रणबीरला ‘सिरीयल स्कर्ट चेझर’ म्हटल्यानंतर आता कंगना यांचं वक्तव्य चर्चेत
कंगना राणौत यांनी अभिनेता रणबीर कपूरवर गंभीर टीका केली होती. त्याला कंगना यांनी 'सिरीयल स्कर्ट चेझर' (स्कर्टमागे पळणारा) असं म्हटलं होतं. या वक्तव्यावर नुकत्याच दिलेल्या एका मुलाखतीत कंगना यांनी स्पष्टीकरण दिलं आहे.
अभिनेत्री आणि खासदार कंगना राणौत यांनी एका मुलाखतीत अभिनेता रणबीर कपूरवर टीका केली होती. 2020 मध्ये दिलेल्या या मुलाखतीत त्यांनी रणबीरला थेट ‘सिरीयल स्कर्ट चेझर’ असं म्हटलं होतं. आता नुकत्याच दिलेल्या एका मुलाखतीत कंगना यांनी त्यांच्या या वक्तव्यावरून घुमजाव केला आहे. कंगना आणि रणबीर यांनी एकत्र कधीच काम केलं नाही. मात्र इंडस्ट्रीतील घराणेशाहीवरून टीका करताना कंगना यांनी अनेकदा रणबीरवर निशाणा साधला आहे.
कंगना यांनी नुकतीच ‘आप की अदालत’ या कार्यक्रमात हजेरी लावली होती. या कार्यक्रमाचा ट्रेलर प्रदर्शित झाला असून त्यात पत्रकार रजत शर्मा हे कंगना यांना त्यांच्या जुन्या वक्तव्यावरून प्रश्न विचारताना दिसत आहेत. “रणबीरला तुम्ही सिरीयल स्कर्ट चेझर असं म्हटलं होतं. त्यावर काय प्रतिक्रिया द्याल”, असं त्यांना विचारलं होतं. हे ऐकून कंगना जोरात हसू लागतात आणि म्हणतात, “तुम्ही तर असं बोलताय जसं की तो स्वामी विवेकानंद असेल.”
2020 मध्ये अभिनेता सुशांत सिंह राजपूतच्या निधनानंतर फिल्म इंडस्ट्रीतील घराणेशाहीचा मुद्दा खूप चर्चेत होता. यावरून कंगना राणौत यांनी बरीच टीका केली होती. ऑगस्ट 2020 मध्ये केलेल्या ट्विटमध्ये कंगना यांनी लिहिलं होतं की, ‘फक्त इंडस्ट्रीबाहेरून, छोट्या आणि विनम्र कुटुंबातून येणाऱ्या कलाकारांवरच ही हिंदी इंडस्ट्री टीका करते. रणबीर कपूर तर ‘सिरीयल स्कर्ट चेझर’ आहे पण त्याला बलात्कारी म्हणण्याची हिंमत कोणातच नाही. दीपिका तर स्वयंघोषित मानसिक आजाराची रुग्ण आहे, पण कोणीच तिला सायको म्हणत नाही.’
‘आप की अदालत’च्या या प्रोमोमध्ये कंगना यांना निर्माता-दिग्दर्शक करण जोहरसोबतच्या वादावरूनही प्रश्न विचारण्यात आला. “करणला तू चाचा चौधरी असं म्हटलं होतंस”, असं पत्रकार कंगना यांना विचारतात. त्यावर कंगना म्हणतात, “मी कधीच स्वत:हून आधी त्यांच्यावर निशाणा साधला नाही. मी माझं काम करत राहिले असते जर मला त्यांनी टीका करण्यास उत्तेजित केलं नसतं. त्यांनीच मुद्दा दिला, म्हणून मी सुद्धा गप्प राहिले नाही.”
याआधी आरजे सिद्धार्थ कन्ननला दिलेल्या मुलाखतीत कंगना यांनी खुलासा केला होता की रणबीरने त्याच्या ‘संजू’ या चित्रपटातील एका भूमिकेची ऑफर त्यांना दिली होती. “रणबीर स्वत:हून माझ्या घरी आला आणि म्हणाला की संजू या चित्रपटात काम कर प्लीज. पण मीच त्याला नकार दिला”, असं कंगना यांनी स्पष्ट केलं.