आर अश्विन निवृत्तीनंतर काय करणार? रोहित शर्माने पत्रकार परिषदेत केलं सर्वकाही उघड

भारत आणि ऑस्ट्रेलिया कसोटी मालिका रंजक वळणावर आली आहे. तीन कसोटी सामन्यानंतर मालिकेत 1-1 अशी बरोबरी आहे. कारण तिसरा कसोटी सामना ड्रॉ झाला आहे. त्यामुळे दोन्ही संघांची मालिकेत आघाडी मिळवण्याची संधी हुकली आहे. असं असताना तिसरा कसोटी सामना संपता संपता आर अश्विनने क्रीडारसिकांना धक्का दिला आहे. कोणाच्या ध्यानीमनी नसताना निवृत्तीची घोषणा केली आहे. त्यामुळे गाबा कसोटी सामना त्याच्या आंतरराष्ट्रीय कारकिर्दिचा शेवट ठरला आहे.पण आर अश्विनचा रिटायरमेंटनंतरचा प्लान काय? याबाबत अनेकांना प्रश्न पडला आहे. दरम्यान, रोहित शर्मा आणि आर अश्विन एकत्रितपणे पत्रकार परिषदेला सामोरे गेले. यावेळी पत्रकारांनी क्रीडाप्रेमींच्या मनातला प्रश्न विचारला. रोहित शर्माच्या बोलण्याची शैली सर्वांनाच माहिती आहे. पत्रकारांच्या या प्रश्नावर त्याने मिश्किल उत्तर दिलं आणि एकच हास्यस्फोट झाला. ‘आर अश्विन पुढे पत्रकारही होऊ शकतो.’, असं रोहित शर्मा म्हणाला.

‘आर अश्विन येणाऱ्या एक दोन वर्षात तुमच्यासोबत बसलेला असेल. तेव्हा त्याच्याशी चर्चा होत राहील.’, हे उत्तर ऐकून पत्रकार हसू लागले. रोहित शर्माने पत्रकार परिषदेत स्पष्ट केलं की, आर अश्विन टीमसोबत नसेल आणि 19 डिसेंबरला भारतात जाणार आहे. त्यानंतर रोहित शर्माला पुजारा, रहाणे आणि अश्विनच्या वेगवेगळ्या भूमिकांबाबत काय वाटतं असं विचारलं. तेव्हा रोहित शर्मा हसतच म्हणाला की, ‘अरे भावा, फक्त अश्विनने निवृत्तीची घोषणा केली आहे. तुम्ही तर माझा जीव घ्याल. ते दोघे (रहाणे-पुजारा) सक्रिय आहेत आणि कधीही येऊ शकतात.’

रोहित शर्माने पुढे सांगितलं की, अजिंक्य रहाणे मुंबईत राहतो आणि मी त्याला भेटत असतो. पुजारा राजकोटमध्ये राहतो म्हणून त्याची माझी इतकी भेट होत नाही. पण क्रिकेटच्या एखाद्या कार्यक्रमात आम्ही नक्की भेटतो. दुसरीकडे आर अश्विनने निवृत्तीबाबत म्हणाला की, ‘मी जास्त वेळ घेणार नाही. आज माझ्या क्रिकेट कारकि‍र्दीचा शेवटचा दिवस आहे. माझ्यात अजूनही क्रिकेट खेळण्याचा जोश आहे. पण मी आता क्लब स्तरावर याचं प्रदर्शन करेल.’ आर अश्विन आयपीएल 2025 स्पर्धेत चेन्नई सुपर किंग्सकडून खेळणार आहे.