‘जे लोक मला ओळखत नाहीत..’; लग्नाच्या चर्चांवर श्रुती हासनने सोडलं मौन

Shruti Haasan

Image Credit source: Instagram

मुंबई : 27 डिसेंबर 2023 | बॉलिवूड स्टारकिड्ससोबत सतत फोटोंमध्ये दिसणारा ओरहान अवत्रमणी उर्फ ऑरीने नुकतीच दिलेली मुलाखत तुफान चर्चेत आहे. कारण या मुलाखतीत त्याने अभिनेत्री श्रुती हासनच्या बॉयफ्रेंडचा उल्लेख पती म्हणून केला. तेव्हापासून श्रुतीने गुपचूप लग्न उरकल्याची जोरदार चर्चा आहे. आता या चर्चा पाहून खुद्द श्रुतीने त्यावर स्पष्टीकरण दिलं आहे. श्रुतीने तिच्या इन्स्टाग्राम स्टोरीमध्ये एक पोस्ट लिहिली आणि त्यात तिने तिच्या लग्नाविषयी स्पष्ट केलं आहे. दिग्गज अभिनेते कमल हासन यांची मुलगी श्रुती हासन ही गेल्या काही काळापासून शांतनू हजारिकाला डेट करतेय.

श्रुती हासनची पोस्ट-

‘तर.. अजून माझं लग्न झालेलं नाही. जी व्यक्ती तिच्या आयुष्यातील प्रत्येक गोष्टीबद्दल इतक्या मोकळेपणे व्यक्त होते, ती तिच्या लग्नाबद्दलची गोष्ट का लपवणार? हे खरंच हास्यास्पद आहे. त्यामुळे जे लोक मला अजिबात ओळखत नाहीत, त्यांनी जरा शांत बसावं’, अशा शब्दांत तिने ऑरीला टोला लगावला आहे.

नेमकं काय घडलं होतं?

ऑरीने रेडिटवर ‘आस्क मी एनिथिंग’ या सेशनद्वारे चाहत्यांच्या विविध प्रश्नांची उत्तरं दिली होती. यावेळी एकाने त्याला विचारलं, ‘अशी कोणती सेलिब्रिटी आहे, ज्याने तुझ्यासोबत फोटोसाठी पोझ देताना खूप ॲटिट्यूड दिला असेल? जर तू स्पष्ट नाव घेऊ शकणार नसशील तर फक्त हिंट दे.’ यावर उत्तर देताना ऑरीने लिहिलं, ‘श्रुती हासन. मी तिला फोटोसाठी पोझ देण्यास कधीच विचारलं नव्हतं. पण एका कार्यक्रमात ती माझ्याशी खूप अहंकाराने वागली. मी तर तिला त्यावेळी ओळखत पण नव्हतो. म्हणून मला खूप वाईट वाटलं होतं. पण कदाचित काही गैरसमज झाला असावा. कारण माझी तिच्या पतीसोबत खूप चांगली ओळख आहे. वेळेनुसार या गोष्टी ठीक होतील.’

काही दिवसांपूर्वी दिलेल्या एका मुलाखतीत श्रुती हासन लग्नाविषयी मोकळेपणे व्यक्त झाली होती. “लग्न या शब्दाचीच मला खूप भीती वाटते. त्या शब्दामागे बऱ्याच गोष्टी आहेत आणि मला त्याविषयी सध्या काहीच विचार करायचा नाही. मी त्याच्यासोबत सध्या खुश आहे, एकत्र काम करत समाधानी आहे. आम्ही दोघं एकमेकांसोबत आनंदी आहोत. ही गोष्ट एखाद्या लग्नापेक्षा चांगली नाही का”, असा सवाल तिने केला होता.