Sonam Kapoor: ‘तुम्हाला कपडे मिळत नाही का?’; मॅटर्निटी फोटोशूटमधील बोल्ड अंदाजामुळे सोनम कपूर सोशल मीडियावर ट्रोल
'वोग' या प्रसिद्ध मासिकाच्या कव्हर पेजसाठी सोनमने हे फोटोशूट केलं होतं. त्याचाच फोटो तिने इन्स्टाग्रामवर पोस्ट केला. मात्र सोनमचं बोल्ड फोटोशूट नेटकऱ्यांच्या पसंतीस पडलं नाही. या फोटोशूटसोबतच सोनमने संबंधित मासिकाला मुलाखतसुद्धा दिली.
अभिनेत्री सोनम कपूरने (Sonam Kapoor) शनिवारी मुलाला जन्म दिला. सोनम आणि आनंद अहुजा (Anand Ahuja) यांच्या घरात चिमुकल्या पाहुण्याचं आगमन झालं असून नेटकऱ्यांनी दोघांवर शुभेच्छांचा वर्षाव केला आहे. मात्र याचदरम्यान सोनमच्या मॅटर्निटी फोटोशूटवर (maternity photoshoot) नेटकऱ्यांनी तिला खूप ट्रोल केलंय. ‘वोग’ या प्रसिद्ध मासिकाच्या कव्हर पेजसाठी सोनमने हे फोटोशूट केलं होतं. त्याचाच फोटो तिने इन्स्टाग्रामवर पोस्ट केला. मात्र सोनमचं बोल्ड फोटोशूट नेटकऱ्यांच्या पसंतीस पडलं नाही. या फोटोशूटसोबतच सोनमने संबंधित मासिकाला मुलाखतसुद्धा दिली. या मुलाखतीत ती गरोदर होण्याच्या निर्णयाविषयी व्यक्त झाली. “प्राधान्यक्रम बदलतात आणि मला वाटतं की मुलाला या जगात आणण्याचा निर्णय ते घेत नाहीत. तर तुम्ही त्यांना इथे आणायचं ठरवता. त्यामुळे हा एक अतिशय स्वार्थी निर्णय आहे,” असं ती म्हणाली.
सोनमने इन्स्टाग्रामवर हा फोटो पोस्ट करताच तिच्या कपड्यांवरून नेटकऱ्यांनी तिच्यावर निशाणा साधला. ‘तू आई झालीस याचा आनंद आहे, पण इतका बॉडी शो कशाला’, असा सवाल एका युजरने तिला केला. तर ‘जर न्यूड होण हे फॅशन असेल तर आम्हाला अशा फॅशनची गरज नाही’, अशा शब्दांत दुसऱ्या युजरने संताप व्यक्त केला. ‘सध्याच्या काळात या सेलिब्रिटींना पुरेसे कपडे मिळत नाहीत का’, असा उपरोधिक सवालही एका नेटकऱ्याने केला.
सोनमने शनिवारी सोशल मीडियावर पोस्ट लिहित मुलगा झाल्याची आनंदाची बातमी चाहत्यांना दिली. ’20 ऑगस्ट 2022 रोजी आमच्या आयुष्यात चिमुकल्या पाहुण्याचं आगमन झालं. सर्व डॉक्टर्स, नर्स, मित्रपरिवार आणि कुटुंबीयांचे आभार. ही फक्त सुरुवात आहे आणि आम्हाला माहीत आहे की यापुढचं आमचं आयुष्य पूर्णपणे बदलणार आहे’, असं त्या पोस्टमध्ये लिहिलं होतं. सोनम आणि आनंद अहुजाने मे 2018 मध्ये लग्नगाठ बांधली. मुंबईत हा विवाहसोहळा पार पडला.
