रंगभूमीचा पडदा उघडताच पहिला नाट्य प्रयोग वांद्र्यात रंगणार, ‘एका लग्नाची पुढची गोष्ट’ने तिसरी घंटा वाजणार!
मोठ्या संघर्षानंतर 22 ऑक्टोबरपासून रंगभूमीचा पडदा उघडणार असल्याच्या निमित्ताने वांद्रे पश्चिम रंगशारदा येथे त्याचा आनंद साजरा करीत मराठी नाटकाचा पहिला प्रयोग समारंभपूर्वक रंगणार आहे.
मुंबई : ज्या मराठी माणसाचे आणि नाटकाचे अतूट नाते आहे त्या नाट्यरसिक आणि रंगदेवतेची राज्य शासनाच्या उदासीनतेमुळे अनेक महिने ताटातूट झाली. आता मोठ्या संघर्षानंतर 22 ऑक्टोबरपासून रंगभूमीचा पडदा उघडणार असल्याच्या निमित्ताने वांद्रे पश्चिम रंगशारदा येथे त्याचा आनंद साजरा करीत मराठी नाटकाचा पहिला प्रयोग समारंभपूर्वक रंगणार आहे.
अनलाँक 2 सुरू होऊन अनेक क्षेत्रांना मुभा देण्यात आली, तरी नाट्यगृहाचा पडदा मात्र उघडण्यास काहीसा उशीरच झाला आहे. त्यामुळे कलावंतावर उपासमारीची वेळ आली. त्यांनी सरकार विरोधात आंदोलन केले तिथेही सरकारने त्यांची उपेक्षाच केली. या मराठी कालावंताच्या लढ्यात सहभागी होऊन त्यांच्या संघर्षाला पाठबळ देणाऱ्या भाजपा नेते आमदार अँड. आशिष शेलार यांनी समारंभपुर्वक नाटकाला आता सुरुवात करायचे ठरवले आहे.
विनामूल्य प्रवेश
22 आक्टोबर रोजी संध्याकाळी 5 वाजता वांद्रे पश्चिम रंगशारदा येथे या निमित्ताने अभिनेते प्रशांत दामले यांच्या गाजलेल्या “एका लग्नाची पुढची गोष्ट” या नाटकाचा एक खास प्रयोग ठेवण्यात आला आहे. यावेळी शासनाच्या नियमितपणे 50 टक्के क्षमतेनेच विनामूल्य प्रवेश रसिकांना देण्यात येणार असून, रेड कार्पेट अंथरून व गुलाबाचे फुल देऊन नाट्य रसिकांचे स्वागत करण्यात येणार आहे. या प्रयोगासाठी काही मराठी कलावंताना देखील खास आमंत्रित करण्यात येणार आहे.
तसेच, गेल्या पावणेदोन वर्षात मराठी रंगभूमीवरील पडद्यामागच्या कलावंत, तंत्रज्ञ यांची ससेहोलपट झाली. त्यांना अनेक संस्था आणि व्यक्तींनी त्यांना मदत केली. यामध्ये अभिनेते प्रशांत दामले, अशोक हांडे यांच्यासह काही सामाजिक संस्थांचा सहभाग होता. यातील काही व्यक्ती आणि संस्थांचा प्रतिनिधीक सत्कार ही यावेळी करण्यात येणार आहे.
तिसऱ्या घंटेसाठी नियम
कोव्हिड 19 विषाणूंच्या प्रादुर्भावास प्रतिबंध करण्यासाठी शासनाने काढलेल्या आदेशान्वये लागू केलेले विविध निर्बंध आता शिथिल केले जात आहेत. कोविड 19 च्या पार्श्वभूमीवर बंद पडलेली सभागृहे आणि मोकळ्या जागेत होणारे इतर कार्यक्रम सुरु करण्यास परवानगी देण्यासंदर्भात या क्षेत्रातील विविध संघटना आणि संस्थांकडून शासनाला विनंत्या प्राप्त झालेल्या आहेत. त्यानुसार नियम पाळून नाट्यगृह पुन्हा सुरु करण्याची परवानगी देण्यात येत आहे.
काय आहेत नियम
- सभागृहात प्रवेश देताना थर्मल टेस्टद्वारे प्रेक्षकांच्या शारीरिक तापमानाची चाचणी घेऊनच प्रवेश देणे ही सभागृह व्यवस्थापनाची/आयोजकांची जबाबदारी असेल.
- बंदिस्त सभागृहाच्या एकूण बैठक क्षमतेच्या 50 टक्के इतक्या मर्यादेपेक्षा प्रेक्षक संख्या जास्त असू नये.
- बंदिस्त सभागृहातील व्यासपीठ व प्रेक्षकांमध्ये शासनाने वेळोवेळी दिलेल्या निर्देशानुसार सामाजिक अंतर राखणे (किमान 6 फूट) आवश्यक राहिल.
- बैठक व्यवस्थेत सामाजिक अंतर राखणे आवश्यक राहील.
- बंदिस्त सभागृहातील सादरकर्त्या कलाकारांनी वेळोवेळी वैद्यकीय तपासणी करणे आवश्यक राहिल.
- आरोग्य सेतू अॅप इन्स्टॉल करुन ते दिवसभर सुरु ठेवावयाचे आहे. तसेच बालकलाकारां व्यतिरिक्त सर्व कलाकार/ आयोजक व साह्यभूत कर्मचारी वर्गाचे संपूर्ण कोव्हिड प्रतिबंधक लसीकरण (दोन डोस व दुसऱ्या डोसनंतर 14 दिवसांचा कालावधी पूर्ण झालेला असणे आवश्यक असेल.) झालेले असणे आवश्यक असेल. बाल कलाकारांची आरोग्य सेतू अॅपवरील आरोग्य स्थिती सुरक्षित असणे आवश्यक राहील तसेच त्यांची आरोग्यदृष्ट्या वारंवार तपासणी होणे आवश्यक राहील. तसेच प्रेक्षकांचे कोव्हिड प्रतिबंधक लसीकरण झाले असणे अथवा आरोग्य सेतुवरील त्यांची आरोग्य स्थिती “सुरक्षित” अशी दर्शवलेली असणे आवश्यक राहील.
- सभागृहातील सर्व परिसर / खोल्या / प्रसाधनगृहे वेळोवेळी स्वच्छ करणेबाबत सभागृह व्यवस्थापनाने वेळापत्रक आखणे आणि प्रसाधन गृहांची वेळेवर स्वच्छता केल्याची खातरजमा करावी. तसेच, वेळोवेळी निर्जंतुकीकरण करण्यात यावे. प्रशासन याशित सर्वांनी मास्क लावणे आवश्यक राहील.
हेही वाचा :
Death Anniversary | किशोर कुमार यांना आधीच आला होता मृत्यूचा अंदाज, गंमतीत बोलले अन् खरी झाली घटना!