गोविंदाला गोळी लागली तेव्हा त्याची पत्नी कुठे होती?; रुग्णालयात कोण घेतंय काळजी?
आज पहाटे 4.45 च्या सुमारास ही घटना घडली. गोविंदा कोलकाताला जाण्यासाठी निघाला होता. घरातून बाहेर पडताना तो त्याच्याकडे असलेली परवानाधारक रिव्हॉल्वर कपाटात ठेवत होता. त्यावेळी त्याच्या हातातून ती निसटली आणि त्यातून सुटलेली गोळी गोविंदाच्या पायाला लागली.
अभिनेता आणि शिवसेना नेता गोविंदाच्या गुडघ्याला गोळी लागल्यानंतर त्याला अंधेरीतल्या खाजगी रुग्णालयात दाखल करण्यात आलं आहे. गोविंदाच्या स्वत:च्याच रिव्हॉल्वरमधून ही गोळी सुटली आणि त्याच्या पायाला लागली. आज (मंगळवार) पहाटेच्या सुमारास ही घटना घडली. या घटनेनंतर पोलिसांनी गोविंदाची रिव्हॉल्वर जप्त केली असून याप्रकरणी ते पुढील तपास करत आहेत. गोविंदा कोलकातासाठी घरातून निघत होता, तेव्हा ही घटना घडली. यावेळी घरात त्याची पत्नी सुनितासुद्धा उपस्थित नव्हती. ‘इंडियन एक्स्प्रेस’शी बोलताना सुनिताने सांगितलं, “डॉक्टरांनी दिलेल्या माहितीनुसार गोविंदाची प्रकृती आता स्थिर आहे. मी सध्या मुंबईबाहेर आहे. याबद्दलची माहिती मिळताच मी इथून निघाले आहे. इथून थेट मी रुग्णालयात जाणार आहे.” गोविंदाचा भाचा आणि कॉमेडियन कृष्णा अभिषेकसुद्धा सध्या ऑस्ट्रेलियामध्ये आहे. मामाला गोळी लागल्याची माहिती मिळताच कृष्णाने त्यांच्या तब्येतीची विचारपूस केली.
गोविंदाचा मॅनेजर शशी सिन्हाने याविषयी माहिती देताना सांगितलं, “गोविंदाच्या प्रकृतीला आता कोणताही धोका नाही. सध्या त्याची प्रकृती स्थिर आहे. तो कोलकाताला जायला घरातून निघाला होता, तेव्हा ही घटना घडली. गोविंदा त्याची परवानाकृत रिव्हॉल्वर कपाटात ठेवत होता, त्याचवेळी ती चुकून खाली पडली आणि त्यातून सुटलेली गोळी गोविंदाच्या डाव्या पायाला गुडघ्याच्या खाली लागली. डॉक्टरांनी पायातून गोळी काढली आहे. सध्या रुग्णालयात गोविंदासोबत त्याची मुलगी टीना आहे. गोविंदा सर्वांशी बोलत असून त्याची प्रकृती स्थिर आहे.”
गोविंदाची मुलगी टीना अहुजा ‘इंडियन एक्स्प्रेस’शी बोलताना म्हणाली, “सध्या बाबा आयसीयूमध्ये आहेत. मी त्यांच्यासोबत आहे. मी फारसं काही बोलू शकत नाही. पण बाबांची प्रकृती आता ठीक आहे. त्यांच्या पायावर शस्त्रक्रिया करण्यात आली. डॉक्टरांनी सर्व चाचण्या केल्या असून रिपोर्ट्स ठीक आहेत. बाबांना किमान पुढील 24 तास आयसीयूमध्ये ठेवण्यात येईल. त्यानंतर त्यांच्या प्रकृतीवरून त्यांना आयसीयूमध्ये ठेवायचं की नाही ते डॉक्टर ठरवतील. त्यांच्या प्रकृतीविषयी काळजी करण्याचं कारण नाही.”
या घटनेनंतर गोविंदाने अद्याप कोणती पोलीस तक्रार नोंदवली नाही. मात्र लवकरच त्याच्या कुटुंबीयांकडून घटनेविषयीची सविस्तर माहिती देण्यात येईल, असं कळतंय.