“तिथे लोक मरतायत अन् इथे तू..”; रशिया-युक्रेन युद्धावर मीम शेअर करणाऱ्या अर्शदवर भडकले नेटकरी
रशिया-युक्रेन युद्ध (Russia Ukraine war) परिस्थितीवर अर्शदने (Arshad Warsi) गोलमाल चित्रपटावरील मीम शेअर केला. त्याच्या या मीमवर नेटकऱ्यांनी तीव्र संताप व्यक्त केला.
गेल्या काही महिन्यांपासून वर्तविण्यात आलेली रशिया-युक्रेन युद्धाची (Russia-Ukraine crisis) भीती अखेर खरी ठरली. रशियाने गुरुवारी युक्रेनवर चौफेर हल्ले केले. या हल्ल्यानंतर युक्रेनचे सैन्य तीन बाजूंनी रशियन आक्रमकांशी लढत आहेत. तर हजारो लोकांना त्यांची घरं सोडून पळून जावं लागत आहे. एकीकडे काही बॉलिवूड कलाकार या परिस्थितीवर सोशल मीडियाद्वारे चिंता व्यक्त करत आहेत. तर दुसरीकडे अभिनेता अर्शद वारसीने (Arshad Warsi) या परिस्थितीवर त्याच्या गोलमाल (Golmaal meme) या चित्रपटावरील एक मीम शेअर केला. एकीकडे लोकांच्या जीवनमरणाचा प्रश्न असताना दुसरीकडे अर्शदने परिस्थितीची अशी खिल्ली उडवणं योग्य नाही, अशा शब्दांत नेटकऱ्यांनी मीमवर तीव्र प्रतिक्रिया व्यक्त केल्या आहेत. सोशल मीडियावर ट्रोल झाल्यानंतर अखेर अर्शदने हे मीम डिलिट केलं.
रशिया-युक्रेन युद्धावर अनेक बॉलिवूड सेलिब्रिटींनी सोशल मीडियावर आपलं मत मांडलं. अभिनेता अर्शद वारसीने ट्विटरवर युद्धावरील एक मीम शेअर केला होता. हा मीम नेटिझन्सच्या पसंतीस उतरला नाही. अत्यंत असंवेदनशील ट्विट असल्याची टीका नेटकऱ्यांनी केली. अर्शदने शेअर केलेल्या मीममध्ये अजय देवगण, शर्मन जोशी, मुकेश तिवारी, तुषार कपूर आणि रिमी सेन होते. या कलाकारांनी साकारलेल्या भूमिकांना अमेरिका, रशिया, युक्रेन आणि युक्रेनमधील बंडखोरांच्या ताब्यात असलेला भाग अशी नावं देण्यात आली होती. ‘या चित्राला वेगळं स्पष्टीकरण द्यायची गरज नाही. गोलमाल हा चित्रपट त्याच्या काळापेक्षा बराच पुढचा विचार करणारा होता’, असं त्यावर लिहिलं होतं. अर्शदच्या या मीमवर नेटकऱ्यांनी तीव्र संताप व्यक्त केला.
‘मला तुझ्या मीममधील विनोद समजला पण ही मस्करीची वेळ नाही. तिथे खरंच युद्ध सुरू आहे’, असं एकाने लिहिलं. तर ‘माफ कर, पण तुझ्याकडून अशा विनोदाची अपेक्षा नव्हती. तिथे अनेक निष्पाप लोकांच्या जीवनाचा प्रश्न आहे’, असं दुसऱ्याने लिहिलं. ‘मी कलाकार म्हणून तुमचा आदर करतो, पण युद्धाची मस्करी करणं योग्य नाही’, अशा शब्दांत एकाने सुनावलं. मीमवर या प्रतिक्रिया पाहून अर्शदने त्याचं ट्विट डिलिट केलं.
संबंधित बातम्या: गोळीबार, बॉम्बफेक सुरु असतानाही युक्रेनमध्ये सुरु आहे अभिनेत्याचं काम