मोहम्मद सिराजच्या ‘त्या’ मेसेजचा अर्थ काय? क्रिकेटविश्वात रंगली जोरदार चर्चा

मोहम्मद सिराजच्या इन्स्टास्टोरीमागचं गूढ काय? सोशल मीडियावर तर्कवितर्कांना उधाण

मुंबई : वनडे वर्ल्डकप स्पर्धेतील पराभवानंतर टीम इंडियात बरीच उलथापालथ सुरू आहे. पण नेमकं काय सुरु आहे? कोणाच्या मनात काय चाललंय याचा थांगपत्ता लागत नाही. क्रिप्टिक मेसेजमुळे गेल्या काही दिवसांपासून तर्कवितर्कांना उधाण आलं आहे. जसप्रीत बुमराहने आयपीएल ट्रेड विंडोनंतर एक क्रिप्टिक मेसेज टाकला होता. त्यात त्याने कधी कधी गप्प बसणं चांगलं असतं असं लिहिलं होतं. त्याचा थेट संबंध त्यानंतर मुंबई इंडियन्सचा कर्णधार हार्दिक पांड्याशी जोडला जात आहे. मुंबईने गुजरातशी ट्रेड करून हार्दिक पांड्याला ताफ्यात घेतलं. तसेच रोहित शर्माकडून कर्णधारपदाची जबाबदारी काढून त्याच्याकडे दिली. आता असाच काहीसा मेसेज रॉयल चॅलेंजर्स बंगळुरुच्या मोहम्मद सिराजने टाकला आहे. पण त्या मागचा नेमका अर्थ कुणालाच कळलेला नाही. त्यात हृदय तुटल्याच्या पाच इमोजी आहेत.  आयपीएल लिलावाबाबत नाराजी किंवा भविष्यात काहीतरी मोठी घडामोड आरसीबीत संघात होऊ शकते असा अंदाज वर्तवला जात आहे.

आयपीएल लिलावात ऑस्ट्रेलियन खेळाडूंवर भरभरून पैशांची उधळण झाली. आजवरचे सर्व रेकॉर्ड मोडीत निघाले. मिचेल स्टार्कला 24.75 कोटी, तर पॅट कमिन्सला 20.50 कोटी रुपयांची रक्कम मिळाली. तर दुसरीकडे भारतीय स्टार खेळाडूंना हवा तसा भाव मिळाला नाही. त्यामुळे मोहम्मद सिराजने नाराजी व्यक्त केली असावी असा अंदाज क्रीडाप्रेमी सोशल मीडियावर व्यक्त करत आहेत. आरसीबीने आपल्या संघात फारसा बदल केलेला नाही. सहा खेळाडूंना विकत घेतलं. त्यात मागच्या पर्वात मुंबईकडून खेळलेल्या कॅमरून ग्रीनचा समावेश आहे.

सोशल मीडियावर मोहम्मद सिराजच्या पाच इमोजींचा अर्थ वेगवेगळ्या पद्धतीने लावला जात आहे. एका युजर्सने तर पाच इमोजीची तुलना विराटच्या नावातील पाच अक्षरांशी करून हा मेसेज असावं असं सूचित केलं आहे. तर दुसऱ्या युजर्सने मिश्किलपणे लिहिलं आहे की, सिराजला आरसीबीचं कर्णधारपद हवं आहे. त्यामुळे आता या इन्स्टास्टोरीवर काही दिवस चर्चा रंगणार यात शंका नाही. सिराजने याचा खुलासा केला तर चर्चांना पूर्णविराम लागेल. अन्यथा भविष्यात एखादी मोठी घडामोड घडली तर त्याचा संबंध या क्रिप्टिक मेसेजशी जोडला जाईल.

रॉयल चॅलेंजर्स बंगळुरु | फाफ डु प्लेसीस (कर्णधार), विराट कोहली, ग्लेन मॅक्सवेल, दिनेश कार्तिक, सुयश प्रभुदेसाई, रजत पाटीदार, अनुज रावत, विल जॅक्स, महिपाल लोमरोर, कर्ण शर्मा, मनोज भंडागे, मयंक डागर, कैमरून ग्रीन, विशक विजय कुमार, आकाश दीप, मोहम्मद सिराज, रीस टॉपली, हिमांशु शर्मा, टॉम करन, लॉकी फर्ग्युसन, स्वप्निल सिंह, राजन कुमार, अल्झारी जोसेफ, यश दयाल आणि सौरव चौहान.