Sidharth Kiara Wedding | सिद्धार्थ-कियारा अडकले लग्नबंधनात; सूर्यगढ पॅलेसमध्ये धूमधडाक्यात पार पडला विवाहसोहळा
सोमवारपासून लग्नापूर्वीच्या कार्यक्रमांना सुरुवात झाली होती. सोमवारी संध्याकाळी या दोघांचा संगीत कार्यक्रम पार पडला. सोशल मीडियावर सूर्यगढ पॅलेसचे व्हिडीओ व्हायरल झाले होते.
मुंबई: अभिनेता सिद्धार्थ मल्होत्रा आणि कियारा अडवाणी अखेर लग्नबंधनात अडकले आहेत. आज (मंगळवार) दुपारी जैसलमेरमधील सूर्यगढ पॅलेसमध्ये पारंपरिक पद्धतीने विवाहसोहळा पार पडला. कुटुंबीय आणि बॉलिवूड इंडस्ट्रीतील काही मित्रमैत्रिणींच्या उपस्थितीत सिद्धार्थ-कियाराने लग्नगाठ बांधली. सोमवारपासून लग्नापूर्वीच्या कार्यक्रमांना सुरुवात झाली होती. सोमवारी संध्याकाळी या दोघांचा संगीत कार्यक्रम पार पडला. सोशल मीडियावर सूर्यगढ पॅलेसचे व्हिडीओ व्हायरल झाले होते.
मंगळवारी सकाळी सिद्धार्थ-कियाराची हळद पार पडली. त्यानंतर संध्याकाळी चारच्या सुमारास विवाहविधींना सुरुवात झाली. आज संध्याकाळी रिसेप्शनचं आयोजन करण्यात येणार आहे. या लग्नसोहळ्याला शाहिद कपूर, मीरा राजपूत, जुही चावला, इशा अंबानी, मनिष मल्होत्रा यांनी हजेरी लावली.
पंजाबी स्टाइलमध्ये वरात घेऊन पोहोचला सिद्धार्थ
सिद्धार्थ-कियाराच्या लग्नासाठी दिल्लीहून बँडवाले आले होते. या वरातीसह पंजाबी स्टाइलमध्ये सिद्धार्थने मंडपात एण्ट्री केली. मंगळवारी दुपारपासून या लग्नाचे अपडेट्स समोर येत आहेत. सिद्धार्थने ‘साजन जी घर आए’ या गाण्यावर मंडपात एण्ट्री केली.
सिद्धार्थ-कियाराची लव्हस्टोरी
सिद्धार्थ-कियाराची पहिली भेट ही ‘लस्ट स्टोरीज’ या चित्रपटानिमित्त आयोजित केलेल्या एका पार्टीत झाली. त्यानंतर दोघांमध्ये चांगली मैत्री झाली आणि हळूहळू या मैत्रीचं रुपांतर प्रेमात झालं. ‘शेरशाह’ या चित्रपटात दोघांनी एकत्र काम केलं होतं. या चित्रपटातील दोघांची केमिस्ट्री चाहत्यांनाही खूप आवडली.
जैसलमेरमधील सूर्यगढ पॅलेसमध्ये पाहुण्यांसाठी 84 आलिशान रुम्स बुक करण्यात आले आहेत. तर लग्नाला हजेरी लावणाऱ्या पाहुण्यांची ये-जा करण्यासाठी 80 गाड्यांचीही सुविधा करण्यात आली आहे. या पाहुण्यांना ‘नो फोन पॉलिसी’चं पालन करावं लागणार आहे. जेणेकरून लग्नाचे फोटो सोशल मीडियावर लीक होऊ शकणार नाहीत. याआधी बऱ्याच सेलिब्रिटींच्या लग्नात ‘नो फोन पॉलिसी’चं काटेकोरपणे पालन करण्यात आलं होतं.
2010 मध्ये करण जोहरने त्याच्या ‘स्टुडंट ऑफ द इअर’ या चित्रपटातून सिद्धार्थला लाँच केलं. तर कियारा अडवाणीने 2014 मध्ये ‘फगली’ या चित्रपटातून बॉलिवूडमध्ये पदार्पण केलं. हे दोघं त्यांच्या रिलेशनशिपविषयी कधीच माध्यमांसमोर व्यक्त झाले नाहीत. मात्र बॉलिवूडच्या विविध पार्ट्यांमध्ये किंवा सहलींवर जाताना दोघांना नेहमीच एकत्र पाहिलं गेलं.
कॉफी विथ करणच्या सातव्या सिझनमध्ये कियारा पहिल्यांदाच तिच्या नात्याविषयी व्यक्त झाली होती. “आम्ही लस्ट स्टोरीजच्या रॅप-अप पार्टीमध्ये सहज बोलू लागलो होतो. तेव्हाच आम्ही पहिली भेट झाली होती. ती भेट अगदी सहज होती. मात्र तो दिवस मी कधीच विसरणार नाही”, असं ती म्हणाली होती.
