मास्टर ब्लास्टर सचिन तेंडुलकरचा मुलगा अर्जुन तेंडुलकर या ना त्या कारणाने कायम चर्चेत असतो. अर्जुन तेंडुलकर पुन्हा एकदा त्याच्या कामगिरीमुळे चर्चेत आला आहे. त्याच्या गोलंदाजीची धार पुन्हा एकदा क्रीडारसिकांना अनुभवता आली. कर्नाटकमध्ये डॉक्टर के थिमाप्पिया मेमोरियन स्पर्धा सुरु आहे. या स्पर्धेत अर्जुन तेंडुलकर गोवा संघाकडून मैदानात उतरला आहे. केएससीए इलेव्हनविरुद्धच्या सामन्यात अर्जुन तेंडुलकरने भेदक गोलंदाजी केली. त्याच्या गोलंदाजीमुळे गोवा संघाने एक डाव आणि 189 धावांनी विजय मिळवला. अर्जुन तेंडुलकरने गोवा क्रिकेट असोसिएशनसाठी एकूण 9 विकेट घेतले. पहिल्या डावात पाच गडी बाद केले आणि दुसऱ्या डावात 4 चार गडी बाद करत एकूण 9 विकेट घेतले. अर्जुनच्या भेदक गोलंदाजीचा सामना करताना केएससीए इलेव्हन संघ पुरता हतबल झाल्याचं पाहायला मिळालं. पहिल्या डावात 41 धावा देत त्याने पाच गडी बाद केले. विशेष म्हणजे आघाडीच्या पाच फलंदाजांपैकी चार फलंदाजांना तंबूत पाठवलं. तसेच अक्षन रावची विकेट घेत पाच विकेट पूर्ण केल्या.
केएससीए इलेव्हन संघ पहिल्या डावात फक्त 103 धावा करू शकला. प्रत्युत्तरात गोवा क्रिकेट असोसिएशनने पहिल्या डावात 413 धावांची खेळी केली. यात अभिनव तेजरानाने 109 धावांची खेळी केली. तसेच मंथन खुटकरने 69 धावा केल्या. तर अर्जुन तेंडुलकरचं 18 धावांचं योगदान राहिलं. त्यामुळे गोवा क्रिकेट असोशिएशनकडे 310 धावांची मजबूत आघाडी आली. दुसऱ्या डावात या धावांचा पाठलाग करताना केएससीए इलेव्हन फक्त 121 धावांवर सर्वबाद झाली. या डावात अर्जुन तेंडुलकरने 55 धावा देत 4 विकेट घेतल्या. अर्जुन तेंडुलकरने आपल्या कामगिरीचा व्हिडीओ इंस्टाग्रामवर पोस्ट केला आहे.
arjun tendulkar 5 wicket hall for goa DR (CAPT) K THIMMAPPIAH MEMORIAL TOURNAMENT – 2024-25 #arjuntendulkar pic.twitter.com/Uv66lbYTJm
— ANOOP DEV (@AnoopCricket) September 16, 2024
पुढच्या महिन्यात रणजी ट्रॉफी स्पर्धा सुरु होणार आहे. हे पर्व अर्जुन तेंडुलकरसाठी खूपच महत्त्वाचं आहे. त्यामुळे या स्पर्धेपूर्वी अर्जुन तेंडुलकरला आपला फॉर्म दाखवावा लागेल. तरच पुढच्या स्पर्धेचा मार्ग मोकळा होईल. अर्जुन तेंडुलकरने फर्स्ट क्लास क्रिकेट करिअरमध्ये 13 सामने खेळले असून 21 विकेट घेतल्या आहेत. तसेच फलंदाजीतही अर्जुनने कमाल केली आहे. अर्जुन तेंडुलकरने रणजी ट्रॉफीत एक शतक ठोकलं असून 481 धावा केल्या आहेत.