Suryakumar Yadav: वनडे फॉर्मेटपासून दूर, सूर्यकुमारकडून खंत व्यक्त, म्हणाला….

Suryakumar Yadav indian cricket team

टीम इंडियाने दक्षिण आफ्रिकेला पराभूत करत आयसीसी टी 20 वर्ल्ड कपवर आपलं नाव कोरलं. सूर्यकुमार यादव याने अप्रतिम रिले कॅच घेत भारताला विश्व विजेता करण्यात निर्णायक भूमिका बजावली. त्यानंतर रोहित शर्मा याच्या निवृत्तीनंतर सूर्यकमार यादवला टी 20 फॉर्मेटचा पूर्ण वेळ कर्णधार म्हणून नियुक्त करण्यात आलं. सूर्याने आपल्या नेतृत्वातील पहिल्या टी20i मालिकेत भारकाला श्रीलंकेविरुद्ध 3-0 असा क्लीन स्वीपने विजय मिळवून दिला. मात्र सूर्याची श्रीलंके विरुद्धच्या एकदिवसीय मालिकेत निवड करण्यात आली नाही. सूर्याने आता त्यावरुन मनातली खदखद बोलून दाखवलीआहे.

सूर्यकुमार यादव काय म्हणाला?

सूर्यकुमार यादव आता सरफराज खान याच्या नेतृत्वात बूची बाबू स्पर्धेत मुंबईचं प्रतिनिधित्व करणार आहे. या स्पर्धेआधी सुर्यकुमार यादवने टाईम्स ऑफ इंडियाशी संवाद साधला. सूर्या या दरम्यान खूप काही बोलला. सूर्याने या दरम्यान टीम इंडियासाठी तिन्ही फॉर्मेटमध्ये खेळण्याची इच्छा व्यक्त केली. सूर्या सध्या टी 20 फॉर्मेटमध्ये खेळतोय. सूर्याने आतापर्यंत फक्त 1 कसोटी तर 37 एकदिवसीय सामने खेळले आहेत.

“मी भारतासाठी तिन्ही फॉर्मेटमध्ये खेळू इच्छितो. तसेच बूची बाबू स्पर्धेत खेळल्याने माझा कसोटी क्रिकेटसाठी आवश्यक सराव होईल”, असा आशावाद सूर्यकुमारने टीओआयसोबत बोलताना व्यक्त केला.

सूर्याचं कसोटीत कमबॅक करण्याचं लक्ष्य

सूर्यकुमारची टी20i कर्णधारपदी नियुक्ती झाली आहे. त्यामुळे सूर्या आता टी 20i संघात असणार हे निश्चित झालं आहे. मात्र सूर्याला अद्याप कसोटी आणि एकदिवसीय संघात आपलं स्थान निश्चित करण्यात यश आलेलं नाही. सूर्याने 37 वनडेमध्ये 773 धावा केल्या आहेत. तर एकमेव कसोटी सामन्यात त्याला केवळ 8 धावांपर्यंतच पोहचता आलं आहे. तर टी20i मधील 71 सामन्यात सूर्याने 2 हजार 432 धावा केल्या आहेत.

बूची बाबू स्पर्धेबाबत थोडक्यात

दरम्यान बूची बाबू स्पर्धेला 15 ऑगस्टपासून सुरुवात होणार आहे. तर 11 सप्टेंबरला स्पर्धेची सांगता होणार आहे. या स्पर्धेतू लोकल बॉल सरफराज खान हा मुंबईचं नेतृत्व करणार आहे.