चित्रा वाघ आता गौतमी पाटील हिचे व्हिडीओ पाहणार, गौतमीच्या कार्यक्रमांवर बंदी घालण्याची मागणी होणार?

संतोष जाधव, Tv9 मराठी, उस्मानाबाद : भाजप नेत्या चित्रा वाघ यांनी आज उस्मानाबादमध्ये पत्रकार परिषद घेऊन पुन्हा एकदा मॉडेल उर्फी जावेदच्या कपड्यांवरुन टीका केली. यावेळी त्यांनी राज्य महिला आयोगाच्या अध्यक्षा रुपाली चाकणकर यांच्यावरही निशाणा साधला. व्यक्ती स्वातंत्र्याच्या नावावर डोळ्यावर झापडं लावून आपण सर्व सहन करायचं? आम्ही विरोध केला नाही, तर उद्या तुमच्या चौकामध्ये असे नागडे नाच यायला वेळ लागणार नाही”, असं चित्रा वाघ म्हणाल्या. यावेळी चित्रा वाघ यांना डान्सर गौतमी पाटील हिच्याविषयी प्रश्न विचारण्यात आला. त्यावर चित्रा वाघ यांनी प्रत्युत्तर दिलं.

“इथे धर्माचा विषय नाही. कशाला वेगळी वळण लावताय. हे नागडे नाच आपल्याला मान्य आहेत का? घरातल्या लेकीबाळींसमोर आपण हे आदर्श ठेवणार आहोत?”, असे प्रश्न चित्रा वाघ यांनी उपस्थित केले.

“अरे तुम्ही चार भींतींच्या आता काय करता हा तुमचा प्रश्न आहे. पण सार्वजनिकरित्या हे नागडे नाच करत असतील तर ते आम्ही खपवून घेणार नाही. ही भूमिका आमची कालही होती, आजही आहे आणि उद्यासुद्धा राहील”, असं चित्रा वाघ म्हणाल्या.

“एका पोस्टरमुळे समाजामध्ये अंगप्रदर्शनाचा चुकीचा मेसेज जातो म्हणून जाब विचारणारे, ट्वीटवरुन एखाद्याची दखल घेणारे, त्यांना एवढा नागडा नाच दिसत नाही? इथे तर लाईव्ह शो सुरु आहे”, असं चित्रा वाघ म्हणाल्या.

“हा नंगानाच आम्ही चालू देणार नाही. आरोप-प्रत्यारोप का होता? कारण अशी फाल्तू आणि बाष्कळ विधानं केली जातात”, अशी टीका त्यांनी केली.

यावेळी चित्रा वाघ यांना गौतमीच्या कार्यक्रमांबद्दल प्रश्न विचारला असता “गौतमी पाटील कोण आहे हे माहित नाही. तिचे व्हिडिओ मागवून पाहून घेते”, अशी प्रतिक्रिया चित्रा वाघ यांनी दिली.