‘तारक मेहता..’ला मिळाली चौथी सोनू; कोण आहे ही नवी अभिनेत्री?
'तारक मेहता का उल्टा चष्मा' या मालिकेत नव्या अभिनेत्रीची एण्ट्री झाली आहे. सोनू भिडेच्या भूमिकेत ही अभिनेत्री झळकणार असून तिने पलक सिधवानीची जागा घेतली आहे. काही दिवसांपूर्वीच पलकने ही मालिका सोडली होती.
टेलिव्हिजनवरील सर्वांत लोकप्रिय मालिका ‘तारक मेहता का उल्टा चष्मा’ गेल्या काही दिवसांपासून सतत चर्चेत आहे. या मालिकेत सोनू भिडेची भूमिका साकारणारी अभिनेत्री पलक सिधवानीने निर्मात्यांवर काही आरोप केले होते. पलक मालिका सोडण्याच्या तयारीत असताना निर्मात्यांनी तिला कायदेशीर नोटीस बजावली होती. या वादानंतर अखेर पलकने या मालिकेला रामराम केला. त्यानंतर मालिकेत सोनूची भूमिका कोण साकारणार, याकडे सर्वांचं लक्ष वेधलं होतं. आता ‘तारक मेहता..’मध्ये नव्या सोनूची एण्ट्री झाली आहे. मालिकेत सोनूची भूमिका साकारणारी ही चौथी अभिनेत्री आहे. याआधी तीन कलाकारांनी ही भूमिका साकारली होती.
निर्मात्यांनी सोनूच्या भूमिकेसाठी खुशी मालीची निवड केली आहे. ‘तारक मेहता..’च्या इन्स्टाग्राम अकाऊंटवर याची अधिकृतरित्या घोषणा झाली आहे. 7 ऑक्टोबरपासून खुशी या मालिकेती सोनूची भूमिका साकारणार असल्याचं त्यात म्हटलंय. गोकुलधाममध्ये तिचं भव्य स्वागत करण्यात येईल. त्यामुळे सोनूच्या भूमिकेत खुशी काय कमाल दाखवणार, हे पाहण्यासाठी चाहते उत्सुक आहेत.
‘तारक मेहता..’मध्ये याआधी अभिनेत्री झील मेहताने 2008 ते 2012 या कालावधीत सोनूची भूमिका साकारली होती. त्यानंतर निधी भानुशालीची या भूमिकेसाठी निवड झाली. 2012 ते 2019 या कालावधीत ती सोनूच्या भूमिकेत झळकली होती. नंतर 2019 मध्ये पलक सिधवानीची या भूमिकेसाठी निवड झाली होती. तिने गेल्या महिन्यात ही मालिका सोडली. मालिकेत सोनूच्या भूमिकेतील कलाकार जरी बदलले तरी त्या भूमिकेला प्रेक्षकांकडून सतत प्रेम मिळालं आहे. हेच प्रेम आता खुशीलाही मिळतं का, हे पाहणं औत्सुक्याचं ठरणार आहे.
खुशी मालीने याआधी ‘साझा सिंदूर’ या मालिकेत काम केलं होतं. अभिनयात काम करण्यापूर्वी ती मॉडेलिंग करत होती. तिने काही जाहिराती आणि ब्रँड्ससोबत कोलॅबरेशनही केलंय. खुशी सोशल मीडियावर बरीच सक्रिय असते. इन्स्टाग्रामवर तिचे 56 हजार फॉलोअर्स आहेत. ती अनेक फॅशन कॅम्पेन्समध्येही झळकली आहे. ‘तारक मेहता..’सारख्या लोकप्रिय मालिकेत काम करण्यात ती फारच उत्सुक आहे.