Salman Khan Rickshaw Video | सलमानकडे रिक्षा चालवण्याचं लायसन्स आहे का? काँग्रेस नगरसेविकेकडून कारवाईची मागणी
सलमानचे तीनचाकी (रिक्षा) चालवण्याचे लायसन्स तपासून पाहा, नसल्यास तातडीने सलमान विरोधात एफआयआर दाखल करा. कायद्यासोबत कोणीही छेडछाड करु शकत नाही, असं ट्वीट मुंबई महापालिकेतील काँग्रेस नगरसेविका ट्युलिप ब्रायन मिरांडा यांनी केलं आहे
मुंबई : बॉलिवूडचा ‘दबंग’ सुपरस्टार सलमान खान (Salman Khan) नुकताच सर्पदंशातून (Snake Bite) सहिसलामत बचावला. ऐन वाढदिवसाच्या तोंडावर घडलेल्या या घटनेमुळे चाहत्यांच्या काळजात धस्स झालं होतं. मात्र भाईजानचं दर्शन झालं आणि फॅन्सचा जीव भांड्यात पडला. आपण अत्यंत कूल असल्याचं दाखवणारा सलमानचा आणखी एक व्हिडीओ समोर आला आहे. सलमान पनवेलच्या रस्त्यावर रिक्षा (Salman Khan Driving Auto Rickshaw) चालवत असल्याचं यामध्ये दिसत आहे. मात्र सलमानकडे रिक्षा चालवण्याचा परवाना आहे का, असा सवाल करत काँग्रेस नगरसेविकेने सलमानवर कारवाई करण्याची मागणी केली आहे.
सलमान खानला चाहत्यांसोबत मिळून-मिसळून राहायला आवडतं. तो आपले अनेक व्हिडीओही शेअर करत असतो. सलमान रिक्षा चालवतानाचा एक व्हिडीओ नुकताच सोशल मीडियावर समोर आला. त्यानंतर काँग्रेस नगरसेविका ट्युलिप मिरांडा यांनी सलमान खानवर कारवाई करण्याची मागणी केली आहे.
काँग्रेस नगरसेविकेचं म्हणणं काय?
सलमानचे तीनचाकी (रिक्षा) चालवण्याचे लायसन्स तपासून पाहा, नसल्यास तातडीने सलमान विरोधात एफआयआर दाखल करा. कायद्यासोबत कोणीही छेडछाड करु शकत नाही, असं ट्वीट मुंबई महापालिकेतील काँग्रेस नगरसेविका ट्युलिप ब्रायन मिरांडा यांनी केलं आहे. नवी मुंबई पोलीस, गृहमंत्री दिलीप वळसे पाटील, मुख्यमंत्री कार्यालय यांना टॅग करत मिरांडा यांनी ही मागणी केली आहे.
@Dwalsepatil @CMOMaharashtra Verify three Wheeler Lisence Of Salman Khan, if not found, register FIR immediately. No one can mess with the Law. https://t.co/wDuapyOqDY
— Tulip Brian Miranda (@brian_tulip) December 29, 2021
सलमानच्या व्हिडीओमध्ये काय?
सलमान खान पनवेलमध्ये (Panvel) ऑटोरिक्षा चालवताना व्हिडीओत दिसत आहे. 56 व्या वाढदिवसाच्या सेलिब्रेशनसाठी पनवेलमध्ये तळ ठोकून असलेला सलमान खान रस्त्यावर रिक्षा चालवताना दिसतो. सलमान रिक्षा चालवत असल्याचं समजताच काही चाहत्यांनी मोबाईलवर त्याचे व्हिडीओ शूट केले. निळ्या रंगाचा टी-शर्ट, पांढरी शॉर्ट्स घातलेल्या सलमान खानने कॅपही घातली होती.
सलमान खान रिक्षा चालवतानाचा व्हिडीओ पाहा :
वाढदिवसाच्या तोंडावर सर्पदंश
सलमान खान गेल्या आठवड्यापासूनच वाढदिवसाच्या सेलिब्रेशनसाठी पनवेलला पोहोचला होता. सलमानला वाढदिवसाच्या आदल्या दिवशी पनवेल फार्म हाऊसमध्ये साप चावला होता. सलमानला सापाने तीन वेळा दंश केला होता. यानंतर भाईजानला एमजीएम रुग्णालयात दाखल करण्यात आलं, सुदैवाने काही तासांच्या उपचारानंतर त्याला सोडूनही देण्यात आलं. त्यानंतर सलमानने आपला वाढदिवस मोठ्या थाटामाटात साजरा केला.
संबंधित बातम्या :