IPL Players Auction 2022 : आज एकूण 97 खेळाडूंवर लागली बोली, फ्रेंचायजींनी 74 खेळाडूंना घेतलं विकत

TATA IPL 2022 Auction चा पहिला दिवस संपला आहे. आज एकूण 97 खेळाडूंवर बोली लागली. यात 74 खेळाडूंना विकत घेतलं. 23 खेळाडूंवर कोणीही बोली लावली नाही. लिलावात विकत घेतलेल्या 74 खेळाडूंमध्ये 20 परदेशी खेळाडू आहेत.

20 लाख बेस प्राइस असलेल्या आर साई किशोरला गुजरात टायटन्सने तब्बल 3 कोटींना विकत घेतलं आहे.

लेग स्पिनर श्रेयस गोपालला सनरायजर्स हैदराबादने विकत घेतलं आहे. फक्त 75 लाखामध्ये विकत घेतलं. गोपाल याआधी राजस्थानकडून खेळला आहे.

राजस्थान रॉयल्सने केसी करियप्पाला 30 लाख रुपयामध्ये विकत घेतलं आहे. करियप्पाची बेस प्राइस 20 लाख रुपये होती.

लेग स्पिनर मुरुगन अश्विनसाठी SRH आणि मुंबई इंडियन्समध्ये स्पर्धा होती. मुंबईने 1.60 कोटी रुपयांना मुरुगन अश्विनला विकत घेतलं. मुंबईने विकत घेतलेला आजच्या दिवसातील हा तिसरा खेळाडू आहे.

आवेश खानसाठी फ्रेंचायजीमध्ये जोरदार चुरस दिसली. 20 लाख बेस प्राइस असलेल्या आवेश खानसाठी सीएसके, मुंबई इंडियन्स, SRH आणि लखनऊ जायंट्सने बोली लावली. अखेर लखनऊने बोली जिंकत तब्बल 10 कोटी रुपयांना आवेश खानला विकत घेतलं. मागच्यावेळी दिल्लीने त्याला 70 लाखांना विकत घेतलं होतं.

वेगवान गोलंदाज कार्तिक त्यागीला आपल्या चमूत घेण्यासाठी फ्रेंचायजींमध्ये चुरस दिसते आहे. 20 लाख बेस प्राइस असलेला कार्तिक त्यागी मागच्या सीजनमध्य राजस्थान रॉयल्सकडून खेळला होता. कार्तिक त्यागीला SRH ने चार कोटी रुपयांमध्ये विकत घेतलं.

शेल्डन जॅक्सन पुन्हा एकदा कोलकाता नाइट रायडर्सचा हिस्सा बनला आहे. KKR ने या अनुभवी भारतीय खेळाडूसाठी 60 लाख रुपये खर्च केले.

पंजाबचा विकेटकीपर प्रभसिमरन सिंहची बेस प्राइस 20 लाख आहे. त्याला पंजाब किंग्सने 60 लाखामध्ये विकत घेतलं आहे.

अनकॅप्ड खेळाडूंमध्ये दिल्लीकडून खेळणाऱ्या अनुज रावतला RCB ने तब्बल 3.40 कोटी रुपयांना विकत घेतलं आहे. SRH आणि RCB मध्ये अनुजसाठी चुरस दिसून आली.

अनकॅप्ड विकेटकिपरमध्ये केएस भरतला दिल्ली कॅपिटल्सने दोन कोटीमध्ये विकत घेतलं आहे. मागच्या सीजनमध्ये भरत RCB कडून खेळला होता.

हरप्रीत बराडला पंजाब किंग्सने 3.80 कोटी रुपयांना विकत घेतलं आहे.

KKR चा माजी ऑलराऊंडर कमलेश नागरकोटीवर दिल्ली कॅपिटल्सने विश्वास दाखवला आहे. त्याला 1.1 कोटींना विकत घेतलं आहे.

40 लाख बेस प्राइस असलेल्या हरयाणाचा ऑलराऊंडर राहुल तेवतियाला गुजरात टायटन्सने तब्बल 9 कोटी रुपयांची बोली लावून विकत घेतलं.

कोलकाता नाईट रायडर्सने जलदगती गोलंदाज शिवम मावीसाठी 7.25 कोटी रुपयांची बोली लावत त्याला आपल्या ताफ्यात घेतलं.

अनकॅप्ड युवा खेळाडू शाहरुख खान पुन्हा एकदा प्रीती झिंटाच्या संघाकडून खेळताना दिसेल. 9 कोटी रुपयांच्या बोलीवर पंजाब किंग्सने त्याला आपल्या संघात सामावून घेतलं.

युवा अनकॅप्ड खेळाडू अभिषेक शर्मासाठी अनेक संघांनी बोली लावल्या, गुजरात पंजाबसह सनरायझर्स हैदराबामध्ये झालेल्या या बिडींग वॉरमध्ये एसआरएचने बाजी मारली. तब्बल 6.50 कोटी रुपयांच्या बोलीवर हैदराबादने त्याला आपल्या ताफ्यात घेतलं.

अष्टपैलू खेळाडू रियान परागसाठी राजस्थान रॉयल्स, सनरायझर्स हैदराबाद आणि गुजरात टायटन्समध्ये जोरदार बिडींग वॉर झालं. अखेर हे बिडींग वॉर राजस्थानने जिंकत आपल्या खेळाडूला पुन्हा एकदा संघात घेतलं आहे. आरआरने त्याच्यासाठी 3.80 कोटींची बोली लावली.

मधल्या फळीतला विश्वासू फलंदाज राहुल त्रिपाठीसाठी चेन्नई, कोलकाता आणि हैदराबाद संघांच्या फ्रँचायझींमध्ये मोठं बिडींग वॉर पाहायला मिळालं. अखेर हे वॉर हैदराबादने जिंकलं. हैदराबादने 8.50 कोटी रुपयांच्या बोलीवर राहुलला आपल्या संघात घेतलं.

बेबी एबी डीव्हिलियर्स या नावाने ओळखल्या जाणाऱ्या डिवॉल्ड ब्रेविससाठी पंजाब, मुंबई आणि चेन्नईमध्ये मोठं बिडींग वॉर पाहायला मिळालं. हे वॉर अखेर मुंबईने जिंकलं. 3 कोटी रुपयांच्या बोलीवर मुंबईने ब्रेविसला आपल्या ताफ्यात सामावून घेतलं.

युवा आणि अनकॅप्ड खेळाडू अभिनव सदारंगनीसाठी बिडींग वॉर पाहायला मिळालं. दिल्ली, कोलकाता, गुजरात या तिन्ही फ्रँचायझींनी अभिनवसाठी बोली लावली. यात गुजरातने हे बिडींग वॉर जिंकलं. 2.60 कोटींच्या बोलीवर गुजरातने अभिनवला आपल्या संघात घेतलं.

हैदराबादने 20 लाख रुपयांच्या बेस प्राईसमध्ये प्रियम गर्गला आपल्या ताफ्यात घेतलं.

भारतीय युवा खेळाडू रजत पाटीदार अनसोल्ड राहिला

भारतीय फिरकीपटू अमित मिश्रासाठी कोणत्याही फ्रँचायझीने बोली लावली नाही. हा खेळाडू अखेर अनसोल्ड राहिला.

भारतीय फिरकीपटू युजवेंद्र चहलला राजस्थान रॉयल्सने 6.5 कोटी रुपयांच्या बोलीवर आपल्या ताफ्यात घेतलं आहे.

5.25 कोटी रुपयांच्या बोलीवर पंजाब किंग्सने राहुल चाहरला आपल्या ताफ्यात सामावून घेतलं आहे. राजस्थान रॉयल्सने बराच वेळ राहुलसाठी बिडींग केलं.

इंग्लंडचा फिरकीपटू आदील रशीद, द. आफ्रिकेचा फिरकीपटू इम्रान ताहीर आणि अफगाणिस्तानचा फिरकीपटू मुजीब जादरान या तिघांवर कोणत्याही फ्रँचायझीने बोली लावली नाही. हे तिन्ही खेळाडू अनसोल्ड राहिले.

दिल्ली कॅपिटल्सने 2 कोटी रुपयांच्या बोलीवर भारताचा फिरकीपटू कुलदीप यादवला आपल्या संघात घेतलं. कुलदीपसाठी पंजाब किंग्सने बोली लावली होती.

दिल्ली कॅपिटल्सने 2 कोटी रुपयांच्या बेस प्राईसमध्ये बांगलादेशी जलदगती गोलंदाज मुस्तफिजूर रहमानला आपल्या संघात घेतलं.

आंतरराष्ट्रीय क्रिकेटमध्ये लॉर्ड या नावाने प्रसिद्ध असलेल्या जलदगती गोलंदाज शार्दुल ठाकूरवर आयपीएलच्या लिलावात पैशाचा पाऊस पडला. दिल्ली कॅपिटल्सने त्याला 10.75 कोटी रुपयांच्या बोलीवर आपल्या संघात घेतलं. ठाकूरसाठी दिल्ली, पंबाज आणि चेन्नई या तीन फ्रँचायझींमध्ये मोठी चुरस पाहायला मिळाली.

भुवनेश्वर कुमार पुन्हा एकदा ऑरेंज आर्मीकडून खेळताना दिसणार आहे. सनरायझर्स हैदाराबादने भुवनेश्वर कुमारसाटी 4.20 कोटी रुपयांची बोली लावत त्याला आपल्या ताफ्यात घेतलं.

7.50 कोटी रुपयांची बोली लावत लखनौ सुपरजायंट्सने मार्क वूडला आपल्या ताफ्यात घेततं. मुंबईने त्याचासाठी 7.25 कोटींची बोली लावली होती.

7.75 कोटी रुपयांची बोली लावत रॉयल चॅलेंजर्स बँगलोरने ऑस्ट्रेलियन जलदगती गोलंदाज जॉश हेजलवूडला आपल्या ताफ्यात घेतलं. मुंबईने त्याचासाठी 7.50 कोटींची बोली लावली होती.

लॉकी फर्ग्युसनसाठी 10 कोटी रुपयांची बोली लावत गुजरात टायटन्सने त्याला आपल्या ताफ्यात घेतलं.

भारतीय जलदगती गोलंदाज उमेश यादवसाठी कोणत्याही फ्रँचायझीने बोली लावली नाही. हा खेळाडू आजच्या दिवसासाठी अनसोल्ड राहिला.

जलदगती गोलंदाज प्रसिद्ध कृष्णासाठी राजस्थानने 10 कोटींची बोली लावत त्याला आपल्या संघात घेतलं. कृष्णा यंदाच्या लिलावातला दुसऱा सर्वात महागडा भारतीय गोलंदाज ठरला आहे.

मोठ्या बिडींग वॉरनंतर दीपक चाहरला चेन्नईने पुन्हा एकदा आपल्या ताफ्यात घेतलं आहे. चेन्नईने त्याच्यासाठी 14 कोटींची बोली लावली. दीपकसाठी दिल्ली, चेन्नई, राजस्थान आणि हैदराबाद या फ्रँचायझींमध्ये बिडींग वॉर पाहायला मिळालं.

टी. नटराजनवर सनरायझर्स हैदराबादने 4 कोटी रुपयांची बोली लावून त्याला आपल्या संघात घेतलं. त्याच्यासाठी गुजरात टायटन्सने बराच वेळ बिडींग केलं. मात्र हैदराबादने हे बिडींग वॉर जिंकलं.

निकोलस पूरन आजच्या दिवसातला तिसरा सर्वात महागडा खेळाडू ठरला आहे. 10.75 कोटी रुपयांच्या बोलीवर सनरायझर्स हैदराबादने त्याला आपल्या ताफ्यात घेतलं. कोलकाता नाईट रायडर्सने त्याच्यासाठी 10.50 कोटींपर्यंत बोली लावली. पर्समध्ये केवळ 20 कोटी रुपये असूनही कोलकात्याने पूरनसाठी बोली लावली.

सॅम बिलिंग्स या यष्टीरक्षक फलंदाजावर कोणत्याही फ्रँचायझीने बोली लावली नाही. हा खेळाडूदेखील आज अनसोल्ड राहिला.

भारताचा यष्टीरक्षक फलंदाज ऋद्धीमान साहा आजच्या दिवसात अनसोल्ड राहिला. कोणत्याही फ्रँचायझीने त्याच्यावर बोली लावली नाही.

दिनेश कार्तिकसाठी रॉयल चॅलेंजर्स बँगलोर आणि चेन्नई सुपरकिंग्समध्ये बिडींग वॉर पाहायला मिळालं. हे वॉर बँगलोरने जिंकलं. बँगलोरने 5.50 कोटी रुपयांमध्ये कार्तिंकला आपल्या संघात घेतलं.

इंग्लंडचा यष्टीरक्षक फलंदाज जॉनी बेअरस्टो पंजाब किंग्सकडून खेळताना दिसणार आहे. पंजाबने 6.75 कोटी रुपये खर्चून बेअरस्टोला आपल्या संघात घेतलं.

इशान किशनसाठी मुंबई इंडियन्सने आयपीएल इतिहासातली सर्वात मोठी बोली लावली आहे. मुंबईने 15.25 कोटी रुपयांच्या बोलीवर इशान किशनला आपल्या ताफ्यात घेतलं. किशनसाठी पंजाब, हैदराबाद आणि राजस्थानने मोठमोठ्या बोली लावल्या, अखेर हे बिडींग वॉर मुंबईने जिंकलं.

अंबाती रायुडू पुन्हा एकदा पिवळ्या जर्सीत दिसणार आहे. चेन्नई सुपर किंग्सने 6.75 कोटी रुपयांच्या बोलीवर त्याला आपल्या ताफ्यात सामावून घेतलं. रायुडूसाठी हैदराबाद आणि दिल्लीनेही बराच वेळ बोली लावली. अखेर ही बोली चेन्नईने जिंकली.

नुकत्याच पार पडलेल्या टी-20 वर्ल्डकपमध्ये सेमीफायनल सामन्यात शाहीन आफ्रिदीला सलग चार षटकार ठोकून ऑस्ट्रेलियाला फायनलमध्ये पोहोचवणाऱ्या यष्टीरक्षक फलंदाज मॅथ्यू वेडसाठी कोणत्याही फ्रँचायझीने बोली लावली नाही. हा खेळाडू आज अनसोल्ड राहिला.

अफगाणिस्तानचा माजी कर्णधार आणि अष्टपैलू खेळाडू मोहम्मद नबीवर कोणत्याही फ्रँचायझीने बोली लावली नाही. त्यामुळे हा खेळाडू आज अनसोल्ड राहिला.

नुकत्याच पार पडलेल्या टी-20 वर्ल्डकपच्या अंतिम सामन्यात सामनावीर ठरलेला ऑस्ट्रेलियाचा अष्टपैलू खेळाडू मिचेल मार्श याला दिल्ली कॅपिटल्सने आपल्या ताफ्यात घेतलं. दिल्लीने त्याच्यासाठी 6.50 कोटी रुपयांची बोली लावली. हैदराबादने या खेळाडूसाठी 6.25 कोटींची बोली लावली होती.

लखनौ सुपरजायंट्सने 8.25 कोटी रुपयांच्या बोलीवर अष्टपैलून कृणाल पंड्याला आपल्या ताफ्यात घेतलं. हैदराबाद, चेन्नई आणि गुजरात या फ्रँचायझींनी कृणालवर बोली लावल्या अखेर लखनौने बोली जिंकली. विशेष म्हणजे मुंबई इंडियन्सने कृणाल पंड्यावर बोली लावली नाही. कृणाल गेली अनेक वर्ष मुंबईकडून खेळत होता.

सनरायझर्स हैदराबादने आज आपला पहिला खेळाडू खरेदी केला आहे. फ्रँचायझीने 8.75 कोटींच्या बोलीवर अष्टपैलू खेळाडू वॉशिंग्टन सुंदरला आपल्या संघात घेतलं.

10.75 कोटी रुपयांच्या बोलीवर रॉयल चॅलेंजर्स बँगलोरने वानिंदू हसरंगाला आपल्या ताफ्यात घेतलं. तो दिवसभरातला दुसरा सर्वात महागडा खेळाडू ठरला. पहिल्या सत्रात श्रेयस अय्यरसाठी कोलकात्याने 12.25 कोटी रुपयांची बोली लावली होती.

बांगलादेशचा अष्टपैलू खेळाडू शाकिब अल हसनसाठी कोणत्याही फ्रँचायझीने बोली लावली नाही. त्यामुळे शाकिब अनसोल्ड राहिला.

आयपीएल 2021 मधील पर्पल कॅप होल्डर हर्षल पटेलसाठी रॉयल चॅलेंजर्स बँगलोरने 10.75 कोटींची बोली लावत त्याला आपल्या संघात घेतलं.

वेस्ट इंडिंजचा अष्टपैलू खेळाडू जेसन होल्डरसाठी लखनौ सुपरजायंट्सने 7.75 कोटी रुपयांची बोली लावत त्याला आपल्या संघात घेतलं. होल्डरसाठी चेन्नई सुपरकिंग्सनेदेखील मोठी बोली लावली होती.

8 कोटी रुपयांच्या बोलीवर कोलकाता नाईट रायडर्सने नितीश राणाला आपल्या संघात परत घेतलं.

वेस्ट इंडिजचा खेळाडू ड्र्व्हेन ब्राव्हो चेन्नई सुपरकिंग्समध्ये कायम राहील. 4.40 कोटी रुपयांच्या बोलीवर चेन्नईने त्याला संघात घेतलं.

भारतीय अष्टपैलू खेळाडू दीपक हुडासाठी लखनौ सुपरजायंट्सने 5.75 कोटी रुपयांची बोली लावत त्याला आपल्या संघात घेतलं.

किलर मिलर म्हणून ओळखला जाणारा द. आफ्रिकेचा क्रिकेटपटू डेव्हिड मिलर आणि ऑस्ट्रेलियाचा माजी कर्णधार स्टिव्ह स्मिथ हे दोन्ही खेळाडू अनसोल्ड राहिले.

युवा क्रिकेटपटू देवदत्त पडीक्कलसाठी राजस्थान रॉयल्सने 7.75 कोटी रुपयांची बोली लावत त्याला आपल्या ताफ्यात घेतलं. मुंबईने त्याच्यावर 7.50 कोटी रुपयांची बोली लावली होती.

एके काळी मिस्टर आयपीएल म्हणून ओळखल्या जाणाऱ्या सुरेश रैनावर कोणत्याही संघाने बोली लावली नाही. त्याची बेस प्राईस 2 कोटी रुपये होती. चेन्नई सुपरकिंग्सनेदेखील रैनासाठी इंटरेस्ट दाखवला नाही.

गुजरात टायटन्सने 2 कोटी रुपयांच्या बोलीवर जेसन रॉयला आपल्या संघात घेतलं. कोणत्याही संघाने जेसन रॉयसाठी बोली लावली नाही. अखेर गुजरात टायटन्सने दोन कोटींच्या बोलीवर त्याला आपल्या ताफ्यात घेतलं

चेन्नईने 2 कोटी रुपयांच्या बोलीवर रॉबिन उथप्पाला आपल्या संघात घेतलं. उथप्पावर कोणत्याही संघाने बोली लावली नाही. अखेर चेन्नईने आपल्या खेळाडूला संघात परत घेतलं.

राजस्थान रॉयल्सने 8.50 कोटी रुपयांच्या बोलीवर शिमरन हेटमायरला आपल्या ताफ्यात घेतलं.

लखनौ सुपरजायंट्सने 4.60 कोटी रुपयांच्या बोलीवर मनिष पांडेला आपल्या ताफ्यात घेतलं. सुरुवातीला सनरायझर्स हैदाराबाद आणि नंतर दिल्ली कॅपिटल्सने त्याच्यावर बोली लावली. अखेरी यात लखनौच्या विजय झाला.

डेव्हिड वॉर्नरवर दिल्ली कॅपिटल्सने 6.25 कोटी रुपयांची बोली लावली. त्यामुळे पृथ्वी शॉला सलामीचा जोडीदार मिळाला आहे.

लखनौ या नव्या फ्रँचायझीने 6.75 कोटी रुपयांच्या बोलीवर क्विटंन डीकॉकला आपल्या संघात घेतलं. डीकॉक याआधी मुंबईकडून खेळायचा मुंबईने डीकॉकवर 5 कोटी रुपयांपर्यंत बोली लावली होती. मात्र डीकॉक आता केएल राहुलसोत लखनौसाठी सलामीला उतरणार आहे.

7 कोटी रुपयांच्या बोलीवर रॉयल चॅलेंजर्स बँगलोरने फाफ डुप्लेसीला आपल्या ताफ्यात सामावून घेतलं.

गुजरात टायटन्सने 6.25 कोटी रुपयांच्या बोलीवर मोहम्मद शमीला आपल्या ताफ्यात घेतलं. बँगलोरने शमीवर 6 कोटी रुपयांपर्यंत बोली लावली होती.

कोलकाता नाईट रायडर्सने 12.25 कोटी रुपयांच्या बोलीवर श्रेयस अय्यरला आपल्या ताफ्यात घेतलं. कदाचित अय्यरकडे कोलकात्याचं नेतृत्व सोपवलं जाऊ शकतं.

राजस्थान रॉयल्सने न्यूझीलंडचा वेगवान गोलंदाज ट्रेंट बोल्टवर सर्वात मोठी 8 कोटी रुपयांची बोली लावत त्याला आपल्या संघात घेतलं. बोल्टवर मुंबईने 7.75 कोटी रुपयांची बोली लावली होती. मात्र राजस्थानने अखेर मुंबईचा खेळाडू आपल्याकडे घेतला.

9.25 कोटी रुपयांच्या बोलीवर पंजाब किंग्सने कगिसो रबाडाला आपल्या ताफ्यात सामावून घेतलं.

कोलकाता नाईट रायडर्सने पॅट कमिन्सवर 7.25 कोटींची बोली लावत त्याला आपल्या संघात घेतलं. गेल्या वर्षी त्याच्यावर कोलकात्याने 15 कोटींची बोली लावली होती. कमिन्स आता पुन्हा एकदा कोलकात्याकडून खेळणार आहे.

राजस्थान रॉयल्सने 5 कोटींच्या बोलीवर रवीचंद्रन अश्विनला आपल्या संघात घेतलं. अश्विन आणि जॉस बटलर यंदा एकाच संघाकडून खेळणार आहेत.

पंजाब किंग्सने 8.25 कोटी रुपयांच्या बोलीवर शिखर धवनला आपल्या संघात घेतलं आहे. धवनसाठी दिल्लीने 8 कोटींपर्यंत बोली लावली. अखेर गेल्या वर्षी दिल्लीकडून खेळलेला धवन यंदा पंजाबकडून खेळणार आहे.

दिल्ली कॅपिटल्सचा माजी सलामीवीर शिखर धवनपासून आयपीएलच्या लिलावाला सुरुवात झाली आहे.

Tata IPL 2022 Acution च्या पहिल्या दिवसाच्या अॅक्शनला काही वेळातच सुरुवात होत आहे. सर्व संघ सज्ज झाले असून स्टेजही सजले आहे.

IPL च्या 15 व्य़ा सीजनसाठी आज बंगळुरुमध्ये मेगा ऑक्शन होत आहे. आयपीएलमध्ये यंदा आठ ऐवजी दहा संघ आहेत. एकूण 600 खेळाडूंवर बोली लागेल. आज 161 खेळाडूंवर बोली लागेल.

IPL 2022 मेगा ऑक्शनसाठी सर्वच संघ उत्साहित आहेत. सर्वच टीम्स सोशल मीडियावर सक्रिय आहेत. राजस्थान रॉयल्सच्या CEO ने एक मजेदार टि्वट केलं आहे. चित्रपटातल्या लाइन्सवरुन त्यांनी दुसऱ्या संघांनाही संदेश दिला आहे.