घरभाड्याच्या बनावट पावत्या देणारे आयकर विभागाच्या रडारवर, हजारो प्रकरणे उघड

hra

आयकर वाचण्यासाठी वेगवेगळे प्रयोग लोकांकडून केले जातात. अनेक जण घरभाड्याच्या बनावट पावत्या देतात. परंतु घरभाड्याच्या बनावट पावत्या देणारे लोक आयकर विभागाच्या रडारवर आले आहेत. आयकर विभागाने बनावट पावत्या देणारे 8000 ते 10000 हजार प्रकरणे शोधून काढले आहेत. या प्रकरणातून कोट्यवधी रुपयांचा कर वाचवून आयकर विभागाला चुना लावल्याचे प्रकार समोर आले आहे. आता ही सर्व लोक आयकर विभागाच्या रडारवर आले आहेत. या प्रकरणात पूर्ण जबाबदारी एचआरएच्या बनावट पावत्या देणाऱ्या कर्मचाऱ्यांची असणार आहे. कंपनीची जबाबदारी नसणार आहे.

कसा उघड झाला प्रकार

आयकर विभागाने हे सर्व प्रकार पॅन नंबरवरुन शोधून काढले आहेत. एका व्यक्तीने एक कोटी रुपये भाडे देत असल्याची पावती जोडली. मग त्या पॅन क्रमांकावर शोध घेतला असता मालकाकडे इतकी रक्कम जमा झाली नसल्याचे स्पष्ट झाले. तसेच त्या मालकाला चौकशीसाठी बोलवल्यावर इतकी रक्कम भाडे मिळत नसल्याचे त्याने स्पष्ट केले. या पद्धतीने बनावट घरभाडे पावत्या उघड झाल्या. चौकशीतून पगारदार व्यक्ती कर बचतीचा फायदा घेण्यासाठी बनावट पावत्या देत असल्याचे लक्षात आले. सर्व प्रकरणांची चौकशी केली असता अशी आठ ते दहा हजार प्रकरणे समोर आली आहेत.

दंड अन् खटला चालू शकतो

बनावट घरभाडे पावत्या दिल्यानंतर आयकर विभाग काय कारवाई करते? यासंदर्भात बोलताना चार्टेड अकाउंटेंट आशीष म‍िश्रा म्हणतात, पॅन क्रमांक, नवीन तंत्रज्ञान आणि डाटा अ‍ॅनालिसिस करुन बनावट पावत्या देणाऱ्यांचा शोध आयकर विभाग घेत आहे. बनावट पावत्या देणारे लोकांना दंड, व्याज द्यावाच लागणार आहे. तसेच त्यांच्याविरोधात खटलाही चालवला जाऊ शकतो.

आई-वडिलांना घरभाडे देत असाल तर…

तुम्ही जर घर भाडे आई-वडिलांना देत असाल तर ते ही प्रामाणित पद्धतीने केले पाहिजे. धनादेश (चेक) किंवा इलेक्ट्रॉनिक ट्रान्सफर प्रणाली वापरली पाहिजे. रोकड दाखवलेली रक्कम ग्राह्य धरली जात नाही. तसेच आई-वडिलांनी मुलाकडून मिळत असलेले ते भाडे आपल्या आयकर रिर्टनमध्ये दाखवले पाहिजे.

हे ही वाचा

कर बचतीसाठी दोन दिवस, जेरोधाच्या नितिन कामथ यांनी सांगितली आयडिया