सर्वसामान्यांच्या रांगेतून घेतलं लालबागचा राजाचं दर्शन; प्रसिद्ध अभिनेत्याचं नेटकऱ्यांकडून कौतुक
लालबागचा राजाची एक झलक पाहण्यासाठी भाविक तासनतास रांगेत उभे राहतात. मात्र सेलिब्रिटींना अवघ्या काही क्षणात बाप्पाचं दर्शन घेता येतं, अशी अनेकांची तक्रार आहे. अशातच एका प्रसिद्ध अभिनेत्याने सर्वसामान्यांच्या रांगेतून लालबागचा राजाचं दर्शन घेतलं आहे.
गणेशोत्सवात लालबागचा राजाचं दर्शन घेण्यासाठी दरवर्षी मोठीच्या मोठी रांग असते. सर्वसामान्य भक्त नऊ-दहा तर कधीकधी त्यापेक्षा जास्त तास रांगेत उभं राहून बाप्पाचं दर्शन घेतात. बाप्पाची एक झलक पाहण्यासाठी ते गर्दीत बरीच प्रतीक्षा करतात. अशातच सेलिब्रिटींना मात्र व्हिआयपी रांगेतून बाप्पाच्या चरणी काही मिनिटांत जाऊ देत असल्याची अनेकांची तक्रार असते. सर्वसामान्यांना बाप्पाच्या चरणावर एक सेकंदही डोकं टेकवू दिलं जात नाही. पण सेलिब्रिटींना तिथे उभं राहून फोटो काढण्याचीही मुभा मिळते. सर्वसामान्य भक्त आणि सेलिब्रिटी यांच्यातील हा फरक सतत सोशल मीडियावर चर्चेत असताना आता एका प्रसिद्ध बॉलिवूड अभिनेत्याचा व्हिडीओ व्हायरल होत आहे. बॉलिवूडमधील या प्रसिद्ध अभिनेत्याने व्हिआयपी रांगेतून नाही तर सर्वसामान्यांच्या रांगेतून लालबागचा राजाचं दर्शन घेतलं आहे.
हा अभिनेता दुसरा तिसरा कोणी नसून रणदीप हुडा आहे. रणदीप हा आताच्या घडीतील दमदार अभिनेत्यांपैकी एक आहे. रणदीप त्याच्या कामासोबतच साधेपणासाठी खूप ओळखला जातो. शुक्रवारी तो पत्नी लिन लैशरामसोबत लालबागचा राजाच्या दर्शनासाठी पोहोचला होता. यावेळी त्याने व्हिआयपी रांगेतून न जाता सर्वसामान्यांच्या गर्दीतून पुढे जाऊन बाप्पाचं दर्शन घेतलं. रणदीपच्या याच कृतीने नेटकऱ्यांची मनं जिंकली आहेत. रांगेत उभ्या असलेल्या रणदीपचा आणि त्याची पत्नी लिनचा हा व्हिडीओ सध्या सोशल मीडियावर व्हायरल होत आहे.
Randeep Hooda and Lin Laishram, skip VIP privileges for Lalbaug cha Raja darshan, get applauded by people@randeephooda @LinLaishram pic.twitter.com/BtgNP0yalj
— Urban Asian (@UrbanAsian) September 13, 2024
रणदीपने गेल्या वर्षी नोव्हेंबर महिन्यात लिनशी लग्न केलं. या दोघांनी इंफाळमध्ये 29 नोव्हेंबरमध्ये लग्नगाठ बांधली. त्यानंतर मुंबईत रिसेप्शनचं आयोजन करण्यात आलं होतं. रणदीप आणि लिनचं हे लग्न अनेकांसाठी अनोखं होतं. कारण मणिपुरी पद्धतीने हा लग्नसोहळा पार पडला होता. सेलिब्रिटींचा असा अनोखा लग्नसोहळा नेटकऱ्यांनीही पहिल्यांदाच पाहिलं होतं. रणदीप हा 47 वर्षाचा आहे. तर लिन ही 37 वर्षाची आहे. दोघांमध्ये 10 वर्षांचं अंतर आहे.
रणदीपची पत्नी लिन ही प्रसिद्ध मॉडेल आणि अभिनेत्री आहे. ती एक बिझनेस वुमनही आहे. या मल्टिटॅलेंटेड अभिनेत्रीने सिनेमा क्षेत्रात आपली वेगळी ओळख तयार केली आहे. लिनने अनेक बड्या अभिनेत्रींसोबत काम केलं आहे. प्रियांका चोप्रसह करीना कपूरपर्यंतच्या अनेक अभिनेत्रींसोबत तिने काम केलं आहे.