Armaan Malik | दोन्ही पत्नी एकत्र प्रेग्नंट असलेल्या युट्यूबर अरमान मलिकवर भडकला प्रसिद्ध गायक
2011 मध्ये त्याने पायलशी लग्न केलं. या दोघांना चिरायू हा मुलगा आहे. त्यानंतर 2018 मध्ये त्याने कृतिकाशी लग्न केलं. कृतिका ही पायलची खास मैत्रीण असल्याचंही म्हटलं जातं. दुसरं लग्न झाल्यानंतरही हे चौघं एकाच घरात एकत्र राहत आहेत.
मुंबई : हैदराबादचा प्रसिद्ध युट्यूबर अरमान मलिकचा सोशल मीडियावर मोठा चाहतावर्ग आहे. युट्यूबर अरमान त्याच्या खासगी आयुष्यामुळे नेहमीच चर्चेत असतो. कारण त्याच्या दोन पत्नी आहेत आणि दोन्ही पत्नींसोबत तो एकाच घरात राहतो. इतकंच नव्हे तर या दोघी जणी एकाच वेळी गरोदर राहिल्या आहेत. अरमान मलिकच्या युट्यूब व्हिडीओमध्ये या दोघीजणी नेहमी एकत्र दिसतात. युट्यूबवर त्याच्या सबस्क्राइबर्सची संख्याही मोठी आहे. मात्र युट्यूबर अरमान मलिकमुळे प्रसिद्ध बॉलिवूड गायक अरमान मलिकला वेगळाच त्रास सहन करावा लागतोय. अखेर चिडलेल्या गायक अरमानने याविषयी ट्विट केलं आहे.
‘मीडियामध्ये त्याला अरमान मलिक बोलणं थांबवा. त्याचं खरं नाव संदीप आहे. कृपया माझ्या नावाचा गैरवापर करू नका. रोज सकाळी उठून असे आर्टिकल वाचण्याचा मला राग येतोय. अशा बातम्यांमुळे माझी खूप चिडचिड होतेय’, असं ट्विट गायक अरमान मलिकने केलं आहे.
Stop calling him Armaan Malik in the media. His real name is freakin’ Sandeep!! For gods sake enough with this misuse of my name. Hate waking up and reading articles like this.. and the news makes me even more disgusted https://t.co/8MrDZt5870
— ARMAAN MALIK (@ArmaanMalik22) February 24, 2023
युट्यूबर संदीप हा इंटरनेट सेन्सेशन आहे, जो स्वत:चं नाव अरमान मलिक आहे असं सांगतो. मात्र हे त्याचं खरं नाव नाही. त्याने जेव्हा आपल्या दोन लग्नांविषयी युट्यूबवर सांगितलं, तेव्हापासून तो रातोरात प्रकाशझोतात आला. आता गायक अरमानच्या ट्विटनंतर संदीपने उत्तर देत एक व्हिडीओ अपलोड केला आहे. यामध्ये त्याने म्हटलंय की त्याने कधीच नाव कॉपी केलं नाही. त्याची पत्नी कृतिकानेही त्याला दुजोरा दिला आहे.
“अरमान मलिक नावाचा काही पेटंट नाही. त्यामुळे दोन लोकांची नावं एकच असू शकतात. जर आमच्यामुळे तुमची चिडचिड होत असेल तर आम्हालाही तुम्हाला पाहायचं नाहीये. तुमच्या घरातील सर्वजण बॉलिवूडशी निगडीत आहेत, म्हणून तुम्ही गायक बनलात. मी खूप मेहनत घेतली आहे. ब्लॉगिंग केलंय, टिकटॉक केलंय, तेव्हापासून माझं नाव अरमान मलिक आहे”, असं त्याने या व्हिडीओ म्हटलंय.
कोण आहे अरमान मलिक?
अरमान हा हैदराबादमधील प्रसिद्ध युट्यूबर आहे. सोशल मीडियावर त्याचे पंधरा लाखांहून अधिक फॉलोअर्स आहेत. विविध फोटो आणि व्हिडीओ पोस्ट करत तो नेटकऱ्यांचं मनोरंजन करतो. 2011 मध्ये त्याने पायलशी लग्न केलं. या दोघांना चिरायू हा मुलगा आहे. त्यानंतर 2018 मध्ये त्याने कृतिकाशी लग्न केलं. कृतिका ही पायलची खास मैत्रीण असल्याचंही म्हटलं जातं. दुसरं लग्न झाल्यानंतरही हे चौघं एकाच घरात एकत्र राहत आहेत. पायल आणि कृतिका यांचे अनेकदा एकत्र फोटो पहायला मिळतात.
