Sunny Deol | दारु पिण्याबद्दल सनी देओलचं मत वाचून तुम्हालाही बसेल आश्चर्याचा धक्का!

Sunny Deol

मुंबई | 14 ऑक्टोबर 2023 : अभिनेता सनी देओल त्याच्या ‘गदर 2’ या चित्रपटाला मिळालेल्या यशाचा आनंद अनुभवत आहे. त्याच्या या चित्रपटाला केवळ भारतातच नाही तर जगभरात दमदार प्रतिसाद मिळाला. 65 वर्षीय सनी देओलने तारा सिंगच्या भूमिकेत पुन्हा एकदा प्रेक्षकांच्या मनावर आपली विशेष छाप सोडली. बॉलिवूडच्या काही फिट अभिनेत्यांमध्ये सनी देओलचं नाव समाविष्ट होतं आणि हे सर्वांनाच माहित आहे की त्याला दारू किंवा अन्य कुठलंही व्यसन नाही. आता नुकत्याच दिलेल्या एका मुलाखतीत सनी देओलने दारूविषयी त्याचं स्पष्ट मत मांडलं.

सनीने सांगितलं की तो जेव्हा इंग्लंडमध्ये होता तेव्हा तो दारू प्यायला होता. मात्र लोकांना दारू इतकी का आवडते हे मला आजही समजत नसल्याचं त्याने म्हटलं. सनी देओलचा मुलगा राजवीर याने नुकतंच बॉलिवूडमध्ये पदार्पण केलं. त्याच्याच चित्रपटाच्या प्रमोशनदरम्यान दिलेल्या मुलाखतीत सनी दारूविषयी व्यक्त झाला.

दारुबद्दल काय म्हणाला सनी देओल?

‘मॅशेबल इंडिया’ला दिलेल्या या मुलाखतीत सनी म्हणाला, “असं नाहीये की मी दारू प्यायलोच नाही. जेव्हा मी इंग्लंडमध्ये होतो तेव्हा समाजाचा एक भाग होण्यासाठी मी दारू प्यायला होतो. एक तर ती इतकी कडू, त्यात तिचा इतका दुर्गंध, प्यायलानंतर डोकं सुद्धा दुखायला लागतं, तरी ते लोकांना इतकं का आवडतं हे मला समजत नाही. म्हणूनच मला दारू कधीच आवडली नाही.”

मुलाने सांगितला किस्सा

या मुलाखतीत सनी देओलचा मुलगा राजवीर यानेसुद्धा एक किस्सा सांगितला. जेव्हा तो बिअर प्यायल्यानंतर घरी आला तेव्हा वडील सनी देओलची प्रतिक्रिया कशी होती याविषयी त्याने सांगितलं. राजवीर म्हणाला, “जेव्हा मी एक बिअर पिऊन घरी गेलो होतो. तेव्हा डॅडला समजलं होतं. ते झोपले होते आणि चार्जर घेण्यासाठी मी त्यांच्या बेडजवळ गेलो होतो. मी माझा चार्जर तिथून घेतला, मात्र तितक्यात दुसरी वस्तू खाली पडली. यामुळे त्यांना वाटलं की मी दारू प्यायलो आहे. माझ्याजवळ त्यांना बिअरचा वास आला आणि त्यानंतर..” हा किस्सा सांगतानाच राजवीर हसू लागतो.

यावेळी सनी देओलला हा किस्सा आठवला का असा प्रश्न विचारण्यात आला. त्यावर सनी देओल पुढे म्हणाला, “माझ्या दोन्ही मुलांनी दारू कधी प्यायला सुरुवात केली हे मलाच कळलं नाही. आमच्या कुटुंबात आधीपासूनच असं आहे. माझ्या वडिलांनाही माझ्याबद्दल बऱ्याच गोष्टी माहीत नाही. या गोष्टीमुळे आपली मुलं शिस्तप्रिय राहतात. एक मुलगा तेच करेल जे त्याला करायचं असतं. मी स्वतः एका स्ट्रिक्ट कुटुंबातून आलो आहे. मात्र मला जे करायचं होतं ते मी केलं. पण दारू प्यायला मला कधीच आवडलं नाही.”