बारामती | 2 मार्च 2024 : बारामतीत लोकसभा निवडणूकांच्या पार्श्वभूमीवर मोठा फॅमिली ड्रामा घडत आहे. काका शरद पवारांचा पक्षच पुतणे अजित पवार यांनी पळविल्याने पवार कुटुंबात फाळणी झाली आहे. भाजपाने त्यासाठी रसद पुरविल्यानंतर आता लोकसभेत एकाच घरातीस नणंद-भावजयीत निवडणूकांचा बार उडणार आहे. त्यामुळे शरद पवार यांच्या बारामतीत सरकारने नमो महारोजगार मेळाव्याचे आयोजन केले आहे. या मेळाव्यात या मेळाव्यात शरद पवार, अजित पवार, देवेंद्र फडणवीस, एकनाथ शिंदे आणि सुप्रिया सुळे, सुनेत्रा पवार एकाच व्यासपीठावर उपस्थित आहेत. यावेळी खासदार सुप्रिया सुळे यांनी मला केंद्राकडून आमंत्रण मिळाल्याचे मिडीया प्रतिनिधीशी बोलताना म्हटले आहे. शरद पवार यांच्या बालेकिल्ल्यात हा कार्यक्रम होत असून या निमित्ताने शरद पवार यांनी मुख्यमंत्री एकनाथ शिंदे यांना जेवणाचे आमंत्रण दिल्याचे पत्रही व्हायरल झाले होते. याच पत्रात दोन्ही उपमुख्यमंत्री देवेंद्र फडणवीस आणि अजित पवार यांनाही आमंत्रण देण्यात आले होते, अर्था हे आमंत्रण स्वीकारले नसल्याचे म्हटले जात आहे. यावेळी व्यासपीठावर खासदार सुप्रिया सुळे यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचे स्वागत केले. परंतू आपले बंधू अजितदादांकडे त्यांनी दुर्लक्ष केल्याचे दृश्य सर्वांना पाहायला मिळाले. दादांनी राष्ट्रवादी पक्ष बळकविल्यानंतर त्यांची बहिण सुप्रिया सुळे हिच्या विरोधात बारामतीत सुनेत्रा पवार यांना उतरविण्याचाही निर्णय घेतल्याने नात्यात अंतर निर्माण झाल्याचे स्पष्ट पाहायला मिळाले.