बिल न भरल्यानं रुग्णाला एक महिना अडवून ठेवल्याचा आरोप, शिवसेनेच्या पदाधिकाऱ्यांनी केली सुटका
महेंद्र गायकवाड असं या सुटका केलेल्या रुग्णाचं नावं आहे. अपघातात जखमी झालेला रुग्ण हा पैठणमधील असून मागील दोन महिन्यापासून उपचारासाठी होता दाखल, त्यानंतरच हा धक्कादायक प्रकार समोर आला आहे.
सोलापूर : रुग्णालयाचं बिलं भरलं (Hospital Bill) नाही म्हणून रुग्णालयाकडून अडवणूक होताना आपण अनेकदा पाहिलं आहे. असाच एक प्रकार पुन्हा सोलापुरात (Adhar Hospital Solapur) घडला आहे. सोलापूरमध्ये रुग्णालयाने उपचाराचे बील न भरल्याने अडवून ठेवलेल्या रुग्णाची शिवसेना (Shivsena) वैद्यकीय कक्षाच्या पदाधिकाऱ्यांनी सुटका केलीय. अपघातात जखमी झालेल्या रुग्णाला उपचारानंतर एक महिना 6 दिवस अडकून ठेवल्याचा आरोप रुग्णाने केला होता, त्यानंतर शिवसेनेच्या पदाधिकाऱ्यांनी या प्रकरणात तातडीने पाऊलं उचलत या रुग्णाची सुटका केल्याची माहिती समोर आली आहे. महेंद्र गायकवाड असं या सुटका केलेल्या रुग्णाचं नावं आहे. अपघातात जखमी झालेला रुग्ण हा पैठणमधील असून मागील दोन महिन्यापासून उपचारासाठी होता दाखल, त्यानंतरच हा धक्कादायक प्रकार समोर आला आहे.
जिल्हाधिकाऱ्यांकडेही प्रकरणाची तक्रार
सोलापुरातील आधार हॉस्पिटलने महिनाभरापासून डांबून ठेवल्याचा रुग्णाचा व्हिडिओ व्हायरल झाला होता. त्याची दखल घेत शिवसेना वैद्यकीय कक्षाच्या मनीष काळजे यांनी हॉस्पिटलमध्ये जाऊन रुग्णाची सुटका केल्याचे सांगितले आहे. रुग्णाची सुटका केल्यानंतर रुग्णाने त्यांचे मनापासून आभारही मानले आहेत. डिस्चार्जनंतर रुग्णाला थांबवणे कायद्याने गुन्हा असून याविरोधात आम्ही जिल्हाधिकाऱ्यांना कळवल्याची मनीष काळजे यांनी माहिती दिलीय.
बिल भरण्यासाठी कुणीही आलं नाही-रुग्णालय
तर रुग्णाने उपचाराचे पैसे न भरल्याने रुग्णाला डिस्चार्ज दिला नसल्याची रुग्णालय प्रशासनानं कबुली दिलीय. रुग्णाच्या नातावईकांकडून आणि कंपनीच्या लोकांकडून वारंवार बिल भरतो असं सांगण्यात आलं, मात्र बिल भरण्यासाठी कुणीही आलं नाही, तसेच पेशंटजवळही कोणीच नव्हतं असेही रुग्णालय प्रशासनाकडून सांगण्यात आलंय.
शिवसेनेचे पदाधिकारी काय म्हणाले?
वास्तविक पद्धतीने साडेतीन ते चार लाख रुपये दवाखान्यात आणि मेडिकलचे बिल भरलेलं आहे. स्वतःची परिस्थिती बिकट असताना देखील त्यांनी पैसे भरले, मात्र आणखी पैसे भरल्याशिवाय सोडणार नाही, असं डॉक्टरांनी त्या रुग्णाला सांगितलं. उर्वरित पैसे भरण्यासाठी मला काही सवलत द्या, काही मदत द्या, आम्हाला डिस्चार्ज करा, मी आज एक महिना झालं पैठण गावापासून लांब आहे, सोलापूर पुणे रोड वरती अपघात झाल्यामुळे या ठिकाणी उपचारासाठी आहे, अशी त्यांनी विनंती केली. मात्र दवाखाना प्रशासनाला त्यांची कीव वाटली नाही, यामुळे त्यांनी एक व्हिडिओ व्हायरल केला होती, त्याची माहिती मिळताच आम्ही याठिकाणी पोहचून या रुग्णाची सुटका केलीय. अशी माहिती शिवसेनेच्या पदाधिकाऱ्यांनी दिली आहे.
