दारुण पराभवानंतरही लखनौ सुपर जायंट्स संघ प्लेऑफ गाठणार! कसं आहे गणित समजून घ्या

Image Credit source: Twitter

आयपीएल 2024 स्पर्धेसाठी प्लेऑफची शर्यत आणखी रंगतदार वळणावर येऊन ठेपली आहे. अजूनही कोणताच संघ अधिकृतपणे प्लेऑफमध्ये पोहोचू शकलेला नाही. त्यामुळे प्रत्येक सामन्याचं महत्त्व वाढलं आहे. असं असताना लखनौ सुपर जायंट्स आणि सनरायझर्स हैदराबाद हा सामना पार पडला. हा सामना हैदराबादने 10 गडी राखून 9.4 षटकातच आपल्या खिशात घातला. दारुण झालेल्या पराभवानंतर संघ मालक संजीव गोयंका चांगलेच संतापलेले दिसले. तसेच भर मैदानातच त्यांनी केएल राहुलला धारेवर धरल्याचा व्हिडीओ सोशल मीडियावर व्हायरल होत आहे. प्रत्येक जण आपआपल्या पद्धतीने या व्हिडीओचं विश्लेषण करत आहेत.अशा सर्व चर्चांना उधाण आलं असताना लखनौ सुपर जायंट्स संघ प्लेऑफमध्ये स्थान पक्कं करणार का? हा प्रश्न उपस्थित होत आहे. लखनौ सुपर जायंट्सला अजूनही प्लेऑफमध्ये स्थान मिळवण्याची संधी आहे, कशी ते समजून घेऊयात…

लखनौ सुपर जायंट्सने आतापर्यंत 6 सामन्यात विजय मिळवून 12 गुण मिळवले आहेत. तर सहा सामन्यात पराभवाचं तोंड पाहावं लागलं आहे. गुणतालिकेत चेन्नई, दिल्ली आणि लखनौचे प्रत्येकी 12 गुण आहेत. पण नेट रनरेट कमी असल्याने लखनौचा संघ सहाव्या स्थानावर आहे. आता लखनौ सुपर जायंट्सला अजून दोन सामने खेळायचे आहेत. त्यामुळे टॉप 4 मध्ये स्थान मिळवण्याची संधी आहे. उर्वरित दोन सामने हे दिल्ली आणि मुंबईसोबत आहेत. हे दोन्ही सामने जिंकले तर 16 गुण होतील. दिल्लीला पराभूत केलं तर वाटेतील एक काटा कमी होईल.पण चेन्नईला टॉप 4 मधून बाहेर काढायचं असेल तर मुंबई इंडियन्स विरुद्धचा सामनाही जिंकावा लागेल.तसेच चेन्नईनेही उर्वरित तीन सामन्यापैकी दोन सामने गमावणं गरजेचं आहे.

इतकंच काय तर गुणतालिकेत टॉपला असलेल्या कोलकाता नाईट रायडर्स, राजस्थान रॉयल्स आणि सनरायझर्स हैदराबाद या संघांनी प्रत्येक सामना जिंकणं गरजेचं आहे. त्यामुळे लखनौ सुपर जायंट्सचा प्लेऑफचा मार्ग आणखी सुकर होईल. नाहीतर टॉपला या तिन्ही संघांनी इथून पुढे सर्व सामने गमवणं आवश्यक आहे. त्यामुळे यापैकी कोणतंही समीकरण जुळून आलं तर लखनौला प्लेऑफमध्ये खेळण्याची संधी मिळेल. पण उर्वरित दोन सामन्यात लखनौला आपला नेट रनरेटही सुधारावा लागणार आहे. कारण हैदराबादविरुद्धच्या सामन्यात नेट रनरेटवर जबरदस्त परिणाम झाला आहे. त्यामुळे आता पुढे काय होतं हे पाहणं औत्सुक्याचं आहे.