राजकारण्यांना काय सल्ला देशील? राहुल गांधींच्या प्रश्नावर शाहरुख खानचं मजेशीर उत्तर
सध्या देशभरात निवडणुकीचे वारे वाहत आहेत. अशातच बॉलिवूडचा किंग खान अर्थात शाहरुख खानचा एक जुना व्हिडीओ सोशल मीडियावर चर्चेत आला आहे. यामध्ये राहुल गांधींनी शाहरुखला एक प्रश्न विचारला आहे. राजकारण्यांना काय सल्ला देशील, या प्रश्नावर शाहरुखने मजेशीर उत्तर दिलं आहे.
मुंबई : 16 मार्च 2024 | शाहरुख खान हा बॉलिवूडमधील सर्वांत लोकप्रिय सेलिब्रिटी आहे. फिल्म इंडस्ट्रीत त्याने तीन दशकांहून अधिक काळ काम केलंय. सध्या देशभरात निवडणुकीचे वारे वाहत आहेत. अशातच शाहरुखचा एक जुना व्हिडीओ सोशल मीडियावर चर्चेत आला आहे. एका कार्यक्रमातील हा व्हिडीओ असून त्यात राहुल गांधी यांनी शाहरुखला खास प्रश्न विचारला आहे. “राजकारण्यांना तू कोणता सल्ला देशील?” असा सवाल राहुल गांधींनी किंग खानला केला. हा व्हिडीओ तेव्हाचा आहे, जेव्हा मनमोहन सिंग हे देशाचे पंतप्रधान होते आणि तेसुद्धा या कार्यक्रमात उपस्थित होते.
शाहरुखचं उत्तर
राहुल गांधींच्या प्रश्नावर उत्तर देताना शाहरुख म्हणाला, “हा प्रश्न खूप साधा आहे याचा मला आनंद आहे (हसतो). मी माझ्या उदरनिर्वाहासाठी खोटं बोलतो आणि इतरांची फसवणूक करतो. मी एक अभिनेता असल्याने माझं संपूर्ण आयुष्य हा एक शोच आहे. माझ्या आत काहीही ठोस असं नाही. पण मी हे नक्की सांगू इच्छितो की देश चालवणाऱ्या किंवा ज्यांच्या मनात देश चालवण्याची इच्छा आहे अशा लोकांबद्दल माझ्या मनात खूप आदर आहे. जे देशासाठी काम करतात ते नि:स्वार्थ सेवा करत आहेत आणि हे काम करणाऱ्या प्रत्येकाने ते अत्यंत प्रामाणिकपणे करावं अशी माझी इच्छा आहे.”
उत्तरावर टाळ्यांचा कडकडाट
“ही अत्यंत नि:स्वार्थ सेवा आहे. त्यामुळे हे काम अत्यंत प्रामाणिकपणे करा आणि आपल्या देशाचा अभिमान बाळगा. या देशावर प्रेम करा आणि आपला देश हा अत्यंत अद्भुत आहे त्यामुळे टेबलाखालून पैसे घेऊ नका. भ्रष्टाचार करू नका किंवा कोणतीही अप्रिय घटना करू नका. जर आपण योग्य काम केलं तर आपण सर्व पैसे कमावू शकू आणि आपण सर्वजण आनंदी राहू शकू. आपण सर्व मिळून या देशाला महान आणि अभिमानी राष्ट्र बनवू शकू”, असं शाहरुख म्हणताच उपस्थितांनी टाळ्यांचा कडकडाट केला. राहुल गांधी यांनी विचारलेल्या प्रश्नाकडे पुन्हा वळत शाहरुख पुढे म्हणाला, “म्हणून मी सर्व राजकारण्यांना सल्ला देतो की कृपया यथार्थपणे शक्य तितकं प्रामाणिक राहा.”