कोरोना काळात केलेल्या मदतीमुळे हा देश पीएम मोदींना देणार सर्वोच्च राष्ट्रीय सन्मान
PM Modi Dominica award : भारताने कोविड काळात अनेक लहान देशांना औषधांचा साठा पाठवून त्यांना मोठी मदत केली होती. पंतप्रधान मोदींनी या कठीण काळात केलेल्या मदतीमुळे द डॉमिनिका सरकारने त्यांचा सर्वोच्च नागरी पुरस्कार देऊन सन्मान करण्याचा निर्णय घेतला आहे. या महिन्यात पंतप्रधान मोदींना ते आपला सर्वोच्च राष्ट्रीय पुरस्कार प्रदान करणार आहेत.
पंतप्रधान नरेंद्र मोदी यांनी कोरोनाच्या काळात (corona pandamic) अनेक देशांना मदतीचा हात दिला होत. भारताने गरजू आणि गरीब देशांना सढळ हाताने मदत केली होती. पंतप्रधान मोदी (PM Modi) यांनी अमेरिकेसह 150 देशांना औषधांची खेप पाठवली होती. कोरोनामध्ये मदत केल्याबद्दल पंतप्रधान मोदींना या देशाने आपला सर्वोच्च राष्ट्रीय सन्मान देण्याचा निर्णय घेतला आहे.
डॉमिनिका सरकारने म्हटले की, कॉमनवेल्थ ऑफ डॉमिनिका या महिन्यात पंतप्रधान मोदींना आपला सर्वोच्च राष्ट्रीय पुरस्कार ‘डॉमिनिका अवॉर्ड ऑफ ऑनर’ प्रदान करणार आहे. कोविड-19 महामारीच्या काळात डॉमिनिकामध्ये मोदींचे योगदान आणि दोन्ही देशांमधील भागीदारी मजबूत करण्याच्या त्यांच्या समर्पणाची दखल घेऊन हा पुरस्कार दिला जाणार आहे.
डॉमिनिकाच्या कॉमनवेल्थच्या अध्यक्षा सिल्व्हानी बर्टन 19 ते 21 नोव्हेंबर या कालावधीत जॉर्जटाउन, गयाना येथे होणाऱ्या आगामी भारत-कॅरिकॉम शिखर परिषदेत हा पुरस्कार प्रदान करतील, असे डॉमिनिकन पंतप्रधान कार्यालयाने एका निवेदनात म्हटले आहे.
निवेदनात असेही म्हटले आहे की, फेब्रुवारी 2021 मध्ये, PM मोदींनी AstraZeneca COVID-19 लसीचे 70,000 डोस डॉमिनिकाला प्रदान केले आणि ही एक उदार भेट होती. ज्यामुळे डोमिनिकाला त्याच्या कॅरिबियन शेजाऱ्यांना पाठिंबा देण्यास सक्षम केले.
पंतप्रधान मोदींच्या नेतृत्वाखाली डॉमिनिकाला आरोग्यसेवा, शिक्षण आणि माहिती तंत्रज्ञानामध्ये भारताने दिलेला पाठिंबा तसेच जागतिक स्तरावर हवामानातील लवचिकता निर्माण करण्याच्या उपक्रमांना आणि शाश्वत विकासाला चालना देण्याच्या भूमिकेलाही हा पुरस्कार मान्य करेल.
पंतप्रधान रुझवेल्ट स्केरिट यांनी सांगितले की, हा पुरस्कार पंतप्रधान मोदींची डॉमिनिकाशी असलेली एकता दर्शवतो. पंतप्रधान मोदी हे डॉमिनिकाचे खरे भागीदार आहेत, विशेषत: जागतिक आरोग्य संकटाच्या वेळी आमच्या गरजेच्या वेळी त्यांनी मदत केली.
पंतप्रधान रुझवेल्ट पुढे म्हणाले की, आम्ही भारतासोबतची ही भागीदारी वाढवण्यासाठी आणि प्रगती आणि लवचिकतेच्या आमच्या सामायिक दृष्टीला पुढे नेण्यासाठी उत्सुक आहोत. या निवेदनात अधोरेखित करण्यात आले आहे की पुरस्कार स्वीकारताना पंतप्रधान मोदी यांनी हवामान बदल आणि भू-राजकीय संघर्ष यासारख्या जागतिक आव्हानांना सामोरे जाण्यासाठी सहकार्याच्या महत्त्वावर भर दिला आणि या समस्यांचे निराकरण करण्यासाठी डोमिनिका आणि कॅरिबियन यांच्याशी जवळून काम करण्यास उत्सुक आहे.