IPL 2021: विराट कोहलीच्या RCB ला झटका, सलामीवीराला कोरोनाची लागण

Devdutt Padikkal

चेन्नई : आयपीएलच्या 14 व्या (IPL 2021) हंगामाला केवळ पाच दिवस शिल्लक आहेत, पण या लीगवरील कोरोनाचा धोका संपण्याचं नाव घेत नाही. चेन्नई सुपर किंग्ज, कोलकाता नाईट रायडर्स, दिल्ली कॅपिटल्सनंतर आता विराट कोहलीच्या (Virat Kohli) रॉयल चॅलेंजर्स बंगळुरू (Royal Challengers Bangalore) संघालादेखील कोरोनाचा फटका बसला आहे. आरसीबीचा स्टार युवा फलंदाज देवदत्त पडिक्कल (Devdutt Padikkal) याला कोरोनाची लागण झाली आहे. त्यामुळे देवदत्तला उर्वरित संघापासून वेगळे करत आयसोलेट करण्यात आले आहे. (IPL 2021: Devdutt Padikkal becomes third cricketer to contract COVID-19)

आरसीबीचा पहिला सामना गतविजेत्या मुंबई इंडियन्स (Mumbai Indians) विरुद्ध खेळवला जाणार आहे. हा सामना 9 एप्रिल रोजी चेन्नईत खेळवला जाणार आहे. पण आता देवदत्तचे त्या सामन्यात खेळणे कठीण झाले आहे. आयपीएलच्या गेल्या हंगामात देवदत्त आरसीबीसाठी एक मोठा स्टार खेळाडू म्हणून समोर आला होता. टॉप ऑर्डरमध्ये फलंदाजी करताना त्याने चमकदार कामगिरी केली होती. आरसीबीला प्लेऑफमध्ये पोहोचवण्यात देवदत्तचा मोठा वाटा होता. त्याला कोरोनाची लागण झाल्याने संघासमोर नवी अडचण निर्माण झाली आहे.

पडिक्कलला आयसोलेट

पडिक्कलला कोरोनाची लागण झाल्याचे निदर्शनास येताच त्याला विलगीकरण कक्षात ठेवण्यात आले आहे. बँगलोरचा संघ सध्या चेन्नईमध्ये असून पहिल्या आयपीएलमधील पहिल्या सामन्याची तयारी करत आहे. स्पर्धेतील पहिला सामना आरसीबी आणि मुंबई इंडियन्स या संघांमध्ये खेळवला जाणार आहे. आरसीबीच्या सूत्रांनी दिलेल्या माहितीनुसार पहिल्या दोन सामन्यात देवदत्तचे खेळणे फार अवघड आहे. गेल्या हंगामात आयपीएलमध्ये पदार्पण करणाऱ्या पडिक्क्कलने आपल्या फलंदाजीने सर्वांना प्रभावित केले आणि आरसीबीकडून सर्वाधिक धावा केल्या. देवदत्त पडिक्क्कलने गेल्या हंगामात आयपीएलमध्ये त्याच्या कारकीर्दीची सुरुवात केली होती.

अक्षर पटेलदेखील कोरोनाबाधित

दरम्यान, काल (3 एप्रिल) दिल्ली कॅपिटल्सचा अष्टपैलू खेळाडू अक्षर पटेलला कोरोनाची लागण झाल्याचे निदर्शनास आले होते. दिल्ली कॅपिटल्सचा संघ आपला पहिला सामना 10 एप्रिल रोजी मुंबईत खेळणार आहे. त्याचबरोबर कोलकाता नाईट रायडर्सचा खेळाडू नितीश राणाचा कोरोनो रिपोर्टही पॉझिटिव्ह आला होता. परंतु त्यानंतर त्याचा रिपोर्ट निगेटिव्ह आल्यानंतर तो पुन्हा एकदा त्याच्या संघात सहभागी झाला आहे.

पडीक्कलची आयपीएलमधील कामगिरी

आयपीएल 2020 मध्ये रॉयल चॅलेंजर्स बंगळुरु संघाकडून सर्वात जास्त धावा देवदत्तने फटकावल्या होत्या. त्याने या बाबतीत कर्णधार विराट कोहली आणि मिस्टर 360 एबी डिव्हिलियर्सलादेखील मागे ठेवले होते. IPL 2020 मध्ये पडीक्कलला 15 सामन्यांमध्ये आरसीबी संघाचं प्रतिनिधीत्व करण्याची संधी मिळाली. या 15 सामन्यांमध्ये त्याने 31.53 च्या सरासरीने आणि 124 च्या स्ट्राईक रेटने आणि 5 अर्धशतकांच्या तब्बल 473 धावा फटकावल्या होत्या.

देवदत्तची विजय हजारे करंडक स्पर्धेतील कामगिरी

देवदत्तने विजय हजारे करंडक स्पर्धेच्या यंदाच्या हंगामात पृथ्वी शॉनंतर सर्वाधिक धावा चोपल्या. 20 वर्षीय देवदत्तने 7 सामन्यात 147. 4 च्या सरासरीने 737 धावा केल्या. यामध्ये त्याने 4 शतकं आणि 3 अर्धशतकं झळकावली. विशेष म्हणजे देवदत्तने 4 शतकं सलग 4 सामन्यात लगावली. यासह देवदत्तने विराट कोहलीच्या विक्रमाची बरोबरी केली. विराटने 2008 मध्ये हजारे करंडकात असाच कारनामा केला होता.

संबंधित बातम्या

Devdutt Padikkal IPL 2021 RCB Team Player : IPL 2020 आणि विजय हजारे स्पर्धा गाजवणारा देवदत्त पडीक्कल पुन्हा धुमाकूळ घालणार?

175 चौकार आणि 46 षटकार, 2 फलंदाजांचा झंझावात, 1500 पेक्षा अधिक धावा, तरीही संघात स्थान नाही

(IPL 2021: Devdutt Padikkal becomes third cricketer to contract COVID-19)