MLC Akola : वसंत खंडेलवाल यांच्या उमेदवारीला आव्हान देणारी याचिका कोर्टाने फेटाळली, निवडणूक होणार चुरशीची
अकोला, बुलडाणा, वाशिम या स्थानिक स्वराज्य संस्थेच्या भाजपचे उमेदवार वसंत खंडेलवाल यांच्या उमेदवारीवर आक्षेप घेणारी याचिका नगरसेवक पराग कांबळे व रमेश बजाज यांनी दाखल केली होती. ती याचिका सोमवारी नागपूर हायकोर्टाने फेटाळून लावली आहे.
अकोला, बुलढाणा, वाशीम विधान परिषदेच्या निवडणूक रिंगणात भाजपातर्फे वसंत मदनलाल खंडेलवाल यांनी 22 नोव्हेंबरला नामांकन अर्ज सादर केला. सदर नामनिर्देशन अर्जाची छाननी करण्यात आली आणि छाननीदरम्यान या मतदारसंघातील मतदारांपैकी एक असलेले नगरसेवक पराग मधुकर कांबळे यांनी भाजपा उमेदवार वसंत खंडेलवाल यांनी सादर केलेल्या उमेदवारी अर्जाच्या मान्यतेवर आक्षेप नोंदवला. त्याचप्रमाणे रमेश सत्यनारायण बजाज यांनी देखील आक्षेप नोंदविला होता. परंतु, ही याचिका हायकोर्टानं फेटाळून लावली.
अकोला, बुलडाणा, वाशिम या स्थानिक स्वराज्य संस्थेच्या भाजपचे उमेदवार वसंत खंडेलवाल यांच्या उमेदवारीवर आक्षेप घेणारी याचिका नगरसेवक पराग कांबळे व रमेश बजाज यांनी दाखल केली होती. ती याचिका सोमवारी नागपूर हायकोर्टाने फेटाळून लावली आहे.
पराग कांबळे, रमेश बजाज यांची याचिका
रमेश बजाज हे महाविकास आघाडीचे उमेदवार गोपीकीसन बाजोरिया यांचे निवडणूक प्रतिनिधी आहेत, तर हे दोन्ही आक्षेप रिटर्निंग ऑफिसरने फेटाळले. रिटर्निंग अधिकाऱ्याने दिलेल्या आक्षेपांना नकार देण्यास अनुक्रमे पराग मधुकर कांबळे आणि रमेश सत्यनारायण बजाज यांनी मुंबई उच्च न्यायालय, नागपूर खंडपीठात दोन स्वतंत्र रिट याचिकांद्वारे उमेदवारी अर्जाला आव्हान दिले होते. मात्र सोमवारी उच्च न्यायालयाने दोन्ही रीट याचिका फेटाळून लावल्या असल्याने आता या निवडणुकीत अजूनच चुरस वाढली आहे.
बाजोरिया-खंडेलवाल सामना रंगणार
यावेळी ही निवडणूक दोन्ही उमेदवारांच्या प्रतिष्ठेची आहे. गेल्या 18 वर्षापासून महाविकास आघाडीचे उमेदवार गोपिकीसन बाजोरिया हे आमदार आहेत. यावेळी भाजप आणि शिवसेनेची युती नसल्यानं दोन चांगले मित्र आणि शेजारी हे एकमेकांच्या विरोधात उभे आहेत. वसंत खंडेलवाल हे एक सराफाचे व्यापारी आहेत. सुरुवातीपासून भाजपशी जुडले आहेत. ते नितीन गडकरी यांचे कट्टर समर्थक मानले जातात. त्यामुळं ही निवडणूक ठाकरे विरुद्ध गडकरी अशीच चर्चा सर्व दूर आहे. तर दोन्ही उमेदवार एकमेकांवर ताशेरे ओढायला कुठलीच कसर सोडत नाहीत. ही निवडणूक आता चुरशीची होणार आहे. यामध्ये कोण बाजी मारते याकडे सर्वांचे लक्ष लागले आहे.
