नाट्य कलावंत, नाट्यनिर्मिती संस्थांना मोठा दिलासा, अनुदान तातडीने वितरीत करण्याचे उपमुख्यमंत्र्यांचे आदेश

नाट्यनिर्मिती संस्थांना राज्य सरकारचा दिलासा

मुंबई : कोरोना संकटाच्या काळात चित्रपटासह नाट्यक्षेत्राचंही प्रचंड मोठं नुकसान झालं. त्या पार्श्वभूमीवर राज्य सरकारने नाट्यक्षेत्राला मोठा दिलासा देण्याचा प्रयत्न केलाय. नाट्यक्षेत्र हे महाराष्ट्राचे सांस्कृतिक वैभव आहे. मात्र, कोरोनाच्या संकटाच्या पार्श्वभूमीवर अडचणीत सापडलेल्या नाट्यक्षेत्राला मदतीचा हात देणं आवश्यक आहे. यासाठी नाट्यनिर्मिती संस्थांचे अनुदान तातडीने वितरीत करण्यात यावे, असे निर्देश उपमुख्यमंत्री अजित पवार यांनी आज दिले. नाट्यनिर्माते आणि नाट्यचळवळीचे प्रश्न सोडविण्यासाठी राज्य सरकार सकारात्मक भूमिका घेईल, असंही उपमुख्यमंत्र्यांनी स्पष्ट केले. (Ajit Pawar’s order to distribute grants to Drama Production Institute)

राज्यातील नाट्यनिर्माते व नाट्य चळवळीसमोरील समस्यांसंदर्भात उपमुख्यमंत्री अजित पवार यांच्या अध्यक्षतेखाली मंत्रालयात बैठकीचं आयोजन करण्यात आलं होतं. या बैठकीत बोलताना उपमुख्यमंत्र्यांनी नाट्यचळवळीचे प्रश्न सोडविण्यासाठी राज्य सरकार सकारात्मक असल्याचं सांगितलं. कामगारमंत्री हसन मुश्रीफ, नगरविकासमंत्री एकनाथ शिंदे, सांस्कृतिक कार्यमंत्री अमित देशमुख, परिवहन मंत्री अनिल परब, सार्वजनिक बांधकाम मंत्री दत्तात्रय भरणे आदींसह वरिष्ठ अधिकारी आणि नाट्यक्षेत्रातील मान्यवर उपस्थित होते.

‘महाराष्ट्राची नाट्यचळवळ राज्याचं सांस्कृतिक वैभव’

मराठी माणूस नाटकवेडा आहे. महाराष्ट्राची नाट्यचळवळ राज्याचं सांस्कृतिक वैभव आहे. राज्यातील नाट्यक्षेत्राच्या समस्या सोडविण्यासाठी राज्य सरकार नेहमीच प्रयत्नशील राहीलं आहे, असं अजित पवार म्हणाले. त्याचबरोबर शासकीय नाट्यगृहात नाट्यप्रयोग आणि नाटकांच्या तालमींसाठी नाट्यसंस्थांना भाडेसवलत, प्रयोगांसाठी आलेल्या नाट्यकलावंतांना शासकीय विश्रामगृहात सवलतीसह प्राधान्य, नाट्यसंस्थेच्या बसेस, टेम्पोंना टोल नाक्यांवर टोलमाफी, बस-टेम्पो पार्कींगसह नाटकाचे सेट ठेवण्यासाठी जागा उपलब्ध करणे आदी मागण्यांवर योग्य ती कार्यवाही करण्याचे निर्देश उपमुख्यमंत्र्यांनी संबंधित विभागांना दिले आहेत. प्रायोगिक रंगभूमीवरील नाटकांच्या स्पर्धा आयोजित करुन विजेत्यांना बक्षीसांसह सवलती देण्याच्या सूचना अजित पवार यांनी दिल्या. नाट्यनिर्मात्यांच्या प्रश्नांना सकारात्मक प्रतिसाद दिल्याबद्दल अभिनेते प्रशांत दामले यांनी उपमुख्यमंत्री अजित पवार यांचे आभार मानले.

नाट्य कलावंत, थिएटर्सचे चालक- मालकांचे सरकारला सहकार्य

लॉकडाऊनच्या काळात नाट्य कलावंत, थिएटर्सचे चालक- मालक यांनी राज्य सरकारला सहकार्य केलं आहे. रुग्णालयांची संख्या अपुरी पडत असताना तात्त्पुरत्या रुग्णालयांसाठी थिएटर्स, त्याठिकाणी असलेली मुबलक जागांमध्ये काही प्रमाणात व्यवस्था उपलब्ध करून देण्याची तयारी दर्शवली होती. त्यावेळी मराठी नाट्य आणि चित्रपटसृष्टीतील मान्यवरांनी कोरोनाविरुद्धच्या लढाईत ते राज्य शासनासोबत असून सर्व प्रकारचे सहकार्य करण्यास तयार असल्याचे सांगितलं होतं. या पार्श्वभूमीवर आता राज्य सरकारनेही नाट्य निर्मिती संस्थांना दिलासा देण्याचा प्रयत्न केलाय.

इतर बातम्या :

विधिमंडळाचे पावसाळी अधिवेशन 5 जुलैपासून; कोरोनाच्या पार्श्वभूमीवर दोन दिवसाचे कामकाज निश्चित

शिवसेना-भाजप युती होणार का? वाघ आणि सामंत यांचं एकमेकांकडे स्मितहास्य

Ajit Pawar’s order to distribute grants to Drama Production Institute