Mi Punha Yein: सत्तानाट्यावर आधारित ‘मी पुन्हा येईन’ वेब सीरिजचा जबरदस्त टीझर पाहिलात का?

सत्तानाट्यावर आधारित 'मी पुन्हा येईन' वेब सीरिजचा जबरदस्त टीझर

Image Credit source: Youtube

महाराष्ट्राच्या राजकारणानं (Maharashtra Politics) गेल्या काही दिवसांत मोठे भूकंप पाहिले. शेवटपर्यंत कुणालाच माहिती नव्हतं की काय होईल? एखाद्या सस्पेंस सिनेमापेक्षाही जबरदस्त असा क्लायमॅक्स सगळ्यांनी पाहिला. राजकीय घडामोडींच्या या पार्श्वभूमीवर वेबविश्वातही एक मोठी घडामोड घडणार आहे. लवकरच प्लॅनेट मराठी (Planet Marathi) ओटीटीवर सत्तानाट्यावर आधारित ‘मी पुन्हा येईन’ (Mi Punha Yein) नावाची वेब सीरिज येणार आहे. अरविंद जगताप यांचं लिखाण आणि दिग्दर्शन असलेल्या या वेब सीरिजची निर्मिती प्लॅनेट मराठी, गौतम कोळी आणि जेम क्रिएशन्सने केली आहे. या वेब सीरिजमध्ये सयाजी शिंदे, उपेंद्र लिमये, भारत गणेशपुरे, सिद्धार्थ जाधव, प्रभाकर मोरे, अमित तडवळकर, रमेश वाणी, संजय कुलकर्णी, राजेश दुर्गे, राजेंद्र गुप्ता, रुचिका जाधव, सीमा कुलकर्णी आणि दिप्ती क्षीरसागर अशी कलाकारांची मोठी फौज आहे.

टीझरमध्ये दोन पक्षाचे नेते सत्तेसाठी आमदारांची कशी पळवापळवी, फोडाफोडी करत आहेत, हे दिसत आहे. एवढंच नाही तर शासकीय यंत्रणांचाही कसा बेमालूमपणे वापर केला जातो आणि अधिकारीवर्गही यात आपली पोळी कशी भाजून घेतात, हे या टीझरमधून पहायला मिळतंय. राजकारणावर आधारित या वेब सीरिजमध्ये सत्तालोलूपता, कपट-कारस्थान, संधीसाधूपणा, आमदारांची मेगाभरती, फोडाफोडी, पळवापळवी आणि सध्या चर्चेत असलेलं ‘रिसॉर्ट पॉलिटिक्स’ असा सगळा मसाला पाहायला मिळणार आहे.

पहा टीझर-

‘मी पुन्हा येईन’ या वेब सीरिजबद्दल प्लॅनेट मराठीचे प्रमुख, संस्थापक अक्षय बर्दापूरकर म्हणतात, “सध्याच्या राजकीय घडामोडींचा आणि या सीरिजचा तसा अर्थाअर्थी काहीही संबंध नाही, पण सिनेमात किंवा वेब सीरीजमध्ये तेच पाहायला मिळतं जे आपल्या आजूबाजूला घडतं. त्यामुळे अगदीच असत्य घटनांवर आधारित ही वेब सीरीज असली तरी राजकीय कुलंगड्या, शह-काटशह हे पाहण्यात प्रेक्षकांना रस असतो हे स्पष्ट आहे. प्रेक्षकांच्या मनोरंजनाची हीच गरज ‘मी पुन्हा येईन’ ही वेब सीरिज पूर्ण करेल.” ‘मी पुन्हा येईन’ लवकरच प्लॅनेट मराठी या ओटीटी प्लॅटफॉर्मवर प्रेक्षकांना पाहायला मिळणार आहे.