कुरळे केस, गालावर खळी.. हुबेहूब नेहा कक्करसारखी दिसणाऱ्या तरुणीचा व्हिडीओ व्हायरल
नेहा कक्करच्या 'हल्का हल्का' या गाण्यावर अभिनय करणाऱ्या तरुणीचा हा व्हिडीओ तुफान व्हायरल होत आहे. नेहासारखाच गोल चेहरा, डोळे, कुरळे केस आणि गालावर खळी असा या तरुणीचा लूक पहायला मिळतोय. हुबेहूब नेहासारख्या दिसणाऱ्या या तरुणीचं नाव बिपाशा आहे.
मुंबई : सलमान खान, शाहरुख खान आणि अमिताभ बच्चन यांसारख्या बॉलिवूड सेलिब्रिटींसारखे हुबेहूब दिसणाऱ्यांना आपण अनेकदा पाहिलंय. त्यांना पाहिल्यावर चाहतेसुद्धा संभ्रमात पडतात. मात्र सध्या अशा एका गायिकेसारखी हुबेहूब दिसणारी तरुणी सोशल मीडियावर व्हायरल होत आहे, जी बॉलिवूडवर राज्य करतेय. या गायिकेची गाणी प्रदर्शित होताच हिट होतात तर सोशल मीडियावर त्यावरून लाखो नेटकरी व्हिडीओ बनवतात. ही गायिका आहे नेहा कक्कर. नेहासारखी हुबेहूब दिसणाऱ्या एका तरुणीच्या व्हिडीओने नेटकऱ्यांचं लक्ष वेधलं आहे. या दोघांच्या दिसण्यातील साम्य पाहून नेटकरीसुद्धा थक्क झाले आहेत.
नेहा कक्करच्या ‘हल्का हल्का’ या गाण्यावर अभिनय करणाऱ्या तरुणीचा हा व्हिडीओ तुफान व्हायरल होत आहे. नेहासारखाच गोल चेहरा, डोळे, कुरळे केस आणि गालावर खळी असा या तरुणीचा लूक पहायला मिळतोय. हुबेहूब नेहासारख्या दिसणाऱ्या या तरुणीचं नाव बिपाशा आहे. इन्स्टाग्रामवर ही तरुणी बऱ्यापैकी सक्रिय असून तिने स्वत:चे अनेक व्हिडीओ पोस्ट केले आहेत. हे व्हिडीओ पाहून ही तरुणी नेहा कक्करच आहे की काय, असा प्रश्न नेटकऱ्यांना पडला आहे. बिपाशाच्या या व्हिडीओला 2 लाख 36 हजारांहून अधिक लाइक्स मिळाले आहेत. ‘तू खरंच खूप क्युट आहेस, हुबेहूब नेहा कक्करसारखी दिसतेस’, असं एकाने लिहिलंय. तर ‘मी संभ्रमात पडलोय, तू नेहा कक्कर आहेस की हुबेहूब तिच्यासारखी दिसणारी दुसरी कोणी’, असा सवाल दुसऱ्या युजरने केला.
नेहा कक्करची गाणी तुफान गाजत असली तरी अनेकदा तिला ट्रोलिंगचाही सामना करावा लागतो. काही दिवसांपूर्वी तिने फाल्गुनी पाठकच्या ‘मैंने पायल है छनकाई’ या गाण्याचा रिमेक प्रदर्शित केला होता. ‘ओ सजना’ असं नाव तिने या रिमेकला दिलं होतं. मात्र हा रिमेक नेटकऱ्यांना अजिबात आवडला नव्हता. फाल्गुनीच्या चाहत्यांनीही तिला जोरदार ट्रोल केलं होतं. तर दुसरीकडे स्वत: फाल्गुनी पाठनेही नेहावर निशाणा साधला होता.
