तुमचं वय घरी ठेवून या..; वर्षा उसगांवकरांना सुनावणाऱ्या निक्कीला अभिनेत्रीचा पाठिंबा

Nikki Tamboli and Varsha Usgaonkar

Image Credit source: Instagram

बिग बॉस मराठीचा पाचवा सिझन सध्या चांगलाच गाजतोय. या सिझनमध्ये एकूण 16 स्पर्धक सहभागी झाले असून प्रत्येकाचं वागणं, बोलणं, स्वभाव एकमेकांपासून खूप वेगळा आहे. हे वेगळेपण असूनही बिग बॉसच्या घरात जो शेवटपर्यंत टिकून राहतो, तोच खरा विजेता ठरतो. या शोच्या पहिल्याच आठवड्यात निक्की तांबोळी आणि वर्षा उसगांवकर यांच्यात जोरदार भांडण झाल्याचं पहायला मिळालं. या भांडणादरम्यान निक्की वर्षा यांना बरंच काही बोलून जाते. ही गोष्ट बिग बॉसच्या घरातील इतर सदस्यांना, सूत्रसंचालक रितेश देशमुखला आणि नेटकऱ्यांनाही पटली नाही. वर्षा उसगांवकर या मराठी चित्रपटसृष्टीतील दिग्गज कलाकार असून त्या निक्कीपेक्षा वयानेही खूप मोठ्या आहेत. त्यामुळे त्यांच्यासोबत अशा पद्धतीने वागणं बरं नाही, अशा प्रतिक्रिया अनेकांनी दिल्या. मात्र या सगळ्यात एक अभिनेत्री अशीही आहे, जिने वर्षा यांना नाही तर निक्कीला पाठिंबा दिला आहे. या अभिनेत्रीची पोस्ट सोशल मीडियावर चर्चेत आली आहे.

ही अभिनेत्री दुसरी-तिसरी कोणी नसून मीरा जगन्नाथ आहे. मीराने बिग बॉस मराठीच्या याआधीच्या सिझनमध्ये स्पर्धक म्हणून भाग घेतला होता. बिग बॉसच्या घरात कोणीच छोटा किंवा मोठा कलाकार नसतो, असं तिचं म्हणणं आहे. मीराने तिच्या इन्स्टाग्राम स्टोरीमध्ये याबद्दलची पोस्ट लिहिली आहे. ज्यात तिने निक्कीच्या वागण्याचं समर्थन केलं आहे.

मीरा जगन्नाथची पोस्ट-

‘इथे कोणीही मान-अपमानाची अपेक्षा ठेवू नये. बिग बॉसच्या घरात कोणीही मोठा कलाकार किंवा छोटा कलाकार नसतो आणि तुमचं वय घरी ठेवून या’, असं तिने थेट म्हटलंय. ‘हे माझं मत आहे, ज्यांना पटत नसेल त्यांनी मला डीएम (डायरेक्ट मेसेज) करू नये’, असंही तिने पोस्टच्या अखेरीस स्पष्ट केलंय.

निक्की तांबोळीवर रितेशसुद्धा भडकला होता. “वर्षा ताईंसोबत ज्या भाषेत तुम्ही बोललात, ती भाषा मी खपवून घेणार नाही. त्यांचं कतृत्व, काम याचा रिस्पेक्ट झालाच पाहिजे. तुमचा उद्धटपणा महाराष्ट्राच्या प्रत्येक घरात आणि प्रत्येक मराठी माणसापर्यंत पोहोचला आहे. कारण तुम्ही थेट मराठी माणसाच्या मानसिकतेवर प्रश्नचिन्ह उपस्थित करुन त्या मराठी माणसाचा अपमान केलाय”, अशा शब्दांत रितेशने निक्कीला सुनावलं.

नेमकं काय घडलं होतं?

‘बिग बॉस’च्या घरात प्रत्येक सदस्याला बीबी करन्सी खर्च करून सामान विकत घ्यावं लागतंय. त्यातच बेड खरेदी न केल्याने बिग बॉसने सर्वांना जमिनीवर झोपावं लागेल असे आदेश दिले. तसंच घरात दिवसभर कोणीही बेडचा वापर करू नये, असंही सांगण्यात आलं होतं. तरीही काही स्पर्धकांकडून या नियमाचा भंग झाला आणि त्याचीच शिक्षा म्हणून बिग बॉसने संपूर्ण आठवडाभार बेडचा वापर करायचा नाही, अशी शिक्षा सुनावली आहे. यावरून निक्की वर्षा यांच्यावर भडकली होती. “तुमच्यामुळे आम्हाला भोगावं लागतंय. तुम्ही बाहेर खूप मोठ्या असाल पण घरात सगळेच सारखे आहेत”, अशा शब्दांत ती उसगांवकर यांना सुनावते.