Athiya Shetty: अथिया शेट्टी-केएल राहुलच्या लग्नाची तारीख ठरली? सुनील शेट्टी यांनी दिलं चर्चांवर उत्तर
अथिया आणि राहुलचे कुटुंबीय नुकतेच मुंबईत एकमेकांना भेटले होते आणि या भेटीदरम्यान लग्नाबाबतही चर्चा झाली होती. अथिया आणि राहुल लग्नानंतर ज्या नवीन घरात राहतील ते घरसुद्धा पाहण्यासाठी दोघं कुटुंबीय गेले होते, असं म्हटलं गेलं.
अभिनेता सुनील शेट्टीची मुलगी अथिया शेट्टी (Athiya Shetty) आणि क्रिकेटर केएल राहुल (KL Rahul) लवकरच लग्न करणार असल्याच्या चर्चांना उधाण आलंय. या दोघांच्या लग्नाची तयारी जोरात सुरू असून येत्या 3 महिन्यांत अथिया आणि राहुल लग्नबंधनात अडकणार असल्याचं म्हटलं जात आहे. या चर्चांवर आता अथियाचे वडील सुनील शेट्टी (Suniel Shetty) यांनी उत्तर दिलं आहे. ‘इंडिया टुडे’नं सूत्रांच्या हवाल्याने म्हटलं आहे की, अथिया आणि राहुलचे कुटुंबीय नुकतेच मुंबईत एकमेकांना भेटले होते आणि या भेटीदरम्यान लग्नाबाबतही चर्चा झाली होती. अथिया आणि राहुल लग्नानंतर ज्या नवीन घरात राहतील ते घरसुद्धा पाहण्यासाठी दोघं कुटुंबीय गेले होते, असं म्हटलं गेलं. पुढील तीन महिन्यांत अथिया आणि राहुल मुंबईत लग्नबद्ध होऊ शकतात, असं याच रिपोर्टमध्ये सांगण्यात आलं होतं.
काय म्हणाले सुनील शेट्टी?
आता सुनील शेट्टी यांनी लग्नाच्या या चर्चांवर प्रतिक्रिया दिली आहे. अथिया शेट्टी आणि केएल राहुलच्या लग्नाबाबत सुनील शेट्टींना विचारण्यात आलं की, “दोन्ही कुटुंबांनी लग्नाची तयारी सुरू केली आहे का?” त्यावर उत्तर देताना ते रेडिओ मिर्चीवर म्हणाले, “नाही, अजून कसलंही नियोजन झालेलं नाही.” काही दिवसांपूर्वी अथियाचा भाऊ अहान यानेसुद्धा असंच उत्तर दिलं होतं. दैनिक भास्करशी बोलताना तो म्हणाला होता, “जोपर्यंत लग्नाचा प्रश्न आहे, अद्याप कोणतीही व्यवस्था झालेली नाही. असं काहीही घडलेलं नाही. या सर्व केवळ अफवा आहेत. लग्न ठरलेलं नसताना आम्ही तुम्हाला तारीख कशी सांगू?”
इन्स्टा पोस्ट-
अथिया शेट्टीबद्दल बोलायचे झाल्यास तिने 2015 मध्ये सूरज पांचोलीसोबत ‘हिरो’ चित्रपटाद्वारे बॉलिवूडमध्ये पदार्पण केलं. यानंतर ती अर्जुन कपूरसोबत ‘मुबारका’ आणि नवाजुद्दीन सिद्दीकीसोबत 2019 मध्ये ‘मोतीचूर चकनाचूर’ या चित्रपटात दिसली आहे. आता अथिया लवकरच फुटबॉलपटू अफशान आशिकचा बायोपिक ‘होप सोलो’मध्ये मुख्य भूमिकेत दिसणार असल्याचं वृत्त आहे.
