ICC World Cup 2019 : वर्ल्डकपसाठी भारतीय संघाची 15 एप्रिलला घोषणा

ICC World Cup 2019 मुंबई : आयसीसीच्या वन डे विश्वचषकासाठी येत्या 15 एप्रिलला भारतीय संघाची (Indian squad for Cricket World Cup 2019) घोषणा करण्यात येणार आहे. एकदिवसीय विश्वचषकाला 30 मेपासून इंग्लंडमध्ये सुरुवात होत आहे. भारताचा पहिला सामना 5 जून रोजी दक्षिण आफ्रिकेविरुद्ध होणार आहे. तर 16 जून रोजी भारत विरुद्ध पाकिस्तान हा महामुकाबला रंगणार आहे.

सुप्रीम कोर्टाने नियुक्त केलेल्या प्रशासकांच्या समितीने 15 एप्रिलला भारतीय संघाची घोषणा करण्याचा निर्णय घेतला. भारतीय संघनिवडीची शेवटची तारीख 23 एप्रिल होती, मात्र आता आठ दिवस आधीच म्हणजे 15 एप्रिलला भारताचा 15 सदस्यीय वर्ल्ड कप संघ जाहीर केला जाईल.  आतापर्यंत केवळ न्यूझीलंडनेच वर्ल्डकपसाठी संघाची घोषणा केली आहे.

दरम्यान, यंदापासून वर्ल्डकपमध्ये एक टीम सर्व संघांसोबत सामने खेळणार आहे. या फेरीनंतर पहिले चार संघ सेमीफायनलमध्ये प्रवेश करतील. अंतिम सामना 14 जुलैला खेळवण्यात येईल.

दरम्यान, 1983 आणि 2011 चा विश्वचषक जिंकलेल्या टीम इंडियात कोणत्या 15 खेळाडूंना स्थान मिळणार याबाबत उत्सुकता आहे. भारतीय संघातील बहुतेक खेळाडूंची नावं निश्चित झाली आहेत, मात्र चौथ्या क्रमांकावर कोण याबाबत संघव्यवस्थापनाला डोकेदुखी आहे.

चौथ्या क्रमांकावर कोण?
दरम्यान, चौथ्या क्रमांकासाठी भारतीय संघात कुणाला संधी मिळते याबाबत उत्सुकता आहे. चौथ्या नंबरसाठी अनुभवी विकेटकीपर फलंदाज दिनेश कार्तिक, अंबाती रायुडू, के एल राहुल आणि विकेटकीपर ऋषभ पंत यांच्यात चुरस आहे. त्यामुळे संघ व्यवस्थापन कोणाला संधी देणार हे पाहणं महत्त्वाचं आहे.

भारताचा संभाव्य संघ

विराट कोहली (कर्णधार), रोहित शर्मा (उपकर्णधार), शिखर धवन, अंबाती रायुडू, केदार जाधव, महेंद्रसिंह धोनी, हार्दिक पंड्या, जसप्रीत बुमराह, मोहम्मद शमी, यजुवेंद्र चहल, कुलदीप यादव, विजय शंकर, भुवनेश्वर कुमार, केएल राहुल आणि रिषभ पंत

46 दिवसात 48 सामने

दरम्यान, यंदा विश्वचषकाच्या 46 दिवसांत तब्बल 48 सामने होणार आहेत. गतविजेता ऑस्ट्रेलियाचा पहिला सामना 1 जून रोजी अफगाणिस्तानविरुद्ध आहे.

भारतीय संघात कोणाकोणाला स्थान मिळू शकतं? तुमचा संघ कमेंट बॉक्समध्ये लिहा.