आशिया कप जिंकलेल्या श्रीलंकन महिला संघावर ओढावली नामुष्की, दुबळ्या आयर्लंडने मालिकेत पाजलं पराभवाचं पाणी

श्रीलंका आणि आयर्लंड वुमन्स संघात तीन सामन्यांची वनडे मालिका सुरु आहे. या मालिकेतील दोन सामन्यातच निकाल लागला आहे. सुरुवातीचे दोन सामने जिंकत आयर्लंडने मालिका 2-0 ने खिशात घातली आहे. पहिला सामन्यात नाणेफेकीचा कौल आयर्लंडच्या बाजूने लागला आणि प्रथम गोलंदाजी घेतली. श्रीलंकेने 50 षटकात 8 गडी गमवून 260 धावा केल्या आणि विजयासाठी 261 धावांचं आव्हान दिलं होतं. हे आव्हान आयर्लंडने 3 गडी आणि 4 चेंडू राखून पूर्ण केलं. दुसऱ्या वनडे सामन्यात श्रीलंकेने टॉस जिंकला आणि प्रथम गोलंदाजी स्वीकारली. आयर्लंडने 50 षटकात 5 गडी गमवून 255 धावा केल्या आणि विजयासाठी 256 धावांचं आव्हान दिलं. पण श्रीलंकेचा संपूर्ण 48 षटकात 240 करून बाद झाला. हा सामना आयर्लंडने 15 धावांनी जिंकला. यासह आयर्लंडने श्रीलंकेविरुद्ध पहिली वनडे मालिका जिंकली आहे. 20 ऑगस्टला होणारा तिसरा वनडे सामना हा केवळ औपचारिक असणार आहे.

दुसऱ्या वनडे सामन्यात हर्षिता समरविक्रमा आणि कविशा दिल्हारी वगळता एकही बॅटर तग धरू शकला नाही. हर्षिताने 124 चेंडत 11 चौकारांच्या मदतीने 105 धावा केल्या. मात्र तिची ही शतकी खेळी व्यर्थ गेली. तर कविशा दिल्हारीने 71 चेंडूत 1 षटकार आणि 1 चौकाराच्या मदतीने 53 धावा केल्या. पण या दोघींव्यतिरिक्त एकही बॅटर तग धरू शकला नाही. आयर्लंडकडून अर्लेने केलीने 3, जेन माग्युरेने 2, एमी माग्युरेने 1 आणि फ्रेया सर्जंटने 1 विकेट घेतली. तिसरा सामना 20 ऑगस्टला होणार आहे. हा सामना औपचारिक असणार आहे. त्यामुळे सामना जिंकला काय आणि हरला काय? त्याचा काही एक फरक मालिकेवर फरक पडणार नाही. श्रीलंकेने नुकताच अंतिम फेरीत भारताला पराभूत करून जेतेपदावर नाव कोरलं होतं.

दोन्ही संघांची प्लेइंग 11

आयर्लंडचा संघ: साराह फोर्ब्स, कॉल्टर रेली, अमी हंटर, ऑर्ला प्रेंडरगास्ट (कर्णधार), लिह पॉल, रिबेका स्टोकेल, अर्लेने केली, जेन माग्युरे, एमी माग्युरे, एलना डलझेल, फ्रेया सर्जंट

श्रीलंकेचा संघ : विश्मी गुनरत्ने, चमारी अटापट्टू (कर्णधार), हर्षिथा समरविक्रमा, कविशा दिल्हारी, अनुष्का संजीवनी, हसिनी परेरा, निलाक्षी डिसिल्वा, सचिनी निसन्सला, सुगंदिका कुमारी, अचिनी कुलासुरिया, उदेशिका प्रबोधिनी