ईदनिमित्त शाहरुख-सलमानच्या घराबाहेर चाहत्यांचा पूर; पोलिसांकडून सौम्य लाठीचार्ज
दरवर्षी रमजान ईदनिमित्त अभिनेता सलमान खान आणि शाहरुख खान यांचे असंख्य चाहते त्यांची एक झलक पाहण्यासाठी घराबाहेर जमा होतात. गुरुवारी वांद्रे इथल्या सलमानच्या 'गॅलेक्सी' अपार्टमेंटबाहेर आणि शाहरुखच्या 'मन्नत' बंगल्याबाहेर चाहत्यांचा पूर पहायला मिळाला.
दरवर्षी रमजान ईदनिमित्त बॉलिवूड अभिनेता सलमान खान आणि शाहरुख खान यांची एक झलक पाहण्यासाठी चाहते त्यांच्या घरासमोर गर्दी करतात. यंदाही सलमानला भेटण्यासाठी चाहत्यांनी वांद्रे इथल्या त्याच्या ‘गॅलेक्सी’ अपार्टमेंटसमोर गर्दी केली होती. सलमानच्या घरासमोर जमलेल्या या गर्दीमुळे वाहतुकीला अडथळा निर्माण झाला होता. अखेर ही गर्दी पांगवण्यासाठी पोलिसांनी सौम्य लाठीचार्ज केला. दुसरीकडे शाहरुख खानच्या ‘मन्नत’ बंगल्याबाहेरही चाहत्यांनी तुफान गर्दी केली होती. किंग खानची एक झलक पाहण्यासाठी चाहते तासनतास बंगल्याबाहेर उन्हात उभे होते. अखेर शाहरुखने बंगल्याच्या बाल्कनीमध्ये येत चाहत्यांना अभिवादन केलं.
बॉलिवूड इंडस्ट्रीत कितीही नवनवीन अभिनेते आले तरी सलमान खान आणि शाहरुख खान यांची लोकप्रियता तसूभरही कमी होत नाही. उलट दिवसेंदिवस त्यांचा चाहतावर्ग वाढतच जातोय. दरवर्षी रमजान ईदनिमित्त आपल्या या लाडक्या कलाकाराची एक झलक पाहण्यासाठी चाहते त्यांच्या बंगल्याबाहेर मोठ्या संख्येने गर्दी करतात. वांद्रे इथल्या बँडस्टँड परिसरात सकाळपासूनच चाहते जमा होऊ लागले होते. रात्री सलमान आणि त्याचे वडील सलीम खान यांनी आपल्या घराच्या गच्चीतून चाहत्यांना अभिवादन करत ईदच्या शुभेच्छा दिल्या. घरासमोरील रस्त्याच्या एका बाजूला या चाहत्यांना उभं राहण्यासाठी सांगण्यात आलं होतं. पण नंतर ही गर्दी वाढतच गेली.
सोशल मीडियावर सलमान आणि शाहरुख खानचे हे व्हिडीओ व्हायरल होत असून त्यात जमलेला जनसमुदाय भारावून टाकणारा आहे. दरवर्षी ईदच्या मुहूर्तावर सलमान खानचा नवीन चित्रपट थिएटरमध्ये प्रदर्शित होतो. मात्र यंदाची ईद अपवाद ठरली. सलमानने 2025 मध्ये ईदच्या मुहूर्तावर ‘सिकंदर’ हा चित्रपट प्रेक्षकांच्या भेटीला येणार असल्याची घोषणा सोशल मीडियाद्वारे केली.
केवळ ईदलाच नाही तर सलमान आणि शाहरुखच्या वाढदिवशीसुद्धा त्यांच्या बंगल्याबाहेर चाहत्यांची अशीच गर्दी जमते. गेल्या अनेक वर्षांपासून हे दोघं त्यांच्या चित्रपटांच्या माध्यमातून चाहत्यांचं मनोरंजन करत आहेत. केवळ भारतातच नाही तर परदेशातही सलमान आणि शाहरुखचा मोठा चाहतावर्ग आहे. या दोघांना एकत्र पाहणंही चाहत्यांसाठी जणू पर्वणीच असते.
