मनसे मेळाव्यात प्राजक्ता माळीची हजेरी; म्हणाली ‘जसं फिल्मफेअर जाणं गरजेचं तसंच..’

Prajakta Mali

Image Credit source: Instagram

दादरमधील शिवाजी पार्क (Shivaji Park) मैदानात दोन वर्षांनंतर गुढीपाडव्यानिमित्त मनसेचा (MNS) मेळावा पार पडला. या मेळाव्यात राज ठाकरेंनी (Raj Thackeray) आक्रमक हिंदुत्वाची भूमिका मांडली. तुम्ही जसं राजकारण केलं तसंच समोरचे राजकारण करणार, असं सांगत राज यांनी भाजपच्या भूमिकेचं समर्थन केलं आणि राज्यातील महाविकास आघाडीच्या कारभारावर सडकून टीका केली. या मेळाव्याला मराठी चित्रपटसृष्टीतील लोकप्रिय अभिनेत्री प्राजक्ता माळी (Prajakta Mali) हिनेदेखील हजेरी लावली होती. त्याचे व्हिडीओ तिने नुकतेच सोशल मीडियावर पोस्ट केले आहेत. हे व्हिडीओ पाहून आपण राजकीय पक्षात प्रवेश केला की काय, असा गैरसमज टाळण्यासाठी तिने कॅप्शनमध्ये सुरुवातीलाच स्पष्ट केलं. ‘काल आयुष्यात पहिल्यांदा राजकीय सभा अनुभवली’, असंदेखील तिने या व्हिडीओच्या कॅप्शनमध्ये लिहिलं आहे.

प्राजक्ता माळीची पोस्ट-

‘नाही नाही, कोणत्याही राजकीय पक्षात प्रवेश केला नाही. काल आयुष्यात पहिल्यांदा राजकीय सभा अनुभवली (खूप दिवसांपासून अनुभवायचीच होती) ते फक्त तुमच्याबरोबर शेअर करतेय, इतकाच हेतू. कलाकारनंतर आधी मी माणूस- सामाजिक प्राणी आहे. त्याच्या समृद्धीकरता पण झटायला हवं. जसं फिल्मफेअर जाणं गरजेचं तसंच हेही, म्हणून हा घाट. (After all आता माझ्या आधार कार्डवर मुंबईचा पत्ता आहे), अशी पोस्ट प्राजक्ताने लिहिली आहे. यासोबतच तिने #सर्वांगीणविकास #समग्रजीवन #राजकारण #मुंबई असे हॅशटॅग दिले आहेत.

प्राजक्ताच्या या पोस्टवर अनेकांनी प्रतिक्रिया दिल्या आहेत. ‘कौतुक करावं तेवढं कमीच’, असं एकीने लिहिलंय. तर कसा होता अनुभव, असा प्रश्न दुसऱ्या युजरने विचारला. ‘काही का असेना पण हा वेळ वाया जाणार नाही, काहीतरी फायदा नक्कीच होणार’, असंही एकाने म्हटलं.

हेही वाचा:

Tu Tevha Tashi: अभिनयावरील प्रेमापोटी सोडली नोकरी; रिॲलिटी शोमध्येही कमावलं नाव

शाहरुख, सलमान, सैफ, अक्षयने सौदी अरबच्या मंत्र्यांची घेतली भेट; नेमकं काय आहे कारण?