Rahul Jain: गायक राहुल जैनविरोधात बलात्काराचा आरोप; कॉस्च्युम स्टायलिस्टने दाखल केली FIR
ओशिवरा पोलीस ठाण्यात नोंदवलेल्या जबाबात संबंधित महिलेनं म्हटलं की राहुलने इन्स्टाग्रामद्वारे तिच्याशी संपर्क साधला. तिच्या कामाचं कौतुक करत त्याने आपली पर्सनल स्टायलिस्ट म्हणून तिची नेमणूक करण्यासाठी आश्वासन दिलं.
गायक-संगीतकार राहुल जैनविरोधात (Rahul Jain) एका 30 वर्षीय कॉस्च्युम स्टायलिस्टने (costume stylist) तक्रार दाखल केली आहे. मुंबईतल्या अंधेरी (Andheri) इथल्या त्याच्या घरी राहुलने तिच्यावर बलात्कार केल्याचा आरोप स्टायलिस्टने केला. 11 ऑगस्ट रोजी ही घटना घडल्याचं तिने म्हटलंय. याप्रकरणी पोलिसांनी राहुलविरोधात एफआयआर दाखल केली आहे. ओशिवरा पोलीस ठाण्यात नोंदवलेल्या जबाबात संबंधित महिलेनं म्हटलं की राहुलने इन्स्टाग्रामद्वारे तिच्याशी संपर्क साधला. तिच्या कामाचं कौतुक करत त्याने आपली पर्सनल स्टायलिस्ट म्हणून तिची नेमणूक करण्यासाठी आश्वासन दिलं. यासाठी त्याने त्याच्या अंधेरीतल्या फ्लॅटमध्ये तिला बोलावलं. 11 ऑगस्ट रोजी ती त्याच्या घरी गेली असता काम देण्याचं आश्वासन देत त्याने तिच्यावर बलात्कार केला.
राहुलचा तिने प्रतिकार केला तेव्हा त्याने तिच्यावर हल्ला केला आणि नंतर पुरावे नष्ट करण्याचाही प्रयत्न केला, असा आरोप संबंधित स्टायलिस्टने केला. पोलिसांनी राहुलविरुद्ध भारतीय दंड संहितेच्या कलम 376 (बलात्कार), 323 (स्वैच्छिक दुखापत) आणि 506 (गुन्हेगारी धमकी) अंतर्गत एफआयआर नोंदवला आहे, असं अधिकाऱ्याने सांगितलं. याप्रकरणी अद्याप कोणालाही अटक झालेली नाही.
यावर उत्तर देताना राहुलने एका निवेदनात म्हटलं की, “मी या महिलेला ओळखत नाही. तिने केलेले आरोप खोटे आणि निराधार आहेत. यापूर्वीही एका महिलेने माझ्यावर असेच आरोप केले होते, पण मला न्याय मिळाला. ही महिला त्या महिलेची सहकारी असू शकते.” राहुलवर लैंगिक अत्याचाराचे आरोप होण्याची ही पहिलीच वेळ नाही. गेल्या वर्षी राहुल आणि त्याच्या कुटुंबातील दोन सदस्यांवर बलात्कार, बळजबरीने गर्भपात, मूल सोडून दिल्याचा आणि फसवणूक केल्याचा आरोप होता.
राहुलने 2014 मध्ये MTV शो एमटीव्ही अलॉफ्ट स्टारमध्ये भाग घेतल्यानंतर संगीत उद्योगात त्याच्या करिअरची सुरुवात केली. त्याने स्पॉटलाइट या वेब सीरिजमधील तेरी याद, 1921 मधील आने वाले कल, घर से निकला, ना तुम रहे तुम आणि चल दिया तुमसे दूर यांसारखी गाणी गायली आहेत. त्याने ‘कागज’ आणि ‘झूठा कहीं का’ यांसारख्या चित्रपटांमध्ये तसंच काही वेब सीरिजमध्येही संगीतकार म्हणून काम केलं आहे.
