The Kerala Story | ‘द केरळ स्टोरी’चा नवा विक्रम; तिसऱ्या आठवड्यात बॉक्स ऑफिसवर दमदार कमाई
शाहरुख खानच्या 'पठाण'नंतर सुदिप्तो सेन दिग्दर्शित 'द केरळ स्टोरी' हा चित्रपट या वर्षातील सर्वाधिक कमाई करणारा दुसरा चित्रपट ठरला आहे. यामध्ये अदा शर्मासोबतच सोनिया बलानी, सिद्धी इदनानी आणि योगिता बिहानी यांच्याही महत्त्वपूर्ण भूमिका आहेत.
मुंबई : सुदिप्तो सेन दिग्दर्शित ‘द केरळ स्टोरी’ या चित्रपटाने बॉक्स ऑफिसवर नवा विक्रम रचला आहे. प्रदर्शनाच्या तिसऱ्या सोमवारी या बहुचर्चित चित्रपटाने कमाईचा 200 कोटींचा टप्पा पार केला आहे. 5 मे रोजी प्रदर्शित झालेल्या या चित्रपटाने आतापर्यंत 204.47 कोटी रुपयांचा गल्ला जमवला आहे. अदा शर्माची मुख्य भूमिका असलेल्या ‘द केरळ स्टोरी’ने पहिल्या आठवड्यात 81.14 कोटी रुपये तर दुसऱ्या आठवड्यात 90.58 कोटी रुपये कमावले आहेत. तिसऱ्या आठवड्यातही चित्रपटाची दमदार कमाई सुरू आहे. एकीकडे या चित्रपटावरून देशभरात अजूनही वाद सुरू आहे. तर दुसरीकडे थिएटरमध्ये प्रेक्षक गर्दी करत आहेत. केरळमधल्या हिंदू आणि ख्रिश्चन मुलींना प्रेमाच्या जाळ्यात अडकवून त्यांचं कशा पद्धतीने धर्मांतर केलं जातं, त्यांना ISIS या दहशतवादी संघटनेत कसं सामील केलं जातं याविषयीची कथा चित्रपटात दाखवण्यात आली आहे.
द केरळ स्टोरीची तिसऱ्या वीकेंडची कमाई-
तिसरा शुक्रवार- 6.6 कोटी रुपये
तिसरा शनिवार- 9.15 कोटी रुपये
तिसरा रविवार- 11.50 कोटी रुपये
शाहरुख खानच्या ‘पठाण’नंतर सुदिप्तो सेन दिग्दर्शित ‘द केरळ स्टोरी’ हा चित्रपट या वर्षातील सर्वाधिक कमाई करणारा दुसरा चित्रपट ठरला आहे. यामध्ये अदा शर्मासोबतच सोनिया बलानी, सिद्धी इदनानी आणि योगिता बिहानी यांच्याही महत्त्वपूर्ण भूमिका आहेत. ‘द केरळ स्टोरी’च्या यशाचं कौतुक करताना निर्माता-दिग्दर्शक राम गोपाल वर्मा यांनी बॉलिवूडवर निशाणा साधला होता. ‘आपण इतरांशी आणि स्वत:शी खोटं बोलण्यात इतके सहज झालो आहोत की जेव्हा कोणी पुढे जाऊन सत्य दाखवतो, तेव्हा आपल्याला धक्काच बसतो. ‘द केरळ स्टोरी’च्या जबरदस्त यशावर बॉलिवूडचं मृत्यूसारखं मौन सर्वकाही स्पष्ट करतोय’, असं त्यांनी ट्विटरवर लिहिलं होतं.
अभिनेत्री अदा शर्माने सोशल मीडियावर पोस्ट लिहित प्रेक्षकांचे आभार मानले आहेत. ‘भारतीय प्रेक्षकांना शुभेच्छा. ज्या लोकांनी होर्डिंग्स लावले, पेंटिंग्स केले, व्हिडीओज पोस्ट केले, चित्रपटाचं कौतुक केलं, चित्रपटासाठी विविध राज्यांमध्ये प्रवास केला अशा सर्वांना शुभेच्छा. तुमचा चित्रपट ब्लॉकबस्टर ठरला आहे. तुमच्या यशात मला सहभागी करून घेतल्याबद्दल धन्यवाद. परदेशातही ‘द केरळ स्टोरी’ हा चित्रपट प्रेक्षकांना आवडतोय’, असं तिने लिहिलं आहे.
