मॉर्निंग वॉक करताना मनविसेच्या शहराध्यक्षावर तलवारीने हल्ला; अंबरनाथ हादरले
मनसेच्या विद्यार्थी सेनेचे उल्हासनगर शहराध्यक्ष मनोज शेलार यांच्यावर आज अंबरनाथमध्ये जीवघेणा हल्ला करण्यात आला.
उल्हासनगर : मनसेच्या विद्यार्थी सेनेचे उल्हासनगर शहराध्यक्ष मनोज शेलार (Attack On MNS Vidyarthi Sena City President) यांच्यावर आज अंबरनाथमध्ये जीवघेणा हल्ला करण्यात आला. या हल्ल्यात शेलार हे बालंबाल बचावले असले, तरी त्यांच्या हाताला मोठी दुखापत झाली आहे (Attack On MNS Vidyarthi Sena City President).
मनोज शेलार हे दररोज सकाळी अंबरनाथच्या शिवमंदिर परिसरातील गोविंद पूल भागात मॉर्निंग वॉकसाठी जातात. आज सकाळी ते मॉर्निंगवॉक करत असताना त्यांच्या पाठीमागून दोन दुचाकीवर आलेल्या चौघांनी शेलार यांच्या मानेवर तलवारीने घाव घालण्याचा प्रयत्न केला. मात्र, आजूबाजूचे लोक ओरडल्याने शेलार सतर्क झाले आणि त्यांनी हात मधे घातल्याने माने ऐवजी त्यांच्या हाताला जखम झाली. यावेळी तिथल्या लोकांनी हल्लेखोरांना पकडण्याचा प्रयत्न केला असता हल्लेखोर तलवारीचा धाक दाखवत पळून गेले.
हे हल्लेखोर दोन ते तीन दिवसांपासून आपल्या मागावर असल्याची आणि एकदा त्यांनी आपल्याला पत्ता विचारण्याच्या बहाण्याने थांबवल्याची माहिती शेलार यांनी पोलिसांना दिली आहे. तसेच, आपण उल्हासनगर महापालिकेच्या शिक्षण मंडळ आणि मालमत्ता विभागाचे अनेक घोटाळे बाहेर काढत असल्याने उल्हासनगर महापालिकेच्या अधिकाऱ्यांचा या हल्ल्यामागे हात असल्याचा संशय त्यांनी व्यक्त केला आहे.
या हल्ल्याप्रकरणी अंबरनाथच्या शिवाजीनगर पोलिसांनी कलम 307 अन्वये हत्येच्या प्रयत्नाचा गुन्हा दाखल केला आहे. हल्ल्याच्या परिसरातील सीसीटीव्ही आणि आणि अन्य बाबींच्या आधारे हल्लेखोरांचा शोध सुरु असल्याची माहिती अंबरनाथचे सहाय्यक पोलीस आयुक्त विनायक नरळे यांनी दिली आहे.
“राजसाहेब मला माफ करा” सुसाईड नोट लिहित मनसे शहराध्यक्षाची आत्महत्या https://t.co/7gJoriau1S
— TV9 Marathi (@TV9Marathi) August 16, 2020
Attack On MNS Vidyarthi Sena City President
संबंधित बातम्या :
पुण्यात युवासेना पदाधिकाऱ्याची निर्घृण हत्या, घराजवळ मध्यरात्री थरारक हल्ला