Santosh Deshmukh Case : मोठी बातमी, संतोष देशमुख प्रकरण, एका अधिकाऱ्यासह दोघांना SIT मधून हटवलं
Santosh Deshmukh Case : मस्साजोगचे सरपंच संतोष देशमुख हत्या प्रकरणात एक मोठी अपडेट आहे. विरोधी पक्षाच्या आक्षेपानंतर सरकारने एक मोठा निर्णय घेतला आहे. SIT मधून तिघांना हटवण्यात आलं आहे.
मस्साजोगचे सरपंच संतोष देशमुख हत्या प्रकरणात एक मोठी अपडेट आहे. राज्य सरकारने संतोष देशमुख हत्या प्रकरणाच्या तपासासाठी विशेष तपास पथक म्हणजे SIT ची स्थापना केली आहे. या SIT मधून तीन अधिकाऱ्यांची उचलबांगडी करण्यात आली आहे. वाल्मिक कराड सोबत फोटो त्यांच्या अंगलट आला आहे. संतोष देशमुख हत्या प्रकरणात आतापर्यंत सहा आरोपी अटकेत आहेत. या प्रकरणातील दोन मुख्य आरोपी सुदर्शन घुले आणि सुधीर सांगळे यांना शनिवारी पुण्यातून अटक करण्यात आली. वाल्मिक कराड या हत्येचा मास्टरमाइंड असल्याचा आरोप होतोय. त्याला खंडणीच्या गुन्ह्यात अटक झाली आहे. 31 डिसेंबरला तो सुद्धा पुण्यातच सीआयडीला शरण आला होता.
राज्य सरकारने नेमलेल्या विशेष तपास पथक म्हणजे SIT मधील एपीआय महेश विघ्ने यांचा वाल्मिक कराड सोबतचा एक फोटो व्हायरल झाला होता. हा फोटो समोर आल्यानंतर शरद पवार गटाचे आमदार जितेंद्र आव्हाड यांनी आक्षेप घेतला. तपास निष्पक्षपणे होणार नाही, असा आक्षेप विरोधी पक्षाने घेतला. त्यामुळे एपीआय महेश विघ्ने, हवलादार मनोज वाघ आणि एका उपनिरीक्षकाला SIT मधून हटवण्यात आलं आहे. बीडची स्थानिक गुन्हे शाखा या हत्या प्रकरणाचा तपास करत आहे. आतापर्यंत त्यांनीच पाच आरोपींना अटक केली आहे. अजून एक मुख्य आरोपी कृष्णा आंधळे फरार आहे. त्याला आज रात्रीपर्यंत पकडू असा स्थानिक गुन्हे शाखेचा दावा आहे.
क्रूर पद्धतीने निर्घृण हत्या
संतोष देशमुख यांच्या कुटुंबाला लवकरात लवकर न्याय मिळावा, यासाठी राज्यभरात मोर्चे निघत आहेत. बीड जिल्ह्यातील सर्वपक्षीय लोकप्रतिनिधींनी हा विषय लावून धरला आहे. संतोष देशमुख यांची अत्यंत क्रूर पद्धतीने निर्घृण हत्या करण्यात आली होती. राज्य सरकारने या प्रकरणाच्या तपासासाठी सीआयडीची स्थापना केली, नंतर बसवराज तेली यांच्या नेतृत्वाखाली विशेष तपास पथक बनवण्यात आलं. वाल्मिक कराड हाच या प्रकरणात मुख्य मास्टरमाइंड असल्याचा आरोप होत आहे. वाल्मिक कराड हा राज्य सरकारमधील मंत्री धनंजय मुंडे यांचा निकटवर्तीय आहे.
