Nashik| भाजपची कलेक्टर ऑफिससमोर निदर्शने, मालेगाव दंगलीचा नोंदवला निषेध, रझा अकादमीवर बंदीची मागणी

मालेगाव दंगलीचा निषेध करत नाशिकमध्ये जिल्हाधिकारी कार्यालयासमोर भाजपने निदर्शने केली.

नाशिकः त्रिपुरा येथील कथित घटनेवरून राज्यात अमरावती आणि मालेगावमध्ये दंगली पेटल्या. आता त्या दंगलीवरून आरोप-प्रत्यारोप सुरू आहेत. विशेषतः या दंगलीमागे कोण, कोणावर कारवाई करावी, याची वक्तव्ये सुरू आहेत. याच्याच पुढचे पाऊल म्हणून भाजप आक्रमक झालेले दिसत आहे. अमरावती आणि मालेगावच्या दंगलीचा निषेध करण्यासाठी आज नाशिकमध्ये जिल्हाधिकारी कार्यालयासमोर घोषणाबाजी करण्यात आली. यावेळी सरकारच्या भूमिकेचाही निषेध करण्यात आला. भाजपचे आंदोलन पाहता परिस्थिती चिघळू नये म्हणून पोलिसांचा प्रचंड फौजफाटा तैनात करण्यात आला होता.

पद्धतशीर कट

मालेगावमध्ये उसळलेला हिंसाचार सुनियोजित असल्याचे समोर आले आहे. नगरसेवक अयाज हलचलने एक आक्षेपार्ह व्हिडिओ क्लिप तयार करून सोशल मीडियावर व्हायरल केली. त्यात त्रिपुरा येथे मुस्लिम नागरिकांवर अन्याय होत आहे. तिथले दंगे रोखण्यात सरकार अपयशी ठरले आहे, असे म्हणत ती क्लिप इतर चौघांच्या मदतीने वेगवेगळ्या ग्रुपवर फॉरवर्ड केली. 8 नोव्हेंबरला हा प्रकार घडला. याप्रकरणी पोलिसांनी नगरसेवक अयाज हलचलला बेड्या ठोकल्या असून, त्याच्यासारखेच अजून अनेकजण असण्याची शक्यता आहे. पोलिसांनी सूत्रधाराचा शोध सुरू केला आहे.

55 जणांना अटक

मालेगाव दंगलीप्रकरणी आतापर्यंत 55 जणांना अटक करण्यात आली आहे. यातील 18 जणांना न्यायालयीन कोठडी मिळाली आहे. तर पहिल्या गुन्ह्यातील 24 जणांना दुसऱ्या गुन्ह्यात वर्ग करण्यात आले आहे. सीसीटीव्हीचे चित्रण पाहून आरोपींचा शोध सुरू आहे. रझा अकादमीचे अनेक कार्यकर्ते फरार आहेत. पोलिसांची पथके त्यांच्या मागावर आहेत. पोलिसांनी मालेगाव दंगलीप्रकरणी रझा अकदमीच्या कार्यालयावर छापे टाकले होते. त्यात महत्वाचे पुरावे हाती लागल्याचे समजते. हे पुरावे लवकरच न्यायालयासमोर सादर केले जाणार आहेत, अशी माहिती पोलीस अधीक्षक सचिन पाटील यांनी दिली आहे.

भाजप आक्रमक

मालेगाव आणि अमरावीत दंगलीप्रकरणी काल विरोधी पक्षनेते देवेंद्र फडणवीस आणि मंत्री यशोमती ठाकूर यांच्यातही आरोप-प्रत्यारोप रंगले. मात्र, भाजपने या प्रकरणी आक्रमक भूमिका घेत आज सोमवारी राज्यभरात ठिकाठिकाणी आंदोलन केले. नाशिकमध्ये जिल्हाधिकारी कार्यालयासमोर भाजप कार्यकर्त्यांनी जोरदार घोषणाबाजी केली. मालेगाव दंगलीतील मुख्य सूत्रधाराला बेड्या ठोका, अशी मागणी यावेळी करण्यात आली. यावेळी मोठा पोलीस बंदोबस्त तैनात करण्यात आला होता. यावेळी रझा अकादमीवर बंदी घालण्याची मागणीही करण्यात आली.

इतर बातम्याः

घरचं झालं थोडं…म्हणे विनाहेल्मेट दुचाकीचालकांची 10 गुणांची परीक्षा; नाशिक पोलिसांचा निर्णय

Nashik| साहित्य संमेलन होणार दणक्यात; पालकमंत्र्यांसह 6 आमदारांनी दिले 55 लाख रुपये