ग्रँड फिनालेपूर्वी ‘बिग बॉस मराठी 5’च्या घरातून पंढरीनाथ कांबळे बाहेर
'बिग बॉस मराठी'चा ग्रँड फिनाले जवळ आला आहे. ग्रँड फिनालेपूर्वी या घरातून आणखी एक सदस्य बाहेर पडला आहे. पंढरीनाथ कांबळेला बिग बॉसच्या घरातून बाहेर पडावं लागलंय. अंकिता आणि पॅडी या दोन सदस्यांमध्ये शेवटी चुरस रंगली होती.
पंढरीनाथ कांबळे ऊर्फ पॅडी कांबळे मराठी मनोरंजनसृष्टीतील एक विनोदी अभिनेता आहे. हास्यसम्राट पंढरीनाथ कांबळेने मालिका, नाटक आणि चित्रपटांच्या माध्यमातून प्रेक्षकांच्या चेहऱ्यावर हसू आणण्याचं काम केलं आहे. वेगवेगळ्या भूमिका साकारणारा पंढरीनाथ घराघरात लोकप्रिय आहे. ‘बिग बॉस मराठी’च्या घरात देखील त्याच्या खेळीने प्रेक्षकांची मनं जिंकली आहेत. ‘बिग बॉस मराठी’च्या घरातील सर्वच सदस्य या आठवड्यात नॉमिनेट होते. त्यामुळे निक्की, सूरज या सदस्यांना रविवारच्या भागात सेफ (सुरक्षित) करण्यात आलं. ‘बिग बॉस मराठी’चा खेळ अंतिम टप्प्यात आलेला असताना या आठवड्यात घरातून कोण बाहेर पडणार याकडे सर्वांचं लक्ष लागलं होतं. अंकिता आणि पॅडी या दोन सदस्यांमध्ये शेवटी चुरस रंगली. यापैकी अंकिताला ‘बिग बॉस’ने सेफ केलं. तर प्रेक्षकांनी दिलेल्या मतांचा मान ठेवत पंढरीनाथ कांबळेला या आठवड्यात घराचा निरोप घ्यावा लागला.
‘बिग बॉस मराठी’च्या घराचा निरोप घेत पंढरीनाथ कांबळे म्हणाला, “बिग बॉस मराठी’च्या घरातील माझ्या प्रवासाबद्दल मी खूप आनंदी आहे. आता मी बाहेर पडलो याबद्दल मला अजिबात वाईट वाटत नाही आहे. मी कोणाला दुखावलं नाही, कोणाला उलट उत्तर दिलेलं नाही. प्रत्येक वेळेत मी माझे मुद्दे व्यवस्थित मांडले आहेत. घरातील प्रत्येकाचा मी आदर केला आहे. त्यामुळे आज निरोप घेताना मला अजिबातच दु:ख होत नाही.”
“बिग बॉस मराठीच्या ग्रँड फिनालेपर्यंत जायची माझी इच्छा होती. घरात असताना मी माझ्या पत्नीला खूप मिस केलं. पण आता बाहेर पडल्यानंतर मला सूरजची नक्कीच आठवण येईल. डीपी, अंकिताचीदेखील आठवण येईल. त्यांच्याबद्दल एक आत्मियता निर्माण झाली आहे. हे सर्व त्यांच्या मतांवर ठाम आहेत. मतांवर ठाम राहायला मला ‘बिग बॉस मराठी’च्या घराने शिकवलं”, असंही तो पुढे म्हणाला.
पंढरीनाथच्या एक्झिटवर नेटकऱ्यांकडून विविध प्रतिक्रिया येत आहेत. ‘कुणाकुणाला वाटतं हे चुकीचं झालं. पॅडी दादा खूप छान खेळतात’, असं एकाने लिहिलं. तर ‘पॅडी दादा खूप छान गेम खेळले. सूरजला वेळोवेळी समजावून सांगणारे फक्त तुम्हीच होते. सूरजला तुमच्याकडून खूप काही शिकायला मिळालं’, असं दुसऱ्या युजरने म्हटलंय.