नरेंद्र मोदींना मुस्लिमांच्या जाळीदार टोपीत पहायचंय; नसीरुद्दीन शाह असं का म्हणाले?

याचा अर्थ तुम्ही नरेंद्र मोदींना उल्लू म्हणत आहात का? या पुढच्या प्रश्नावर नसीरुद्दी शाह म्हणाले, मी तसे म्हणालो नाही. मी घुबड म्हणालो.

Image Credit source: Instagram

नसीरुद्दीन शाह हे बॉलिवूड इंडस्ट्रीतील दमदार अभिनेत्यांपैकी एक आहेत. अभिनयासोबतच ते त्यांच्या बेधडक वकव्यांमुळे नेहमी चर्चेत असतात. विविध मुलाखतींमध्ये ते राजकीय आणि सामाजिक विषयांवर मोकळेपणे व्यक्त होतात. नुकत्याच दिलेल्या एका मुलाखतीत त्यांनी लोकसभा निवडणुकीच्या निकालावर प्रतिक्रिया दिली. भविष्यात हे कोणत्या गोष्टीचं सूचक आहे, हेसुद्धा त्यांनी सांगितलं. नसीरुद्दीन शाह हे असंही म्हणाले की जर पंतप्रधान नरेंदी मोदी मुस्लिमांना ही गोष्ट समजावू शकले की ते त्यांचा द्वेष करत नाही, तर त्यांना खूप मदत होईल. ही गोष्ट सांगतानाच त्यांनी मोदींच्या जुन्या घटनेची आठवण करून दिली, ज्यावेळी त्यांनी मुस्लिमांची जाळीदार टोपी घालण्यास नकार दिला होता. या गोष्टीला विसरणं कठीण असल्याचं त्यांनी सांगितलं.

‘द वायर’ला दिलेल्या मुलाखतीत नसीरुद्दीन शाह यांना विचारलं गेलं की त्यांना जेव्हा समजलं की भाजपला बहुमत मिळालं नाही, 10 वर्षांमध्ये निवडणुकीत सर्वांत वाईट कामगिरी केली आणि देशात आघाडीचं सरकार येईल, तेव्हा त्यांच्या डोक्यात कोणता विचार आला? त्यावर ते म्हणाले, “सर्वांत आधी तर मला बरं वाटलं. नंतर मी स्वत:ला म्हटलं की ही पराभूत झालेल्यांसाठी, जिंकणाऱ्यांसाठी, हिंदू, मुस्लीम, सरकार आणि आपल्या सर्वांसाठी आत्मपरीक्षणाची वेळ आहे.” या नव्या सरकारकडून तुम्ही कोणत्या बदलाची अपेक्षा करता, असं विचारलं असता ते पुढे म्हणाले, “मोदींना विविध प्रकारच्या हेडगिअर्सचा (डोक्यावर घालणाऱ्या टोप्या) शौक असल्याचं पहायला मिळतं. त्यामुळे मला त्यांना जाळीदार टोपीमध्ये पहायचंय. मला योग्य मुस्लीमसुद्धा पहायचे आहेत. द्वेषाचा प्रचार बंद व्हावा अशी माझी इच्छा आहे. मला अधिकाधिक महिलांना संसदेत पहायचंय. मोदींना अहंकार खूप आहे, ते कधीच या गोष्टीचा स्वीकार करणार नाहीत की जर चुकी केली आहे तर एक हावभाव म्हणून का होईना जाळीदार टोपी घातली पाहिजे.”

“एका कार्यक्रमात जेव्हा त्यांना काही मौलवींनी जाळीदार टोपी दिली तेव्हा त्यांनी ती घालण्यास नकार दिला होता. या गोष्टीला विसरणं खूप कठीण आहे. मोदींनी ती टोपी घातली असती तर आम्ही वेगळे नाही आहोत, हे ते मुस्लिमांना समजावू शकले असते. त्यांनी जाळीदार टोपी घातली तर त्याचा अर्थ असाच होणार की ते मुस्लीमसुद्धा या देशाचे नागरिक आहेत. ते त्यांचा द्वेष करत नाही, हे ते स्पष्ट करू शकले असते”, असं मत नसीरुद्दीन शाह यांनी मांडलं.