Sayali Sanjeev: ऋतुराज गायकवाडसोबत अफेअरच्या चर्चांवर अखेर सायली स्पष्टच बोलली; “आम्ही बोलायचो पण..”

Ruturaj Gaikwad and Sayali Sanjeev

Image Credit source: Instagram

मुंबई: क्रिकेटर ऋतुराज गायकवाड आणि मराठमोळी अभिनेत्री सायली संजीव यांच्या अफेअरच्या चर्चा गेल्या अनेक महिन्यांपासून होत आहेत. सायलीच्या एका फोटोवर ऋतुराजने कमेंट केली आणि त्यावरूनच या चर्चांना उधाण आलं. सायलीने अनेकदा या चर्चा फेटाळल्या आहेत. ऋतुराज आणि माझ्यात चांगली मैत्री आहे, असं तिने म्हटलं होतं. आता नुकत्याच दिलेल्या एका मुलाखतीत तिने पुन्हा एकदा अफेअरच्या चर्चांवर प्रतिक्रिया दिली आहे.

काय म्हणाली सायली?

“आमच्यात काहीच सुरू नाही. या अफवांमुळे आमच्यात जी मैत्री होती ती सुद्धा संपली आहे. मित्र म्हणून आम्ही एकमेकांशी बोलू शकत नाही आहोत. आमच्यात काहीच नव्हतं. आमचं एकमेकांशी नातं का जोडलं जातंय हेही मला ठाऊक नाही”, असं सायलीने स्पष्ट केलं.

ऋतुराजसोबतच्या अफेअरच्या चर्चांमुळे खासगी आयुष्यावरही परिणाम झाल्याचं सायलीने यावेळी सांगितलं. “या अफवांमुळे माझ्या खासगी आयुष्यातही समस्या निर्माण झाल्या आहेत. ही गोष्ट अफवा पसवरणाऱ्यांना समजत नाही. तो खूप चांगला खेळाडू आहे. सुरुवातीला आम्ही एकमेकांशी बोलायचो. जाऊ दे ना, अफवा आहेत असं म्हणून आम्ही दुर्लक्ष करायचो. जेव्हा सत्य समोर येईल तेव्हा सगळ्यांना समजेलच, असा विचार आम्ही करायचो. पण दीड वर्षानंतरही जर या अफवा पसरत असतील तर त्याचा मला त्रास होऊ लागला आहे”, अशा शब्दांत तिने नाराजी व्यक्त केली.

या मुलाखतीत सायलीने तिच्या रिलेशनशिप स्टेटसचाही खुलासा केला. सायली संजीव सध्या सिंगल आहे. “अशा अफवांमुळे घरात चिंतेचं वातावरण निर्माण होतं. आज जर त्याच्या एखाद्या चांगल्या कामाबद्दल मला त्याचं कौतुक करायचं असेल किंवा शुभेच्छा द्यायच्या असतील तर ते मी करू शकत नाही. तोसुद्धा माझ्या कामाबद्दल काही बोलू शकत नाही”, असं म्हणत मैत्रीवर वाईट परिणाम झाल्याचं तिने सांगितलं.