लंडनमधील ‘या’ खास ठिकाणी पोहोचले विराट-अनुष्का; व्हिडीओ व्हायरल

Virat Kohli and Anushka Sharma

Image Credit source: Twitter

ट्वेंटी-20 विश्वचषकातील अभूतपूर्व विजयानंतर क्रिकेटर विराट कोहली त्याच्या कुटुंबीयांसोबत वेळ घालवण्यासाठी लंडनला गेला. विश्वचषकादरम्यान विराटचं वेळापत्रक खूपच व्यग्र होतं. मात्र विश्वचषक पटकावल्यानंतर आणि भारतातील जंगी मिरवणुकीनंतर तो लगेच लंडनला रवाना झाला होता. आता लंडनमधील विराट आणि त्याची पत्नी अनुष्का शर्माचा एक व्हिडीओ सोशल मीडियावर व्हायरल होत आहे. विराट आणि अनुष्का हे लंडनमधील इस्कॉन मंदिरात किर्तनासाठी पोहोचले आहेत. तिथलाच हा व्हिडीओ सोशल मीडियावर समोर आला आहे. यावेळी अनुष्काने पांढऱ्या रंगाचा सूट परिधान केला आहे. तर विराट टी-शर्ट आणि पँट अशा कॅज्युअल लूकमध्ये दिसून आला.

विश्वचषकाच्या विजयानंतर मुंबईत टीम इंडियाच्या व्हिक्ट्री परेडचं आयोजन करण्यात आलं होतं. त्यानंतर वानखेडे स्टेडियमवर टीम इंडियाचा गौरव करण्यात आला. हे सर्व कार्यक्रम पार पडल्यानंतर दुसऱ्या दिवशी सकाळी विराट कुटुंबीयांना भेटण्यासाठी लंडनला रवाना झाला. बार्बाडोस ते भारतापर्यंत 16 तास विमानातून प्रवास, त्यानंतर पंतप्रधान नरेंद्र मोदींची भेट, मुंबईत व्हिक्ट्री परेड आणि वानखेडे स्टेडियमवर रात्री उशिरापर्यंत जल्लोष हे सर्व आटपून तो लगेचच लंडनला निघाला. पत्नी अनुष्का, मुलगी वामिका आणि मुलगा अकाय यांना भेटण्यासाठी तो आतूर झाला होता. विजयानंतर मैदानात असताना विराटने कुटुंबीयांना व्हिडीओ कॉल केला होता. त्याचा व्हिडीओ सोशल मीडियावर व्हायरल झाला होता.

पहा व्हिडीओ

एकीकडे भारतात बॉलिवूडमधील बहुतांश सेलिब्रिटी हे अनंत अंबानी आणि राधिका मर्चंट यांच्या लग्नात व्यग्र असताना विराट-अनुष्का मात्र किर्तनासाठी वेळ देत असल्याच्या प्रतिक्रिया नेटकरी देत आहेत. मुलगा अकायच्या जन्माआधी अनुष्का लंडनला राहायला गेली होती. विराटचं कुटुंब सध्या लंडनमध्येच राहत आहे. अकायच्या जन्मानंतर अनुष्काने अभिनयातून काही काळ ब्रेक घेतला आहे. तिच्या ‘चकदा एक्स्प्रेस’ या चित्रपटाची शूटिंग पूर्ण झाली आहे. हा चित्रपट लवकरच प्रेक्षकांच्या भेटीला येणार आहे. अनुष्काचा हा चित्रपट गेल्या काही वर्षांपासून रखडला आहे. प्रेग्नंसीच्या आधी तिने याचं शूटिंग पूर्ण केलं होतं.