या. तर सिन एबोट याने 3 विकेट्स घेतल्या. नॅथन एलिस याने 2 फलंदाजांना मैदानाबाहेरचा रस्ता दाखवला.
तिसरा सामना निर्णायक
दरम्यान आता 3 सामन्यांची मालिका 1-1 ने बरोबरीत आहे. मालिकेतील तिसरा आणि शेवटचा सामना हा बुधवारी 22 मार्च रोजी चेन्नईतील एम ए चिदंबरम स्टेडियममध्ये खेळवण्यात येणार आहे. हा सामना जिंकणारी टीम मालिका जिंकेल. त्यामुळे दोन्ही संघांमध्ये या तिसऱ्या सामन्यात चांगलीच झुंज पाहायला मिळणार आहे.
टीम इंडिया प्लेइंग इलेव्हन | रोहित शर्मा (कॅप्टन) , शुबमन गिल, विराट कोहली, सूर्यकुमार यादव, केएल राहुल, हार्दिक पंड्या, रवींद्र जडेजा, अक्षर पटेल, कुलदीप यादव, मोहम्मद सिराज आणि मोहम्मद शमी.
ऑस्ट्रेलिया प्लेइंग इलेव्हन | स्टीव्हन स्मिथ (कर्णधार), ट्रेव्हिस हेड, मिचेल मार्श, मार्नस लाबुशेन, एलेक्स कॅरी, कॅमरन ग्रीन, मार्कस स्टोयनिस, नाथन एलिस, सेन एबॉट, मिचेल स्टार्क आणि एडम झॅम्पा.
