दाक्षिणात्य चित्रपटसृष्टीतील लोकप्रिय अभिनेत्री ज्योतिकाने नुकताच तिचा 45 वा वाढदिवस साजरा केला. ज्योतिका तिच्या दमदार अभिनयासोबतच खासगी आयुष्यामुळेही चर्चेत राहिली. तिची लव्ह-स्टोरी अत्यंत साधी आहे. साऊथ सुपरस्टार सूर्यासोबत तिने 2006 मध्ये लग्न केलं. या दोघांना एक मुलगा आणि एक मुलगी आहे.
ज्योतिकाने एका युट्यूब चॅनलला दिलेल्या मुलाखतीत तिच्या लग्नाविषयीचा किस्सा सांगितला. "सूर्याशी लग्न करण्यामागचं एकमेव कारण म्हणजे तो माझा खूप आदर करतो. आम्ही 'पुवेल्लम केट्टुप्पर' या चित्रपटात एकत्र काम केलं होतं. त्यावेळी त्याचं वागणं मला खूप भावलं होतं. त्यानंतर आम्ही सोबत सात चित्रपटांमध्ये काम केलं", असं तिने सांगितलं.
लग्नाविषयी ज्योतिका पुढे म्हणाली, "जेव्हा दिग्दर्शक एखादा रोमँटिक सीन करायला सांगायचे, तेव्हा सूर्याने कधीच त्या गोष्टीचा चुकीचा फायदा घेतला नाही. फक्त माझ्यासाठीच नाही तर इतर कोणत्याही अभिनेत्रीसाठी त्याचे असेच विचार आहेत. म्हणूनच मी त्याच्या प्रेमात पडले."
"मी दहा वर्षांपर्यंत सकाळी 9 वाजल्यापासून संध्याकाळी 6 वाजेपर्यंत शूटिंगसाठी वेळ दिला. यामुळे मी खूप दमले होते. मला जितका पैसा कमवायचा होता, तितका मी कमावला. म्हणून ज्यावेळी मला सूर्याने लग्नासाठी प्रपोज केलं, तेव्हा मी फार काही विचार केला नाही. थेट प्रपोजलच्या दुसऱ्या महिन्यात लग्न केलं", असं ज्योतिका म्हणाली.
सूर्याची प्रशंसा करताना ज्योतिका पुढे म्हणाली, "तो जितका चांगला पती आहे, तितकाच चांगला तो पितासुद्धा आहे. तो त्याच्या सर्व जबाबदाऱ्या उत्तमरित्या पार पाडतो. लग्नाच्या इतक्या वर्षांनंतरही तो काहीच विसरला नाही. त्याला सर्वकाही लक्षात आहे."