VIDEO : पिंपरी चिंचवड पोलिसांचा कोयता भाईला दणका, जिथे कोयता मिरवला त्याच परिसरातून वरात

पिंपरी चिंचवड पोलिसांचा कोयता भाईला दणका

पिंपरी चिंचवड (पुणे) : कोयता हातात घेऊन परिसरात दहशत निर्माण करण्याचा प्रयत्न करणाऱ्या कोयता भाई राकेश सरोदे उर्फ यम भाईची पिंपरी चिंचवड पोलिसांनी शहरात वरातच काढली आहे. आरोपीने ज्या भागात दहशत निर्माण केली त्याच भागात पोलिसांनी त्याची वरात काढली. या यम भाईने सोशल मीडियावर हातात कोयता घेऊन एक इन्स्टाग्रामवर एक व्हिडीओ शेअर केला होता. आमची सूत्रे येरवडा जेलमधून हालतात, असं तो व्हिडीओत म्हणाला होता. संबंधित व्हिडीओ व्हायरल झाल्यानंतर पोलिसांनी आरोपीच्या मुसक्या आवळल्या.

नेमकं प्रकरण काय?

सध्या सोशल मीडियावर भाऊ, भाई, दादा अशा लोकांची भाऊगर्दी झालेली पाहायला मिळते. अनेक जण विविध प्रकारचे व्हिडीओ हे सोशल मीडियावर पोस्ट करत असतात, त्यापैकी काही व्हिडीओ चांगल्या संदेशाचे असतात, तर काही समाजात भीती पसरविण्याचे काम देखील करत असतात. अशाच पद्धतीने समाजात दहशत पसरविण्याच्या उद्देशाने पिंपरी चिंचवडमधील निगडी परिसरातील इन्स्टाग्रामवर कोयता हातात घेऊन दहशत निर्माण करणाऱ्या राकेश सरोदे उर्फ यम भाई या गावगुंडाला गुंडविरोधी पथकाने अटक केली.

तो स्वतःला कोयता भाई असल्याचं सांगतो

तो स्वतःला कोयता भाई म्हणून इन्स्टाग्रामवर व्हिडीओ मोठ्या प्रमाणात प्रसारित करत होता. या कोयता भाईच्या हातात कोयता घेऊन प्रदर्शन करतानाचे व्हिडीओ सोशल मीडियावर व्हायरल झालेत. या व्हिडीओमध्ये कोयता हातात घेऊन दहशत पसरवण्यासाठी “आमची सूत्रे येरवडा जेलमधून हलतात.” तसेच हातात कोयता घेत “वेळ आली की मी कोण आहे हे दुनियाला सांगायची आणि मी काय करू शकतो, असे म्हणून कोयता दाखवत या राकेश सरोदे ऊर्फ यम भाईने दहशत पसरवण्यासाठी व्हिडीओ इन्स्टाग्रामवर पोस्ट केलेत. याची गंभीर दखल घेत पिंपरी चिंचवड पोलिसांनी या यम भाईला अटक करत त्याची मस्ती उतरवलीय.

एका व्यक्तीची कोयत्याने सपासप वार करून हत्या

पिंपरी चिंचवडमध्ये तीन दिवसांपूर्वीच एका व्यक्तीची कोयत्याने सपासप वार करून हत्या करण्यात आल्याची घटना समोर असताना अशा प्रकारे घातक हत्यारांचा प्रदर्शन हे सोशल मीडियावरील भाई करत आहेत. त्यामुळे शहरातील वातावरण हे दूषित होत चालेल आहे. मात्र या सोशल मीडियावरील दहशत माजवणाऱ्या व्हिडीओ पोस्ट करणाऱ्या भाई लोकांवर आता पिंपरी चिंचवड पोलिसांनी कारवाई करण्यास सुरुवात केलीय.

संबंधित घटनेचा व्हिडीओ बघा :

संबंधित बातमी :

सोशल मीडियावरील कोयता भाईला पिंपरी चिंचवड पोलिसांकडून बेड्या