त्यांच्या छुप्या अजेंड्यामुळे ‘गदर 2’ गटारात गेला असता..; अमीषा पटेलचा दिग्दर्शकांवर गंभीर आरोप
अभिनेत्री अमीषा पटेलने नुकत्याच दिलेल्या एका मुलाखतीत 'गदर 2'च्या दिग्दर्शकांवर काही गंभीर आरोप केले आहोत. या चित्रपटामागे त्यांचा छुपा अजेंडा होता, असंही ती म्हणाली. इतकंच नव्हे तर त्यांनी चित्रपटाला गटारात नेलं असतं, अशी टीका अमीषाने केली आहे.
अभिनेत्री अमीषा पटेलने बऱ्याच वर्षांनंतर ‘गदर 2’ या चित्रपटातून पुनरागमन केलं. सनी देओलसोबतचा तिचा हा चित्रपट बॉक्स ऑफिसवर तुफान हिट ठरला. आता नुकत्याच दिलेल्या एका मुलाखतीत अमीषाने या चित्रपटाच्या दिग्दर्शकांवर आरोप केला आहे. ‘गदर 2’चे दिग्दर्शक अनिल शर्मा यांचा या चित्रपटामागे छुपा अजेंडा होता, म्हणूनच मी आणि सनीने पडद्यामागे राहून या चित्रपटाचं दिग्दर्शन केलंय, असा दावा तिने केला आहे. “सनी देओल आणि माझ्याकडून या चित्रपटात बऱ्याच दुरुस्त्या केल्या गेल्या आहेत. म्हणूनच तो असा चित्रपट बनू शकला. यासाठी आम्ही भरपूर एडिटिंग आणि पुन्हा-पुन्हा शूटिंग केली. या सर्व प्रक्रियेदरम्यान आमची दिग्दर्शकांसोबत बरीच भांडणंसुद्धा झाली”, अशी कबुली अमीषाने दिली आहे.
‘बॉलिवूड हंगामा’ला दिलेल्या मुलाखतीत अमीषाने ‘गदर 2’ या चित्रपटाविषयी बरेच दावे केले आहेत. “या चित्रपटात माझ्याकडून आणि सनी देओल यांच्याकडून बरेच बदल करण्यात आले आहेत. यामुळेच तो प्रेक्षकांना आवडण्यालायक बनू शकला. कारण दिग्दर्शक ‘गदर 2’ला अशा मार्गेकडे घेऊन जात होते, जे पाहून आम्ही नाखुश झालो होतो. यासाठी आम्हाला पुन्हा पुन्हा बरीच शूटिंग आणि एडिटिंग करावी लागली. हा संपूर्ण प्रवास काही सोपा नव्हता. सनी देओल आणि माझे दिग्दर्शकांसोबत बरेच मतभेद झाले होते. चित्रपटातील सीन्स, गाणी आणि कोरिओग्राफीमध्येही आम्ही योगदान दिलं होतं. त्यामुळे या चित्रपटाचे आम्ही जणू ‘घोस्ट डायरेक्टर्स’ (छुपे दिग्दर्शक) आहोत. अनिल शर्मा यांचा छुपा अजेंडा हा त्यांना मूळ कथेपासून दूर नेत होता”, असा खुलासा अमीषाने केला आहे.
अमीषाने तिचा बिझनेस पार्टनर कुणाल घूमरला या चित्रपटाच्या यशाचं श्रेय दिलं. चित्रपटाचं शूटिंग चुकीच्या मार्गाने होत असताना कुणालने हस्तक्षेप करून सर्वकाही योग्य मार्गावर आणलं, असं ती म्हणाली. जर कुणालने त्याच्या कलात्मक विचारांनी हा चित्रपट वाचवला नसता तर ‘गदर 2’ हा चित्रपट गटारात गेला असता, अशी सणसणीत टीका अमीषाने या मुलाखतीत केली.
अमीषाला या मुलाखतीत ‘गदर 3’ विषयी प्रश्न विचारण्यात आला. या तिसऱ्या चित्रपटाचा भाग ती आहे की नाही, याबद्दल तिलाही अद्याप कल्पना नसल्याचं स्पष्ट केलं. मात्र तिसऱ्या भागाची ऑफर मिळाली तर माझ्या काही अटी असतील, असंही ती म्हणाली. चित्रपटात तिच्या सकिनाच्या आणि सनी देओलच्या ताराच्या भूमिकेला पुरेसा स्क्रीन टाइम मिळाला, तरच तिसऱ्या भागात काम करणार असल्याची अट तिने मांडली.
